IAP 33 - BALA LUK DO'

Lawé Lun Israil Rat Masir Amé' Moab

¹ Idi ini amung su luk inan lun Israil nelupo, kareb ideh nenalan rat bawang Masir dengan amung bawehdeh luk bang imet Musa idi Arun.

² Idi Musa nengayud amung su luk inandeh nelupo, maya' kudeng luk bila Tuhan. Idi ini amung su luk inandeh nelupo rat pundeh nenalan.

³ Idi ideh nenalan rat Ramsis pulu' limeh aco bulan luk pun-pun, idi seaco rat pangeh Irau Paska. Idi lun Israil nenalan dengan mawang niat pa kiung lun Masir,

⁴ laba' lun Masir nanem amung anakdeh luk atun luk pinaté Tuhan kareb Ieh nengukum allahdeh.

⁵ Idi lun Israil nenalan rat Ramsis. Idi ideh nelupo déi' Sukot.

⁶ Idi ideh nenalan rat Sukot, idi ideh nelupo déi' Etam luk iring su luk ali-ali.

⁷ Idi ideh nelemubed rat Etam idi iné' Pi Hakirot luk pa busat aco Baal Sepon. Idi ideh nelupo petutup Migdol.

⁸ Idi ideh nenalan rat Pi Hakirot idi neguta Abpa' Pisui* petacu iné' su luk ali-ali. Idi ideh nenalan teluh aco kiadoneh déi' su luk ali-ali déi' Etam. Idi ideh nelupo déi' Mara.

⁹ Idi ideh nenalan rat Mara idi nacing Elim. Idi Elim ineh inan pulu' dueh bued abpa' idi tudu' ngepulu' lawa piasau. Idi ideh nelupo su ineh.

¹⁰ Idi ideh nenalan rat Elim idi nelupo tangeb Abpa' Pisui*.

¹¹ Rat ieneh ideh iné' lupo déi' su luk ali-ali déi' Sin.

¹² Pangeh ineh ideh nelupo déi' Dopka.

¹³ Idi pangeh ineh ideh iné' déi' Alus.

¹⁴ Pangeh ineh ideh nelupo déi' Repidim. Idi su ineh na luk idi abpa' rupendeh.

^15-37 Rat Repidim macing Pegkung Hor ideh nelupo su ini, ieh ineh: su luk ali-ali déi' Sinai, Kibrot Hatawa, Hasirot, Ritma, Rimon Peris, Libna, Risa, Kehelata, Pegkung Seper, Harada, Makelot, Tahat, Tira, Mitka, Hasmona, Moserot, Beni Yakan, Hor Gidgad, Yotbata, Abrona, Esion Giber, su luk ali-ali déi' Sin, (ieh ineh Kadis), idi Pegkung Hor iring tana' Edom.

^38-39 Idi Arun luk imam ineh iné' luun Pegkung Hor maya' bala Tuhan. Idi ieh naté déi' kareb ulunneh 123 lak, bang aceh aco bulan luk kelimeh bang lak luk keapat ngepulu' muci ratnan lun Israil nepura' rat bawang Masir.

⁴⁰ Idi raca' bawang Arad, luk tudo déi' tana' Negeb bang bawang Kanaan, neninger bala lun Israil macing.

^41-49 Idi ideh nenalan rat Pegkung Hor idi nelupo su ini, ieh ineh: Salmona, Punon, Obot, Ruma' Tican déi' Abarim bang tana' Moab, Dibon Gad, Alemon Diblataim, Pegkung Abarim luk petutup Nebo, idi déi' Raked Moab dipar Abpa' Yarden déi' Yeriko, arang Bait Yesimot dengan Raked Abel Sitim.

Bada' Kareb Nateh Guta Abpa' Yarden

⁵⁰ Idi kebala Tuhan ni Musa déi' raked Moab i tangeb Abpa' Yarden déi' Yeriko,

⁵¹ “Do' mada' nelun Israil: Kareb muyuh pangeh neguta Abpa' Yarden idi semuet bang bawang Kanaan,

⁵² do' muyuh ngusu amung lun bang bawang ineh rat pa kiung muyuh idi mila' amung akangdeh luk ratnan batu, idi ngareg amung akangdeh luk inurai, idi ngusag amung su luk inandeh sembayang.

⁵³ Idi do' muyuh ngalap tana' ineh idi tudo déi'. Ngaceku tana' ineh pangeh biréKu nemuyuh.

⁵⁴ Idi do' muyuh mabpat tana' ineh kuan pupu muyuh, dengan nala' udi. Idi do' maré babpat luk rayeh kuan inul luk mula', idi babpat luk isuut kuan inul luk pawa'.

⁵⁵ Iamo' kudeng muyuh na ngusu lun bang bawang ineh rat pa kiung muyuh, kali' rungen ideh mangun ku aceh usi' bang mateh muyuh idi tabpa' su sigarang muyuh. Idi ideh miak ngesusa' nemuyuh.

⁵⁶ Idi kudeng muyuh na ngusu nedeh, Ui miak ngukum nemuyuh, mepad kudeng Ui nengerawé ngukum nedeh.”