IAP 24 - BALA LUK DO'

¹ Idi kareb Bilam nekali' idi Tuhan pian ngeperuan nelun Israil, idi na ieh iné' nakap tanu' kudeng lawéneh luk atun. Iamo' ieh nelumi nier su luk ali-ali ineh.

² Idi ieh nenier lepo lun Israil setau' maya' pupudeh. Idi Roh Allah netemurun ni Bilam.

³ Idi ieh nengimun mada', kebalaneh, “Ini bala Bilam anak Bior, Idi matehneh pangeh inukab.

⁴ Lalidneh ninger bala Allah. Ui nutong pad ui nier kudeng medapo aceh luk sinierku ratnan Allah luk Melalud.

⁵ Lepo lun Israil pelaba do' taga,

⁶ mepad kudeng raked luk rayeh, idi kabun luk tangeb abpa', mepad kudeng kayuh luk do' buen luk tinibu Tuhan, idi kayuh tumuh luk tangeb arur.

⁷ Idi abpa' lubpi ratnan luk ku ngook neneh, idi inulneh mulun su luk inan abpa' luk petap, idi raca'neh medita' rat ni Agag, idi imetneh mebala.

⁸ Idi Allah nenguit Israil remuat rat bawang Masir. UngaNeh mepad kudeng unga kerubau luk mesangit. Ideh kuman bunu'deh idi ngareg tulangdeh, idi busudeh pitulen.

⁹ Pupu ineh mepad kudeng balang luk mesangit. Kareb ieh rudap, na luk mekuu' ngalat neneh. Lemulun luk ngeperuan Israil miak uen ngeperuan idi lemulun luk ngediman Israil miak uen ngediman.”

¹⁰ Idi Balak pelaba useh ni Bilam idi ieh ticul-ticul neneh, kebalaneh, “Ui nenawar namu ngediman bunu'ku. Iamo' iko nengeperuan nedeh teluh kua'.

¹¹ Buro iko amé' su luk iratmu nekini. Setuneh ui ngerawé maré tabpar namu. Iamo' Tuhan na nima' namu ngalap tabpar ineh.”

¹² Idi kebala Bilam ni Balak, “Ui nemala kuan lun luk icukmu iné' negku,

¹³ ‘Kudeng ayuneh iko maré ruma'mu kuanku, panu' ku pirak idi amas pana', nateh ui miak ngelaba bala Tuhan idi nganau' luk do' idi luk dat maya' pian niatku sebuleng. Anun luk badén Tuhan ineh teh luk belénku.’ ”

Bada' Bilam Luk Kekiped

¹⁴ Kebala Bilam ni Balak, “Idi nekini ui lemubed amé' inan pupuku. Idi ui miak mada' namu ratnan luk ruen pupu ini kuan pupumu muci.”

¹⁵ Idi ieh nengimun mada' luk biré Allah, kebalaneh, “Ini bala Bilam anak Bior, idi matehneh pangeh inukab,

¹⁶ idi lalidneh ninger bala Allah, idi ngalap ileh ratnan Luk Meluun Dita'. Ui nutong pad ui nier kudeng medapo aceh luk sinierku ratnan Allah luk Melalud.

¹⁷ Ui nier luk mangun muci aco, idi ui nier pupu Israil. Sebuleng gituen macing rat ni Yakub, idi sebuleng rukud raca' rat ni Israil. Ieh miak ngareg lun rayeh Moab, idi amung lemulun pesingaro.

¹⁸ Edom luk bunu' Israil uenneh ngelaya', pad tana'deh lapenneh, idi Israil luk metueh.

¹⁹ Idi Israil miak ngaro bawangdeh, idi ngaté amungdeh luk ketecan.”

²⁰ Kareb Bilam nenier Amalek, idi ieh nengimun mada' luk biré Allah, kebalaneh, “Pun-pun pupu Amalek luk metueh, iamo' muci pupu ineh miak mabud.”

²¹ Kareb ieh nenier nelun Kain idi ieh nengimun mada' luk biré Allah, kebalaneh: “Su luk inan muyuh mudeng meraben, idi arar muyuh rireng luun batu,

²² idi bawang Kain miak sabpen, kareb Asur naban nemuyuh.”

²³ Idi ieh nengimun mada' teh, kebalaneh, “Idéké luk mepamung pa tinueh busat aco?

²⁴ Idi baweh maya' kapal rat bawang lun Kitim. Ideh ngelaya' nelun Asur idi Babil, idi ideh pana' miak maté.”

²⁵ Idi Bilam nuli' iné' ruma'neh, idi Balak pana' nuli' teh.