IAP 29 - BALA LUK DO'

Irau Aco Luk Inan Ngiup Suling

¹ “Idi bang aco luk pun-pun bulan luk ketudu' do' muyuh nganau' aceh tebubpun sembayang. Aleg muyuh ngakem bang aco sineh. Idi ineh aceh aco luk inan muyuh ngiup suling.

² Idi do' muyuh nguit sebuleng sapi' deléi, sebuleng dumba deléi, idi tudu' anak dumba luk ulun selak luk do', ku baré luk sabpen mangun ku aceh buen luk do' kuan Tuhan,

³ idi teh banak luk rinabur ku umau saitun, ku baré akan segatang setangal dengan sapi' ineh, idi segatang dengan dumba ineh,

⁴ idi tudu' lio dengan anid sebuleng anak dumba,

⁵ idi sebuleng amék deléi mangun ku baré ngaceku sala', pad nguit pedo' kuan lun mula',

⁶ baken ratnan baré luk sabpen kareb pun bulan dengan baré akanneh, idi baré luk sabpen luk pekalai dengan baré akanneh, idi baré luk rupen maya' kudeng luk bila kuan muyuh. Iamo' ieh ineh baré luk sabpen mangun ku aceh luk do' buen kuan Tuhan.

Aco Baré Luk Nguit Pedo'

⁷ “Idi pulu' aco bulan luk ketudu' ineh, do' muyuh nganau' aceh tebubpun sembayang. Do' muyuh mawa' na kuman, idi na ngakem bang aco sineh.

⁸ Idi do' muyuh maré sebuleng sapi' deléi, idi sebuleng dumba deléi, idi tudu' anak dumba luk ulun selak, luk do' ku baré luk sabpen mangun ku luk do' buen kuan Tuhan,

⁹ idi teh banak luk rinabur ku umau saitun ku baré akan, segatang setangal dengan sapi' ineh, idi segatang dengan dumba ineh,

¹⁰ idi tudu' lio dengan anid sebuleng anak dumba,

¹¹ idi sebuleng amék deléi mangun ku baré ngaceku sala', baken ratnan baré ngaceku sala' luk nguit pedo' ineh, idi baré luk sabpen luk pekalai, dengan baré akanneh idi baré luk rupen.

Baré Irau Lepo

¹² “Idi pulu' limeh aco bulan luk ketudu' ineh do' muyuh nganau' aceh tebubpun sembayang. Aleg muyuh ngakem bang aco sineh. Iamo' tudu' aco kinioneh do' muyuh nganau' aco rayeh kuan Tuhan.

¹³ Idi bang aco luk pun-pun do' muyuh maré pulu' teluh sapi' deléi idi dueh dumba deléi, idi pulu' apat anak dumba luk ulun selak luk do', ku baré luk sabpen mangun ku luk do' buen kuan Tuhan,

¹⁴ idi teh banak luk rinabur ku umau saitun ku baré akan, segatang setangal dengan sebuleng sapi' deléi, idi segatang dengan anid sebuleng dumba deléi ineh,

¹⁵ idi tudu' lio dengan anid sebuleng anak dumba ineh,

¹⁶ idi sebuleng amék deléi mangun ku baré ngaceku sala', baken ratnan baré luk sabpen luk pekalai idi baré akan, idi baré luk rupen.

¹⁷ “Idi kareb aco luk kedueh ineh do' maré pulu' dueh sapi' deléi, idi dueh dumba deléi, idi pulu' apat anak dumba luk ulun selak luk do',

^18-19 Maré amung ineh dengan baré luk litep kuan aco luk pun-pun.

²⁰ “Idi kareb aco luk keteluh ineh do' maré pulu' aceh sapi' deléi, dueh dumba deléi, idi pulu' apat anak dumba luk ulun selak luk do',

^21-22 Maré amung ineh dengan baré luk litep kuan aco luk pun-pun.

²³ “Idi kareb aco luk keapat ineh do' maré pulu' sapi' deléi, dueh dumba deléi idi pulu' apat anak dumba luk ulun selak, luk do',

^24-25 Maré amung ineh dengan baré luk litep kuan aco luk pun-pun.

²⁶ “Idi kareb aco luk kelimeh ineh, do' maré iwa' sapi' deléi, dueh dumba deléi, idi pulu' apat anak dumba luk ulun selak luk do',

^27-28 Maré amung ineh dengan baré luk litep kuan aco luk pun-pun.

²⁹ “Idi kareb aco luk keanem ineh do' maré ualuh sapi' deléi, dueh dumba deléi, idi pulu' apat anak dumba luk ulun selak luk do',

^30-31 Maré' amung ineh dengan baré luk litep kuan aco luk pun-pun.

³² “Idi kareb aco luk ketudu' ineh, do' maré tudu' sapi' deléi, dueh dumba deléi, idi pulu' apat anak dumba luk ulun selak luk do',

^33-34 Maré amung ineh dengan baré luk litep kuan aco luk pun-pun.

³⁵ “Idi kareb aco luk kewaluh do' muyuh nganau' aceh tebubpun sembayang, aleg muyuh ngakem bang aco sineh.

³⁶ Idi do' muyuh maré sebuleng sapi' deléi, sebuleng dumba deléi, idi tudu' anak dumba luk ulun selak luk do', ku baré luk sabpen, mangun ku luk do' buen kuan Tuhan,

^37-38 Maré amung ineh dengan baré luk litep kuan aco luk pun-pun.

³⁹ “Idi amung ini do' muyuh maré kuan Tuhan, bang anid aco rayeh muyuh luk litep, ieh ineh baré luk sabpen muyuh, baré akan muyuh, idi baré muyuh luk rupen, idi baré muyuh luk nguit pedo', baken ratnan baré ngaceku pejani' muyuh, idi amung baré ratnan katu niat muyuh.”

⁴⁰ Idi Musa nengacing amung-amung bala luk bila Tuhan neneh kuan lun Israil.