IAP 30 - BALA LUK DO'

Ukum Ratnan Lemulun Luk Pejani' Inan Tuhan

¹ Idi kebala Musa kuan amung lun rayeh pupu Israil,

² “Kudeng seburur deléi pangeh nepejani' inan Tuhan, kian nepebulung lek, pian ngado bururneh ratnan anun-anun, idi aleg ieh ngelaba jani'neh, iamo' maya' amung luk bilaneh.

³ “Iamo' kudeng seburur decur pejani' inan Tuhan pian ngado bururneh ratnan anun-anun kareb ieh bang ruma' tamanneh kareb ieh anak adi',

⁴ idi kudeng jani'neh ineh nekali' tamanneh, idi tamanneh ungeng neneh ratnan ineh, idi na ieh miak ngelaba jani'neh, iamo' do' ieh maya' amung luk bilaneh.

⁵ Iamo' kudeng tamanneh mala neneh na petap terawé kareb ieh ninger jani'neh, do' ieh na maya' jani' ineh, idi Tuhan miak maré do' neneh, ngaceku tamanneh nemebpeng neneh.

⁶ “Idi kudeng decur ineh inaweh lun, kareb nateh jani' ineh binaya'neh,

⁷ idi awanneh kali' ratnan ineh idi ieh ungeng neneh idi decur ineh na miak ngelaba jani'neh, iamo' do' ieh maya' amung luk bilaneh.

⁸ Iamo' kudeng awanneh mala neneh na petap terawé kareb ieh ninger jani'neh, do' ieh na maya' jani'neh, ngaceku awanneh nemebpeng neneh, idi Tuhan maré do' neneh.

⁹ “Iamo' jani' decur tinula' idi decur luk ligkan, na miak uenneh ngelaba.

¹⁰ “Iamo' kudeng seburur decur bang ruma' deléineh pangeh pejani' pian ngado bururneh ratnan anun-anun,

¹¹ idi awanneh ninger ineh, idi ieh pirud neneh idi na mebpeng neneh, idi do' decur ineh maya' jani'neh ineh.

¹² Iamo' kudeng awanneh mebpeng neneh kareb ieh ninger ineh, idi amung luk pangeh bilaneh na miak ruenneh maya' ngaceku awanneh nemebpeng neneh, idi Tuhan pana' miak maré do' neneh.

¹³ Idi amung bulung idi jani' luk inau' decur ineh miak ruen awanneh mebpeng, kian ruenneh ngeletep lek.

¹⁴ Iamo' kudeng awanneh pirud neneh seaco kinioneh, idi ieh nengeletep jani' awanneh, ngaceku ieh pirud neneh kareb ieh neninger jani' ineh.

¹⁵ Iamo' kudeng ieh mebpeng neneh pangeh ineh, ieh miak mabeh sala' awanneh, ngaceku ieh na maya' jani'.”

¹⁶ Idi amung ini dalan luk bida' Tuhan ni Musa, arang deléi dengan awanneh, idi arang aceh taman dengan anak decurneh luk anak adi' bang ruma' tamanneh.