IAP 27 - BALA LUK DO'

Putuh Anak Decur Selopehad

¹ Idi ngadan anak decur Selopehad luk anak Hiper, luk inul Giliad, Makir, Manasé, idi Yusup, ieh ineh Makela, Noa, Hogela, Milka, idi Tirsa.

² Idi amungdeh iné' matun ni Musa munung tanga' Lepo su luk inan papu' Tuhan. Idi ideh netuped pa atun Musa, Eliasar luk imam, amung lun rayeh, idi amung lun Israil. Kebaladeh,

³ “Idi taman kai pangeh naté déi' su luk ali-ali. Iamo' na ieh neperurum nedeh luk ngedat Tuhan maya' aket Kora, iamo' ieh pangeh naté ngaceku sala'neh sebuleng, idi ieh na anak deléi.

⁴ Miak ngadan taman kai talan rat arang pupuneh, ngaceku ieh na anak deléi? Maré aceh babpat tana' kuan kai mepad kudeng babpat kinanak taman kai.”

⁵ Idi Musa nengacing luk biladeh kuan Tuhan.

⁶ Idi kebala Tuhan ni Musa,

⁷ “Matu bala anak decur Selopehad. Do' iko maré babpatdeh, idi binaweh anun pana' luk kinanak tamandeh kuan. Idi babpat tamandeh do' barén muli' amé' nedeh.

⁸ Mada' ini kuan amung lun Israil, ‘Kudeng aceh lun maté na anak deléineh, do' maré babpatneh kuan anak decurneh.

⁹ Kudeng ieh na anak decur do' muyuh maré babpatneh kuan kinanak deléi ineh.

¹⁰ Kudeng ieh na kinanak deléi, do' muyuh maré babpatneh kuan taman pinakenneh.

¹¹ Kudeng ieh na taman pinaken, do' muyuh maré babpatneh kuan pupuneh luk muneng neneh. Idi ini miak mangun ku aceh ukum kuan lun Israil maya' kudeng luk bila Tuhan ni Musa.’ ”

Musa Nengikit Ni Yusak Mangun Ku Libalneh

¹² Kebala Tuhan ni Musa, “Amé' iko luun Pegkung Abarim idi nier tana' luk barénKu kuan lun Israil ineh.

¹³ Kudeng iko pangeh nenier ineh, iko miak maté mepad kudeng kinanakmu Arun luk naté.

¹⁴ Ngaceku medueh pangeh nengelaba balaKu déi' su luk ali-ali déi' Sin, kareb lun mula' ngedureng-ngedureng. Na medueh nengerayeh Negku pa kiungdeh tangeb abpa' ineh, ieh ineh Abpa' Meriba luk muneng ku Kadis déi' su luk ali-ali déi' Sin.

¹⁵ Idi kebala Musa kuan Tuhan,

¹⁶ “Do' Tuhan luk Lawa Ulun amung lemulun, mili' seburur lun rayeh kuan pupu ini,

¹⁷ luk miak nguyut nedeh bang amung lawédeh, pad pupu Tuhan na mepad kudeng aceh riudan dumba luk na lun matar nedeh.”

¹⁸ Idi kebala Tuhan ni Musa, “Ngalap ni Yusak Nun, luk inan Roh bang niatneh, idi ngerareng ticu'mu luunneh.

¹⁹ Idi ngecuk neneh tuped pa atun Eliasar luk imam idi amung pupu ini. Idi ngikit neneh pa kiungdeh.

²⁰ Idi maré sebuang laludmu neneh, pad amung lun Israil miak maya' balaneh.

²¹ Idi do' ieh tuped pa kiung Eliasar luk imam, pad Eliasar miak ngitun ukum Urim idi Tumim* kuanneh pa kiung Tuhan. Idi ideh miak maya' balaneh bang amung lawédeh, do' Yusak idi amung lun Israil pana'.”

²² Idi Musa nenganau' maya' kudeng luk bila Tuhan neneh. Idi ieh nenaped ni Yusak pa atun Eliasar luk imam idi amung pupu ineh.

²³ Idi ieh nengerareng ticu'neh luun ulun Yusak. Idi ieh nengikit neneh maya' kudeng luk bila Tuhan neneh.