IAP 28 - BALA LUK DO'

Luk Barén Kuan Tuhan Anid-Anid Aco

¹ Kebala Tuhan ni Musa,

² “Do' ngecuk nelun Israil kudeng ini: Baré luk barén kuanKu ieh ineh baré akan idi baré luk sabpen, ieh ineh aceh buen luk do' kuanKu. Idi do' muyuh maré ineh kuanKu bang kareb luk pangeh litep.

³ “Ini baré luk sabpen luk barén muyuh kuan Tuhan, ieh ineh do' maré dueh anak dumba luk do' luk ulun selak anid-anid aco.

⁴ Sebuleng anak dumba ineh barén kareb pekak, idi sebuleng barén kareb malem,

⁵ idi tudu' lio banak ku baré akan luk rinabur ku aceh seréi' umau saitun.

⁶ Ini baré luk sabpen luk pangeh bida' Tuhan déi' Pegkung Sinai. Ieh ineh baré luk sabpen mangun ku aceh buen luk do' pa kiungNeh.

⁷ Idi baré luk rupen ineh aceh seréi' dengan anid sebuleng anak dumba. Idi do' ngutang abpa' anggur bang Su luk Meligan.

⁸ Idi sebuleng anak dumba ineh barén kareb malem dengan baré akan, idi baré luk rupen mepad kudeng baré kareb pekak, ieh ineh baré luk sabpen mangun ku luk do' buen kuan Tuhan.

Luk Barén Kareb Aco Luk Inan Mudeng

⁹ “Kareb Aco luk inan Mudeng do' maré dueh anak dumba luk do' luk ulun selak, idi segatang banak luk rinabur ku umau saitun mangun ku baré akan idi dengan baré luk rupen.

¹⁰ Idi ini baré luk sabpen kareb Aco luk inan Mudeng, baken ratnan baré luk sabpen luk pekalai idi baré luk rupen.

Luk Barén Anid-Anid Pun Bulan

¹¹ “Idi anid-anid pun bulan, do' muyuh maré baré luk sabpen kuan Tuhan, ieh ineh dueh sapi' deléi luk pegawa', sebuleng dumba deléi, idi tudu' anak dumba luk do' luk ulun selak.

¹² Idi segatang setangal banak luk rinabur ku umau saitun mangun ku baré dengan anid sebuleng sapi' deléi, idi segatang banak luk rinabur ku umau saitun mangun ku baré akan dengan anid sebuleng dumba deléi.

¹³ Idi tudu' lio banak luk rinabur ku umau saitun mangun ku baré akan dengan anid sebuleng anak dumba, ieh ineh baré luk sabpen mangun ku luk do' buen kuan Tuhan.

¹⁴ Idi barédeh luk rupen, do' ieh ineh dueh seréi' abpa' anggur dengan sebuleng sapi' deléi, idi dueh seréi' abpa' anggur dengan sebuleng dumba deléi, idi aceh seréi' abpa' anggur dengan sebuleng anak dumba. Ini baré luk sabpen anid-anid pun bulan.

¹⁵ Idi teh sebuleng amék deléi barén kuan Tuhan mangun ku baré ngaceku sala', baken ratnan baré luk sabpen luk pekalai idi baré luk rupen.

Ruti Luk Na Linamud

¹⁶ “Idi kareb pulu' apat aco bulan luk pun ieh ineh Aco Paska kuan Tuhan.

¹⁷ Idi pulu' limeh aco bulan ineh, ieh ineh irau rayeh. Idi tudu' aco kinioneh, do' ideh kuman ruti luk na linamud.

¹⁸ Idi aco luk pun-pun, ieh ineh aceh tebubpun sembayang. Aleg muyuh ngakem bang aco sineh.

¹⁹ Do' muyuh maré kuan Tuhan aceh baré luk sabpen, ieh ineh dueh sapi' deléi luk pegawa', idi sebuleng dumba deléi, idi tudu' anak dumba luk ulun selak, luk do'.

²⁰ Idi teh baré akan, ieh ineh banak luk rinabur ku umau saitun, segatang setangal dengan sebuleng sapi' ineh idi segatang dengan dumba ineh,

²¹ idi tudu' lio dengan anid sebuleng anak dumba ineh,

²² idi sebuleng amék deléi mangun ku baré ngaceku sala', pad nguit pedo' kuan lun mula'.

²³ Baré ini baken ratnan baré luk sabpen anid-anid pekak.

²⁴ Kudeng ineh teh muyuh maré bang tudu' aco kinioneh, baré akan luk sabpen mangun ku aceh buen luk do' kuan Tuhan. Baré ineh baken ratnan baré luk sabpen luk pekalai, idi baré luk rupen.

²⁵ Idi aco luk ketudu', ieh ineh aceh tebubpun sembayang kuan muyuh. Aleg muyuh ngakem bang aco sineh.

Irau Pangeh Ranih

²⁶ “Idi bang aco luk pun-pun kareb Irau Pangeh Ranih, kareb muyuh maré padé ku baré akan kuan Tuhan, do' muyuh nganau' aceh tebubpun sembayang. Idi aleg muyuh ngakem bang aco sineh.

²⁷ Idi do' muyuh maré dueh sapi' deléi idi sebuleng dumba deléi idi tudu' anak dumba luk ulun selak, ku baré luk sabpen mangun ku aceh buen luk do' kuan Tuhan,

²⁸ idi teh banak luk rinabur ku umau mangun ku baré akan, ieh ineh segatang setangal dengan sebuleng sapi' deléi ineh, idi segatang dengan dumba deléi ineh,

²⁹ idi tudu' lio dengan anid sebuleng anak dumba ineh,

³⁰ idi sebuleng amék deléi mangun ku baré ngaceku sala' pad nguit pedo' kuan lun mula'.

³¹ Do' muyuh maré amung ineh, dengan baré luk rupen, baken ratnan baré luk sabpen idi baré akan luk pekalai.