IAP 32 - BALA LUK DO'

Pupu Luk Tudo Pa Busat Aco Abpa' Yarden

¹ Inul Rubin idi inul Gad mula' aya'. Idi ideh nenier tana' Yaser idi tana' Giliad, idi dueh bawang ineh do' inan nganau' aya'.

² Idi ideh iné' ni Musa, Eliasar luk imam, idi lun rayeh pupu Israil ineh, kebaladeh,

^3-4 “Amung bawang luk ilap Tuhan kuan lun pupu Israil, ieh ineh Atarot, Dibun, Yaser, Nimra, Hesbon, Aliala, Sebam, Nebo, idi Bion, ieh ineh aceh tana' luk do' inan nganau' aya'. Idi kai inan mula' aya'.

⁵ Do' maré tana' ini kuan kai. Idi aleg ngecuk nekai guta Abpa' Yarden.”

⁶ Iamo' kebala Musa nedeh, “Pianké muyuh tudo ieni kareb kinanak-kinanak muyuh amé' pebunu'?

⁷ Idi ngudehké muyuh ngerapang niat lun Israil, pad ideh na sikal guta amé' bang bawang luk pangeh biré Tuhan kuandeh?

⁸ Idi kudeng ineh teh kekamen taman-taman muyuh kareb ui nengecuk nedeh rat Kadis Barnia iné' nier bawang ini.

⁹ Kareb ideh iné' idi nacing Ruan Eskol, idi nenier bawang ineh, idi ideh nengerapang niat lun Israil, pad ideh na iné' bang bawang luk biré Tuhan kuandeh.

¹⁰ Idi Tuhan pelaba useh nedeh kareb ineh. Idi Ieh nepebulung, kebulungNeh,

¹¹ ‘Kali' rungen seburur pana' rat arang lun luk nepura' rat Masir luk ulun dueh ngepulu' lak idi mela na miak kali' bawang luk pangeh pijani'Ku kuan tepun muyuh, ieh ineh kuan Ibrahim, Isak, idi Yakub, ngaceku ideh na lutep maya' Negku.

¹² Iamo' Kaleb Yepuneh lun Kenisi idi Yusak Nun mo' miak kali' bawang ineh ngaceku didueh pangeh lutep maya' Negku.’

¹³ Idi Tuhan pelaba useh nelun Israil, pad Ieh nengecuk nedeh nalan-nalan déi' su luk ali-ali, apat ngepulu' lak kinioneh, pad amung lemulun luk nenganau' sala' pa kiung Tuhan maté.

¹⁴ Idi nekini muyuh pana' maya' lawé taman muyuh, aceh inul luk mesala', pian ngula' useh Tuhan kuan lun Israil!

¹⁵ Kudeng muyuh lemubed ratnan Tuhan, kali' rungen Ieh nima' pupu ini mio déi' su luk ali-ali. Idi muyuh luk ngacing susa' kuan pupu ini.”

¹⁶ Idi ideh nengelio putuhdeh baruh teh kebaladeh, “Kai pian nganau' libung su ini kuan dumba kai, idi bawang luk linibung kuan anak kai.

¹⁷ Iamo' kai miak temina' idi amé' pa atun lun Israil, pad macing inan bawangdeh. Iamo' kareb ineh, anak kai miak tudo bang bawang luk meraben libung pad ideh na susa' ku lun bang bawang ineh.

¹⁸ Idi kai na miak lemubed kudeng nateh anid-anid burur lun Israil nacing inan bawangdeh.

¹⁹ Idi na kai miak ngalap babpat dengandeh déi' dipar Abpa' Yarden idi luk mado pana', ngaceku babpat kai dipar Abpa' Yarden selipa luk pa busat aco.”

²⁰ Idi kebala Musa nedeh, “Kudeng muyuh maya' jani' muyuh idi amé' pebunu' pa kiung Tuhan,

²¹ idi amung lun pebunu' luk arang muyuh miak guta Abpa' Yarden pa kiung Tuhan idi ngusu amung bunu'Neh rat pa kiungNeh.

²² Idi kudeng bawang ineh pangeh linaya' tu-tu pa kiung Tuhan, pangeh ineh idi teh muyuh miak lemubed, idi muyuh mepuit ratnan jani' muyuh inan Tuhan idi nelun Israil. Idi tana' ini pana' miak mangun ku babpat muyuh pa kiung Tuhan.

²³ Iamo' kudeng muyuh na maya' jani' muyuh, kali' rungen muyuh mesala' pa kiung Tuhan, idi sala' muyuh miak migket nemuyuh.

²⁴ Do' muyuh mudut bawang kuan anak muyuh idi libung kuan aya' muyuh, idi nganau' maya' kudeng luk bila muyuh.”

²⁵ Idi kebala inul Gad idi inul Rubin ni Musa, “Kai miak nganau' maya' kudeng luk bilamu nekai.

²⁶ Anak kai idi awan kai idi amung aya' kai miak ketecan bang bawang Giliad ini.

²⁷ Iamo' kai miak guta, ieh ineh amung kai luk amé' pebunu' pa kiung Tuhan, maya' kudeng luk bilamu.”

²⁸ Idi kebala Musa ni Eliasar idi ni Yusak Nun idi inan amung lun rayeh pupu Israil,

²⁹ “Kudeng inul Gad idi inul Rubin guta Abpa' Yarden pebaya' nemuyuh, ieh ineh amung lun luk amé' pebunu' pa kiung Tuhan, idi kudeng bawang ineh pangeh linaya' pa kiung muyuh, idi do' muyuh maré nedeh tana' Giliad ku babpatdeh.

³⁰ Iamo' kudeng ideh na amé', idi ideh miak ngalap babpat dengan muyuh bang bawang Kanaan.”

³¹ Idi inul Gad idi inul Rubin nengor balaneh, “Kai miak nganau' maya' luk bila Tuhan nekai.

³² Kai miak guta amé' pebunu' pa kiung Tuhan bang bawang Kanaan. Idi babpat tana' luk i dipar Abpa' Yarden ini lutep kuan kai.”

³³ Idi Musa nemaré kuan inul Gad idi inul Rubin, idi sebuang inul Manasé anak Yusup, bawang lun Amori luk bang imet Sihon raca' lun Amori, bawang Basan luk bang imet Raca' Og, dengan amung luk bang bawang ineh.

³⁴ Idi inul Gad nemudut bawang Dibon, Atarot, Arur,

³⁵ Atarot Sopan, Yasar, Yok Biha,

³⁶ Bait Nimra, idi Bait Haran, amung ineh bawang luk meraben, dengan libung aya'deh pana'.

³⁷ Idi inul Rubin nemudut Hesbon, Eliala, Kiriataim,

³⁸ Nebo, Baal Mion (idi ngadandeh uen ngelibal), idi Sibma. Idi ideh nenganau' ngadan luk mebaruh kuan bawang luk pinudutdeh.

³⁹ Idi anak-anak Makir, luk inul Manasé pana' iné' Giliad idi nengaro bawang ineh idi nengusu lun Amori luk bang bawang ineh.

⁴⁰ Idi Musa nemaré Giliad ineh kuan Makir luk inul Manasé, idi ieh netudo déi'.

⁴¹ Idi Yair luk inul Manasé pana' iné' ngaro amung bawangdeh luk isuut, idi ieh neneten ngadan bawang ineh Hawat Yair.

⁴² Idi Noba pana' iné' ngaro bawang Kenat idi amung babpatneh, idi ieh neneten ngadan bawang ineh Noba nemaya' ngadanneh sebuleng.