IAP 35 - BALA LUK DO'

Bawang-Bawang Luk Litep Kuan Lun Liwi

¹ Idi kebala Tuhan ni Musa déi' raked Moab dipar Abpa' Yarden déi' Yeriko,

² “Ngecuk nelun Israil maré tuda'-tuda' babpat bawangdeh kuan lun Liwi, dengan laman teh.

³ Idi amung bawang ineh miak inan lun Liwi tudo, idi laman ineh inan aya'deh.

⁴ Idi laman luk iko maré kuan lun Liwi ineh, ieh ineh rat anid lidung ar bawang 250 depeh.

⁵ Idi do' muyuh nari rat ku ar bawang ineh rat lidung pa busat aco, 500 depeh, idi rat ku lidung pa kabing busat aco 500 depeh, idi rat ku lidung pa acep aco, 500 depeh, idi rat ku lidung pa tinueh busat aco, 500 depeh, idi bawang ineh luun unedneh. Ieh ineh laman bawangdeh.

⁶ “Idi rat arang amung bawang luk barén muyuh nelun Liwi, do' inan anem bawang luk inan sigapung, pad lemulun luk ngaté lemulun baken dengan rungen, miak buro amé' déi'. Idi baken ratnan ineh do' muyuh maré apat ngepulu' dueh bawang baruh teh.

⁷ Idi kinula' amung bawang dengan lamandeh, apat ngepulu' ualuh.

⁸ Kinula' bawang lun Liwi arang anid pupu uen ngeletep maya' kirayeh tana'deh.”

Bawang Luk Inan Sigapung

⁹ Kebala Tuhan ni Musa,

¹⁰ “Do' mada' nelun Israil: Kareb muyuh pangeh guta Abpa' Yarden macing bawang Kanaan,

¹¹ do' muyuh mili' tuda'-tuda' bawang su luk inan lun luk ngaté lemulun, baken dengan rungen, miak sigapung.

¹² Idi bawang-bawang ineh inanneh sigapung ratnan pupu lun luk pinaté ineh luk pian ngua' até kinanakdeh, pad ieh na pitayen kareb nateh ideh besara'.

¹³ Do' mili' anem bawang, ieh ineh

¹⁴ teluh bawang pa busat aco Abpa' Yarden, idi teluh déi' bawang Kanaan.

¹⁵ Idi anem bawang ineh mangun ku su luk inan sigapung, pad lemulun luk nengaté dengan na inau' rungen, miak buro amé' déi', do' lun Israil idi lun sakai pana'.

^16-18 “Kudeng aceh lemulun maper aceh lun ku belawan, batu kian kayuh lek, pad ieh maté, idi ieh ineh selemulun luk ngaté dengan rungen. Na miak na ieh pitayen.

¹⁹ Idi lun luk ngua' até ineh miak ngaté neneh, iapeh su inanneh papu' neneh.

²⁰ “Idi teh kudeng aceh lemulun nenebpek aceh lun ku gateh niatneh, kian nemitung neneh macing maté lek,

²¹ kian dengan gateh niatneh ku temaruh ieh pangeh nemukut neneh pad macing maté, na miak na ieh pitayen, ngaceku ieh selemulun luk ngaté dengan rungen. Idi lun luk ngua' até ineh miak ngaté neneh iapeh su inanneh papu' neneh.

²² “Iamo' kudeng inan lemulun naté netarad lun baken dengan na inau' rungen, kian nebitungneh ku anun-anun dengan na inau' rungen,

²³ idi kudeng inan aceh lemulun luk neritep ku batu luk linubid lun baken dengan na nekali', iamo' baken ieh mét niat neneh idi pian nganau' luk dat kuanneh;

²⁴ idi do' lun mula' ineh mutut ukum idi méi' nelun luk pangeh nengaté ineh meluun ratnan lemulun luk pian ngua' até ineh.

²⁵ Idi do' lun mula' ineh matar nelun luk nengaté ineh ratnan lemulun luk pian ngua' até ineh, idi nated neneh lemubed amé' bang bawang luk inan sigapung, luk inanneh neburo atun. Idi do' ieh tudo déi', pad Imam Rayeh ineh maté.

²⁶ Iamo' kudeng lun luk nengaté ineh remuat rat bang bawang luk inanneh sigapung,

²⁷ idi kudeng ieh papu' nelun luk ngua' até ineh, idi miak lun luk ngua' até ineh ngaté neneh, idi lun luk ngua' até ineh na mesala'.

²⁸ Lun luk ngaté na miak remuat rat bang bawang luk inanneh sigapung kareb nateh Imam Rayeh maté. Iamo' muci ratnan até Imam Rayeh, ieh miak muli' amé' inan bawangneh sebuleng.

²⁹ Idi ini aceh ukum kuan muyuh macing ku anak inul muyuh bang anid-anid bawang muyuh.

³⁰ “Anid-anid lemulun luk ngaté lemulun, do' ieh pitayen maya' bala lun luk nekali'. Iamo' kudeng seburur lun luk nekali' mo', na ieh miak pitayen.

³¹ Idi aleg muyuh ngalap usin luk ku nguli' nelun luk nengaté ineh. Iamo' do' ieh pitayen.

³² Kudeng ineh teh aleg muyuh ngalap usin luk ku nguli' lemulun luk pangeh neburo iné' bang bawang luk inan sigapung, pad ieh miak muli' amé' bang bawangneh sebuleng kareb nateh Imam Rayeh maté,

³³ pelé muyuh ngedat bawang luk inan muyuh tudo. Ngaceku dara' lemulun ineh ngedat bawang. Idi bawang ineh na miak ngalap do' kudeng na ngeruat dara' lemulun luk ngaté ineh.

³⁴ Idi aleg muyuh ngelutak bawang luk inan muyuh tudo, ngaceku Ui pana' luk tudo bang ineh. Ui ini Tuhan luk tudo arang uned lun Israil.”