IAP 34 - BALA LUK DO'

Lakan Tana' Pupu Israil Déi' Bawang Kanaan

¹ Idi kebala Tuhan ni Musa,

² “Do' mada' nelun Israil: Kareb muyuh semuet bang bawang Kanaan, do' ngeletep lakan tana' muyuh kudeng ini.

³ Idi lakan muyuh luk pa kabing busat aco, ieh ineh rat su luk ali-ali déi' Sin, iring tana' Edom. Idi lakanneh pa busat aco, ieh ineh rat paped Abpa' Paci' luk pa busat aco.

⁴ Idi rat ieneh lakanneh amé' pa kabing busat aco Ruan Akrabim macing déi' Sin, idi suet pa kabing busat aco Kadis Barnia. Idi rat ieneh lakanneh amé' déi' Hasar Adar idi petacu macing Asmon.

⁵ Idi lakanneh kemilu' rat Asmon suet Abpa' Masir, idi papedneh déi' Abpa' Rayeh.

⁶ “Idi lakan muyuh pa acep aco ineh Abpa' Rayeh.

⁷ “Idi lakan muyuh pa tinueh busat aco, ieh ineh rat Abpa' Rayeh. Do' muyuh ngetu iringneh macing Pegkung Hor.

⁸ Idi rat Pegkung Hor ineh do' muyuh ngetu iringneh macing déi' Hamat. Idi paped lakan ineh macing déi' Sedad.

⁹ Idi rat ieneh lakan ineh macing déi' Sipron idi papedneh déi' Hasar Enan.

¹⁰ “Idi do' muyuh ngetu lakan muyuh pa busat aco rat Hasar Enan macing Sepam.

¹¹ Idi lakan ineh musul rat Sepam amé' Ribla pa busat aco Ain. Idi lakan ineh musul teh macing tangeb Takung Galilia pa busat aco.

¹² Idi rat ieneh lakan ineh musul teh macing Abpa' Yarden, idi papedneh déi' Abpa' luk Mepaci'. Ini tana' muyuh dengan lakanneh.”

¹³ Idi kebala Musa nelun Israil, “Ini tana' luk ruen muyuh mabpat dengan nala' udi, idi luk pangeh bila Tuhan barénNeh kuan inul pupu luk liwa' setangal ineh.

¹⁴ Ngaceku pupu Rubin, idi Gad, idi sebuang pupu Manasé pana' pangeh nengalap babpatdeh

¹⁵ déi' dipar Abpa' Yarden petutup ku Yeriko pa busat aco.”

Lun Rayeh-Rayeh Luk Mabpat Tana'

¹⁶ Idi kebala Tuhan ni Musa,

¹⁷ “Idi ini ngadan amung lun luk mabpat tana' ineh kuan muyuh, ieh ineh Eliasar luk imam idi Yusak Nun.

¹⁸ Idi do' muyuh ngecuk sebuleng lun rayeh rat anid-anid pupu mabpat tana' ineh kuandeh.”

^19-28 Idi ini ngadan lun rayeh luk pinili' Tuhan: Pupu Lun Rayeh Inul Yahuda Kaleb Yepuneh Simion Selumil Amihud Beniamin Elidad Kislon Dan Buki Jogli Manasé Haniel Epod Epraim Kemuel Siptan Sebulon Elisapan Panak Iskar Paltiel Asan Aser Akihud Selomi Naptali Padahil Amihud

Pupu Lun Rayeh Inul

²⁹ Ini amung lun luk icuk Tuhan mabpat tana' kuan lun Israil bang bawang Kanaan.