IAP 31 - BALA LUK DO'

Lun Israil Ngua' Derehdeh Luk Inau' Lun Midian

¹ Kebala Tuhan ni Musa,

² “Ngua' dereh lun Israil luk inau' lun Midian. Pangeh ineh idi iko miak maté.”

³ Idi kebala Musa nelun mula' ineh, “Do' mili' tuda'-tuda' burur rat arang muyuh amé' pebunu' nelun Midian, pad ngacing ukum luk inau' Tuhan kuandeh ineh.

⁴ Idi ratnan anid-anid inul pupu lun Israil, do' ngecuk meribudeh amé' pebunu'.”

⁵ Idi kinula' luk pinili' ratnan sebuleng inul lun Israil amé' pebunu', ieh ineh meribu burur, idi amungdeh pulu' dueh ngeribu burur.

⁶ Idi Musa nengecuk nedeh amé' pebunu' dengan Pinihas anak Eliasar luk imam. Idi ieh luk ngimet binaweh Su luk Meligan idi amung tawak luk ruen nateg maré kali' kareb pebunu'.

⁷ Idi ideh nepebunu' nelun Midian, maya' kudeng luk bila Tuhan ni Musa, idi amung deléi pinatédeh.

⁸ Idi teh ideh nengaté amung raca' lun Midian, ieh ineh Iwi, Rekem, Sur, Hur, idi Reba, limeh burur raca' Midian, idi teh Bilam Bior.

⁹ Idi lun Israil nenaban amung decur lun Midian idi amung anak-anakdeh. Idi amung aya'deh idi binawehdeh ilapdeh.

¹⁰ Idi amung bawang idi ruma' luk inandeh, idi amung lepodeh tinutungdeh.

¹¹ Idi ideh nengaro amung binaweh idi aya'deh, idi nenaban lemulun teh.

¹² Idi ideh nenguit amung luk ilapdeh iné' ni Musa idi ni Eliasar idi amung lun Israil, déi' su luk inandeh nelupo déi' Raked Moab luk tangeb Abpa' Yarden luk muneng ku Yeriko.

Bunu' Israil Lemubed

¹³ Musa, Eliasar luk imam, idi amung lun rayeh lun Israil ineh neremuat rat su luk inandeh nelupo idi iné' papu' nedeh.

¹⁴ Idi Musa pelaba useh nelun rayeh luk nguyut nedeh pebunu', idi do' lun rayeh luk nguyut bang meribu, idi lun rayeh luk nguyut bang meratu luk nacing rat pebunu'.

¹⁵ Idi kebala Musa nedeh, “Ngudeh muyuh ngulun amung decur ini?

¹⁶ Ngaceku ideh ineh luk nenganau' nelun Israil nelemubed ratnan Tuhan, kareb ideh nemaya' bala Bilam idi nesembayang déi' Pior, pad ét ineh nacing nan pupu Tuhan.

¹⁷ Ngaceku ineh do' ngaté amung deléi rat arang anak-anak ineh, idi ngaté amung decur luk pangeh nepamung inan deléi.

¹⁸ Iamo' do' ngulun amung decur luk na nepamung inan deléi kuan muyuh.

¹⁹ Idé-idé luk pangeh nengaté lemulun idi idé-idé luk pangeh nengakem lun luk pinaté ineh na miak semuet bang su luk inan nelupo tudu' aco kinioneh, idi kareb aco luk keteluh idi aco luk ketudu' do' muyuh ngeligan burur muyuh idi burur lun luk tiban muyuh.

²⁰ Idi teh do' muyuh ngeligan amung ayung idi amung luk inau' ratnan kubil idi luk ratnan buluh amék, idi luk ratnan kayuh teh.”

²¹ Idi kebala Eliasar luk imam ineh kuan amung lun pebunu' luk pangeh nacing ratnan pebunu', “Ini ukum luk bila Tuhan ni Musa:

^22-23 Idi amung amas, pirak, tekaling, belawan, semara' buda', idi semara' item, luk tuman ku apui, do' muyuh ngeligan ineh ku apui. Idi teh amung ineh baruin bang abpa' luk ku maru' sala'. Idi amung binaweh luk baken miak uen ngeligan ku abpa'.

