IAP 25 - BALA LUK DO'

Israil Sembayang Inan Akang Baal Pior

¹ Kareb lun Israil nelupo déi' Sitim, idi ideh nepasét inan decur Moab.

² Decur ineh nenawar nelun Israil kareb ideh maré luk barén kuan akangdeh. Idi ideh nekuman idi netekeradung inan akangdeh.

³ Idi lun Israil nesembayang inan akang Pior. Idi Allah pelaba useh nedeh.

⁴ Idi kebala Tuhan ni Musa, “Ngalap amung lun rayehdeh, idi ngekito nedeh luun ét idang pa kiung Tuhan, pad useh Tuhan miak ugka' kuan lun Israil.”

⁵ Idi kebala Musa kuan amung lun luk mutut besara' lun Israil, “Do' ngaté amung lun luk pangeh nemaya' akang Pior.”

⁶ Idi inan aceh lun Israil nenguit sebuleng decur lun Midian iné' leponeh pa kiung Musa idi pa kiung amung lun Israil, kareb ideh nangi' munung tanga' Lepo su luk inan papu' Tuhan.

⁷ Idi kareb Pinihas Eliasar luk mupun Arun luk imam nenier nedidueh, idi ieh nudur rat arangdeh, idi nengalap busuneh.

⁸ Idi ieh iné' maya' puet didueh macing bang lepo sedeléi. Idi ieh nemayung nedidueh perapu. Idi kareb ineh idi ét lun Israil nugka'.

⁹ Iamo' amung lun luk naté ku ét ineh 24,000 burur.

¹⁰ Idi kebala Tuhan ni Musa,

¹¹ “Idi Pinihas ineh pangeh nengagka' usehKu nelun Israil. Ngaceku ieh pana' museh nedeh, pad Ui na ngaté nelun Israil maya' gatehKu.

¹² Ngaceku ineh do' mala neneh, ‘Ui maré pejani' ulun neneh:

¹³ Idi pejani' ini kuanneh idi kuan inulneh, idi ideh mangun ku imam macing ruked-ruked. Ngaceku ieh mepicet maya' Allah. Idi ieh nenganau' luk nguit pedo' kuan lun Israil.’ ”

¹⁴ Idi ngadan deléi lun Israil luk pinaté dengan decur Midian ineh, ieh ineh Simari Salu, ieh ineh aceh lun rayeh inul Simion.

¹⁵ Idi ngadan decur Midian luk pinaté ineh, Kosbi anak Sur, ieh ineh aceh lun rayeh pupu Midian.

¹⁶ Idi kebala Tuhan,

¹⁷ “Do' iko pebunu' nelun pupu Midian idi ngedereh idi ngaté nedeh.

¹⁸ Ngaceku ideh nengedereh nemuyuh, idi nenaluk nemuyuh déi' Pior, ngaceku ratnan lawé Kosbi, luk pinaté kareb ét luk mangun ngaceku akang Pior.”