IAP 23 - BALA LUK DO'

Bada' Luk Pun-Pun Biré Allah Ni Bilam

¹ Idi kebala Bilam ni Balak, “Nganau' tudu' bubpun kuanku su ini, idi ngalap tudu' sapi' deléi idi tudu' amék deléi kuanku teh.

² Idi Balak nenganau' kudeng luk pian Bilam. Idi didueh nenganau' sebuleng sapi' idi sebuleng amék ineh luun anid-anid bubpun mangun ku baré luk sabpen.

³ Idi kebala Bilam ni Balak, “Do' iko tuped iring baré luk sabpenmu. Ui pian amé' luun su luk medita'. Kian Tuhan miak papu' negku lek. Idi anun-anun bala luk uenNeh ngegala' negku, ui miak mala namu.”

⁴ Idi Allah nepapu' ni Bilam. Idi kebala Bilam Neneh, “Ui pangeh nemudut tudu' bubpun. Idi luun anid-anid bubpun ineh pangeh ui nemaré sebuleng sapi' deléi idi sebuleng amék deléi.”

⁵ Idi Tuhan nenganau' balaNeh luun dila' Bilam idi kebala Tuhan, “Lemubed iko amé' ni Balak, idi mala kudeng ini.”

⁶ Idi ieh nelemubed iné' ni Balak. Idi Raca' Balak idi teh tuped iring baréneh idi amung lun rayeh Moab pana' idi denganneh.

⁷ Idi Bilam nengimun mada' bala luk biré Tuhan, kebalaneh, “Idi Balak raca' Moab ineh nenguit negku rat Aram, rat pegkung luk pa busat aco. Kebalaneh, ‘Amé' iko ngediman ni Yakub kuanku. Amé' iko maré nelun Israil uen ngedereh!’

⁸ Idi kudeng apehké ui ngediman nelun luk na kidiman Allah? Kudeng apehké ui ngedereh nelun luk na pidereh Tuhan?

⁹ Ngaceku rat luun buduk pegkung ui ngukum nedeh, idi rat luun surud ui nier nedeh. Ieh ineh aceh pupu luk tudo setau', luk na iniap arang lun pupu baken!

¹⁰ Idé miak ngiap inul Yakub, idi idéké miak kali' kinula' lun Israil? Nima' negku maté mepad kudeng até lun luk matu, idi kekipedku mepad kudeng ineh teh!”

¹¹ Idi kebala Balak ni Bilam, “Anunké luk ruenmu kuanku? Ui nenawar namu pad iko ngediman bunu'ku. Iamo' na luk inau'mu, iamo' iko ngeperuan nedeh.”

¹² Idi kebala Bilam neneh, “Naké ui petulu mada' bala luk inau' Tuhan nan dila'ku?”

Bada' Luk Kedueh Luk Biré Allah Ni Bilam

¹³ Idi kebala Balak ni Bilam, “Do' iko maya' negku amé' iléi teh. Rat ieneh iko miak nier sebuangdeh. Do' iko ngediman nedeh kuanku rat déi'.”

¹⁴ Idi ieh nenguit neneh iné' luun Natad Sopim luk luun Buduk Pisga. Idi ieh nemudut tudu' bubpun. Idi ieh nemaré aceh sapi' deléi idi sebuleng amék deléi luun anid-anid bubpun ineh.

¹⁵ Idi kebala Bilam ni Balak, “Tuped iko iring baré luk isebmu, laba' ui amé' papu' Tuhan déi'.”

¹⁶ Idi Tuhan nepapu' ni Bilam, idi Ieh nenganau' balaNeh nan dila'neh, kebalaNeh, “Lemubed iko amé' ni Balak, idi pebala kudeng ini.”

¹⁷ Idi ieh iné' matun ni Balak. Idi Raca' Balak tuped iring baréneh. Idi amung lun rayeh Moab pana' idi teh denganneh. Idi kebala Balak neneh, “Anunké bala Tuhan namu?”

¹⁸ Idi Bilam nengimun mada', kebalaneh: “Tuped iko, O Balak, anak Sipor, idi ninger balaku, O anak Sipor:

¹⁹ Allah na mebalih mepad kudeng lemulun, Idi na nginuud mepad kudeng anak lemulun; balaNeh matu idi miak uen ngacing.

²⁰ Ui pangeh icuk maré peruan. Kudeng Ieh maré peruan, Ui na miak ngisu' ineh.

²¹ Ui nier Israil muci aco, na luk idi dereh idi susa'. Tuhan Allahdeh idi dengandeh, ideh ngamo Neneh raca'deh.

²² Allah nenguit nedeh rat bawang Masir. UngaNeh mepad kudeng unga kerubau luk mesangit.

²³ Na luk idi bangun luk metueh rat ni Yakub. Idi na luk idi limu' luk metueh rat nelun Israil. Idi nekini Allah miak buren, ngaceku luk inau'Neh kuan Israil.

²⁴ Idi pupu Israil mepad kudeng balang luk mesangit, luk na luku kareb nateh ieh nekuman luk ilapneh, idi kareb nateh nengirup dara' anun-anun luk pinaténeh.”

²⁵ Idi kebala Balak ni Bilam, “Kudeng iko na tu-tu miak ngediman nedeh, idi aleg iko ngeperuan nedeh!”

²⁶ Idi kebala Bilam ni Balak, “Naké ui nemada' namu, amung luk belén Tuhan, ineh mo' luk miak belénku?”

Bada' Luk Keteluh Luk Biré Allah Ni Bilam

²⁷ Kebala Balak ni Bilam, “Maya' negku amé' su luk iléi teh. Kian, Allah nima' namu ngediman pupu ineh kuanku su ineh lek.”

²⁸ Idi Balak nenguit ni Bilam iné' luun Buduk Pior luk muneng ku su luk ali-ali.

²⁹ Idi kebala Bilam ni Balak, “Nganau' tudu' bubpun kuanku su ini, idi maré negku tudu' sapi' deléi idi tudu' dumba deléi teh.”

³⁰ Idi Balak nenganau' maya' kudeng luk bila Bilam. Idi ieh nemaré sebuleng sapi' deléi idi sebuleng amék deléi luun anid-anid bubpun ineh mangun ku baré luk sabpen.