IAP 36 - BALA LUK DO'

Ukum Ratnan Babpat Decur Luk Inan Awan

¹ Idi amung lun rayeh tetek ruma' inul pupu Giliad, anak Makir luk mupun Manasé ratnan inul Yusup ineh iné' matun ni Musa, idi amung lun rayeh lun Israil, kebaladeh,

² “Tuhan nengecuk namu mabpat tana' ineh kuan lun Israil ku babpatdeh dengan nala' udi. Idi teh Tuhan nengecuk namu maré babpat Selopehad luk kinanak kai kuan anak-anakneh luk decur.

³ Iamo' kudeng ideh lapen lun pupu Israil luk baken, kali' rungen babpatdeh lapen lun luk ngaweh nedeh, idi babpat kai lun Giliad iuk amé' isuut.

⁴ Idi kareb Lak luk Kelimeh Ngepulu' bang bawang Israil, babpatdeh uen nuet dengan babpat inul awandeh ineh. Iamo' babpat kai lun Giliad isuut peh.”

⁵ Idi kebala Musa nelun Israil, maya' ecuk Tuhan, “Matu bala inul Manasé ini.

⁶ Idi ini bala Tuhan ratnan anak-anak decur Selopehad, ‘Ideh miak lapen idé-idé luk piandeh, kudeng ieh ratnan pupudeh sebuleng,

⁷ pad babpat lun Israil ineh na mubuh ratnan aceh inul amé' inan aceh inul luk baken.

⁸ Idi do' anid-anid anak decur luk ngalap babpat arang amung inul lun Israil, lapen deléi ratnan pupuneh sebuleng, pad lun Israil miak matar anid-anid babpat tepundeh,

⁹ idi babpat aceh pupu na mubuh amé' inan aceh pupu baken; ngaceku anid-anid inul lun Israil matar babpatdeh sebuleng.’ ”

^10-11 Idi anak-anak decur Selopehad, ieh ineh Makela, Tirsa, Hogela, Milka, idi Noa, nemaya' kudeng luk bila Tuhan ni Musa, idi ideh nengaweh, idi ilap anak-anak deléi taman pinakendeh,

¹² ieh ineh deléi rat inul Manasé luk anak Yusup pad babpatdeh lutep kuan inul tamandeh.

¹³ Ini amung ukum luk bida' Tuhan kuan amung lun Israil dengan tang Musa luun raked Moab dipar Abpa' Yarden déi' Yeriko.