IAP 3 - BALA LUK DO'

Anak-Anak Arun

¹ Idi ini anak inul Arun idi Musa kareb Tuhan nepebala ni Musa déi' luun Pegkung Sinai.

² Idi Arun inan apat anak: Nadab anakneh luk atun, Abihu, Eliasar, idi Itamar.

³ Idi ideh inumau idi litep mangun ku imam.

⁴ Iamo' Nadab idi Abihu naté kareb didueh nenguit apui luk na petulu pa kiung Tuhan déi' su luk ali-ali déi' Sinai. Idi didueh ineh na inan anak, iamo' Eliasar idi Itamar ngakem kekamen imam seruked Arun taman didueh mulun.

Lun Liwi Litep Ngakem Kuan Imam

⁵ Idi kebala Tuhan ni Musa,

⁶ “Nguit lun Liwi ineh amé' pa kiung Arun luk imam, pad ideh miak ngedengan neneh.

⁷ Idi do' ideh ngakem bang Lepo su luk inan papu' Tuhan, idi ngedengan lun imam idi lun mula' pana'.

⁸ Idi do' ideh nginita amung repapeh Lepo ineh, idi teh ngakem kuan amung lun Israil.

⁹ Do' iko maré amung lun Liwi ineh kuan Arun idi anakneh. Ngaceku lun Liwi ineh pangeh biré nedeh rat arang amung lun Israil.

¹⁰ Iamo' do' iko ngeletep ni Arun idi anak-anakneh, pad ideh ngakem kekamen imam. Iamo' kudeng inan lun baken nutun ngelibal nedeh, ieh miak pitayen.”

¹¹ Kebala Tuhan ni Musa,

¹² “Ui pangeh nengalap amung lun Liwi rat arang lun Israil ku libal amung anak lun Israil luk atun. Idi amung lun Liwi ineh Ui kuan.

¹³ Ngaceku amung anak luk atun ineh babpatKu. Idi kareb acoKu nengaté amung anak luk atun déi' bawang Masir, kareb aco ineh teh Ui pangeh nengatad amung anak luk atun déi' Israil kuanKu, do' lemulun idi pung pana'. Ui ini Tuhan.”

Lun Liwi Iniap

¹⁴ Kebala Tuhan ni Musa déi' su luk ali-ali déi' Sinai,

¹⁵ “Do' iko ngiap amung anak deléi lun Liwi, maya' tetek ruma'deh luk ulun sebulan idi mela ratnan ineh.”

¹⁶ Idi Musa nenganau' ineh.

^17-20 Idi ini ngadan anak deléi Liwi: Gerson, Kohat, idi Merari, luk tepun inul luk inan ngadan ineh. Gerson inan dueh anak, ieh ineh Libni idi Simi. Kohat inan apat anak, ieh ineh Amram, Isar, Hebron, idi Usiel. Merari inan dueh anak, ieh ineh Mali idi Musi. Ieh ineh tetek ruma' luk inan ngadan ineh.

²¹ Idi inul Libni idi inul Simi, ieh ineh ratnan inul Gerson.

²² Idi kinula' amung anak deléi luk ulun sebulan idi mela luk pangeh iniap, 7,500 burur.

²³ Idi lun Gerson ineh lupo pa keted Lepo pa acep aco.

²⁴ Idi lun rayeh inul Gerson, ieh ineh Eliasap Lail.

²⁵ Idi luk uen anak Gerson nginita, ieh ineh Lepo su luk inan papu' Tuhan, dengan dueh ebpuneh idi dicingneh, luk ku itek tanga',

²⁶ idi dicing natad luk libut Lepo, idi bubpun, idi teh dicing luk ku itek tanga' natad ineh. Ideh luk nengasa' amung ineh.

²⁷ Idi inul Amram, Isar, Hebron, idi Usiel, ieh ineh ratnan inul Kohat.

²⁸ Idi kinula' amung deléi luk ulun sebulan idi mela, luk pangeh iniap, 8,600 burur.

²⁹ Idi lun Kohat lupo pa kabing busat aco iring Lepo ineh.

³⁰ Idi lun rayeh inul Kohat, ieh ineh Elisapan Usiel.

³¹ Idi luk uen anak Kohat nginita, ieh ineh Pati' Pejani', méja, kukud dawan, amung bubpun, idi amung repapeh luk ku pakai imam bang Su luk Meligan idi dicing luk ku itek Su Luk Meluun Ligan, idi amung luk miak ruen nan ineh.

³² Idi lun rayeh lun Liwi, ieh ineh Eliasar anak Arun luk imam ineh, idi ieh lun rayeh amung imam luk ngakem bang Su luk Meligan ineh.

³³ Idi inul Mali idi Musi, ieh ineh ratnan inul Merari.

³⁴ Idi kinula' amung anak deléi luk ulun sebulan idi mela, 6,200 burur.

³⁵ Idi lun rayeh inul Merari, ieh ineh Suril Abihail. Idi ideh ineh lupo pa tinueh busat aco, iring Lepo.

³⁶ Idi luk uen anak Merari nginita, ieh ineh amung bangar Lepo, amung atang, amung diri, amung alen, idi amung repapehdeh, idi amung luk miak ruen nan ineh,

³⁷ idi teh amung diri luk libut natad, perapu dengan amung alenneh, papekneh, idi abetneh.

³⁸ Idi lun luk lupo pa atun Lepo su luk inan papu' Tuhan pa busat aco, ieh ineh Musa idi Arun dengan anak-anakneh. Idi ideh ineh luk ngakem kuan Tuhan bang Su luk Meligan kuan amung lun Israil. Iamo' kudeng inan lun baken nutun ngelibal kekamendeh ineh, ieh miak pitayen.

³⁹ Idi kinula' amung lun Liwi luk iniap Musa idi Arun maya' kudeng luk icuk Tuhan idi maya' tetek ruma'deh, ieh ineh amung deléi luk ulun sebulan idi mela, 22,000 burur.

Anak-Anak Luk Atun Iniap

⁴⁰ Kebala Tuhan ni Musa, “Do' iko ngiap anak deléi lun Israil luk atun, ieh ineh luk ulun sebulan ini mela. Idi do' ngalap amung ngadandeh.

⁴¹ Idi iko miak ngalap lun Liwi kuanKu, ku libal amung anak lun Israil luk atun, idi amung aya' lun Liwi ku libal aya' lun Israil luk atun. Ui ini Tuhan.”

⁴² Idi Musa nengiap amung anak deléi lun Israil luk atun maya' kudeng luk icuk Tuhan neneh.

⁴³ Idi kinula' amung anak deléi luk atun, luk ulun sebulan idi mela luk pangeh iniap, 22,273 burur.

⁴⁴ Kebala Tuhan ni Musa,

⁴⁵ “Do' iko ngalap amung lun Liwi ineh ku libal amung anak deléi lun Israil luk atun, idi amung aya' lun Liwi ku libal aya'deh. Ngaceku amung lun Liwi ineh Ui kuan. Ui ini Tuhan.

⁴⁶ Idi teh usin luk ku nguli' 273 burur anak Israil luk atun luk mela ratnan amung deléi lun Liwi ineh,

⁴⁷ do' ieh ineh limeh balad pirak ku libal seburur, maya' balad pirak Su luk Meligan.

⁴⁸ Idi do' iko maré usin ineh kuan Arun idi anak-anakneh.”

^49-51 Idi Musa nengalap usin, ieh ineh 1,365 balad pirak. Idi ieh nemaré usin ineh kuan Arun idi anak-anakneh, maya' kudeng luk icuk Tuhan neneh.