²⁴ Idi teh do' muyuh mupu' ayung muyuh kareb aco luk ketudu' ineh pad muyuh meligan. Pangeh ineh muyuh miak semuet bang su luk inan nelupo.”

Ratnan Mabpat Binaweh Luk Ilap Lun Luk Pebunu'

²⁵ Kebala Tuhan ni Musa,

²⁶ “Do' iko idi Eliasar dengan lun rayeh pupu Israil ngiap amung aya' idi lemulun luk tiban.

²⁷ Idi nganau' amung ineh dueh babpat, sebuleng babpat kuan lun luk iné' pebunu', idi sebuleng babpat kuan lemulun luk na iné'.

²⁸ Idi do' ngalap aceh babpat kuan Tuhan rat nelun luk iné' pebunu', ieh ineh sebuleng ratnan limeh ngeratu, do' lemulun, sapi', keladai, idi dumba pana'.

²⁹ Idi maré ineh ni Eliasar luk imam mangun ku aceh baré kuan Tuhan.

³⁰ Idi ratnan babpat lun luk na iné' pebunu', do' ngalap sebuleng ratnan limeh ngepulu', do' lemulun, idi pung, ieh ineh sapi', keladai, idi dumba pana'. Idi amung ineh barén kuan lun Liwi luk ngimet kekamen bang Lepo su luk inan papu' Tuhan.”

³¹ Idi Musa didueh Eliasar luk imam nenganau' maya' kudeng luk bila Tuhan ni Musa.

^32-35 Idi amung luk ilap lun luk pebunu' ineh perapu dengan luk dinug bururdeh sebuleng: 675,000 dumba, 72,000 sapi', 61,000 keladai, idi 32,000 decur luk na nepamung nan deléi.

^36-40 Idi babpat dumba kuan lun luk iné' pebunu' ineh, 337,500, idi babpat dumba kuan Tuhan, ieh ineh 675; idi sapi' kuan lun pebunu', 36,000, idi babpat sapi' kuan Tuhan, 72; idi keladai kuan lun pebunu', 30,500, idi babpat keladai kuan Tuhan, 61; idi decur luk na nepamung nan deléi kuan lun pebunu', 16,000, idi babpat decur ineh teh kuan Tuhan, 32.

⁴¹ Idi Musa nemaré babpat luk barén ni Eliasar luk imam, maya' kudeng luk bila Tuhan ni Musa.

^42-46 Idi babpat lun luk na iné' pebunu' ineh mepad mo': 337,500 dumba, 36,000 sapi', 30,500 keladai, idi 16,000 decur luk na nepamung nan deléi.

⁴⁷ Idi Musa nengalap ratnan babpat lun Israil luk na iné' pebunu', sebuleng ratnan limeh ngepulu', do' lemulun idi pung, idi nemaré ineh nelun Liwi luk ngimet kekamen bang Lepo su luk inan papu' Tuhan, maya' kudeng luk bila Tuhan ni Musa.

⁴⁸ Idi amung lun rayeh baweh iné' matun ni Musa.

⁴⁹ Idi kebaladeh neneh, “Kai pangeh nengiap lun luk iné' pebunu' luk pa liang imet kai, idi seburur pana' nateh luk na idi.

⁵⁰ Idi ngaceku ineh kai nenguit aceh baré kuan Tuhan, maya' anun-anun luk ilap kai luk inau' ratnan amas, ieh ineh pakal, leku', susing, abé, idi bané, pad nganau' luk nguit pedo' kuan kai pa kiung Tuhan.”

⁵¹ Idi Musa idi Eliasar ineh nengalap amas ineh rat nelun rayeh baweh. Amung ineh inurai lun luk mileh.

⁵² Idi berat amung amas luk birédeh kuan Tuhan, ieh ineh teluh ngeratu kati mela.

⁵³ Idi amungdeh luk anak itin nenganug luk ilapdeh.

⁵⁴ Musa idi Eliasar nengalap amung amas ineh, idi nenguit ineh iné' bang Lepo su luk inan papu' Tuhan mangun ku aceh terawé Tuhan kuan lun Israil.