IAP 22 - BALA LUK DO'

Raca' Balak Neteng Ni Bilam

¹ Idi lun Israil nenalan, idi ideh nelupo luun raked Moab luk pa busat aco Abpa' Yarden luk petutup ku Yeriko.

² Kareb Balak Sipor nenier amung luk inau' lun Israil kuan lun Amori,

³ idi lun Moab pelaba tot nelun Israil, ngaceku ideh pelaba ula'.

⁴ Kebala lun Moab kuan amung lun rayeh-rayeh déi' Midian, “Idi nekini pupu ini pian kuman amung luk pekelibut nekai, mepad kudeng sapi' luk kuman amung uduh luk mebata'i natad.” Idi kareb ineh Balak Sipor raca' lun Moab,

⁵ nengecuk nelun amé' nawar ni Bilam Bior déi' Petor, luk i tangeb Abpa' Pirat déi' bawang Amau. Idi kebaladeh neneh, “Kebala Balak, ‘Inan aceh pupu luk nacing rat bawang Masir luk pelaba ula' idi ideh nelupo iringku.

⁶ Idi nekini do' iko amé' idi ngediman pupu ini kuanku. Ngaceku ideh meluun tueh rat negku, pad ui miak ngelaya' nedeh idi ngusu nedeh rat bang bawang ini. Ngaceku ui kali' luk inau'mu. Idé-idé luk uenmu ngeperuan miak ngalap peruan idi idé-idé luk uenmu ngediman miak uen ngediman.’ ”

⁷ Idi amung lun rayeh Moab idi lun rayeh Midian pana' iné'. Idi usin luk ku tabpar lun luk ngelimu' idi bang paladdeh. Idi ideh nacing ni Bilam, idi nemada' amung bala Balak kuanneh.

⁸ Idi kebala Bilam nedeh, “Rudap muyuh malem sini ieni, pad ui miak mada' nemuyuh bala luk belén Tuhan negku.” Idi lun rayeh Moab pana' nerudap déi' ruma' Bilam.

⁹ Idi Allah iné' ni Bilam, kebalaNeh, “Idéké amung deléi luk denganmu?”

¹⁰ Idi kebala Bilam inan Allah, “Balak Sipor, raca' Moab pangeh nengecuk lun dukenneh amé' matun negku. Idi kebaladeh negku,

¹¹ ‘Inan ach pupu luk nacing rat bawang Masir luk pelaba ula'. Idi nekini amé' iko ngediman pupu ini kuanku, pad ui miak pebunu' idi ngusu nedeh.’ ”

¹² Idi kebala Allah ni Bilam, “Aleg iko amé' maya' nedeh. Aleg iko ngediman pupu ineh. Ngaceku ideh miak uen ngeperuan.”

¹³ Idi pekak uka-uka Bilam netumui, idi nepebala kuan lun rayeh Balak, “Lemubed muyuh amé' bawang muyuh, ngaceku Tuhan na maré negku maya' nemuyuh.”

¹⁴ Idi ideh nelemubed iné' ni Balak, kebaladeh, “Ara' Bilam amé' maya' nekai.”

¹⁵ Idi Balak nengecuk tuda'-tuda' lun rayeh luk mileh iné' neneh baruh teh.

¹⁶ Idi ideh nacing ni Bilam, kebaladeh neneh, “Kudeng ini bala Balak, ‘Aleg iko merapang amé' maya' nekai.

¹⁷ Ngaceku ui pian ngubur namu, idi anun-anun pana' luk dukenmu negku, ui miak nganau'. Amé' iko idi ngediman pupu ini kuanku.’ ”

¹⁸ Iamo' kebala Bilam kuan lun luk icuk Balak ineh, “Kudeng ayuneh Balak maré ruma'neh kuanku panu' ku pirak idi amas pana', nateh ui miak ngelaba bala Tuhan Allahku, idi na miak nganau' luk meluun idi luk na petap.

¹⁹ Iamo' nekini do' muyuh rudap ieni malem sini teh, pad ui kali' anun bala Tuhan kuanku.”

²⁰ Idi bang alem sineh teh idi Allah iné' matun Bilam, idi kebalaNeh neneh, “Ngaceku ideh ineh nacing, amé' ngalap namu, do' iko amé' maya' nedeh. Iamo' anun luk belénKu namu na miak na iko maya'.”

Melaikat Idi Keladai Bilam

²¹ Idi kareb pekak uka-uka idi Bilam nekulat. Idi ieh nenganau' luk inan tudo luun keted keladaineh. Idi ieh iné' maya' nelun rayeh Moab ineh.

²² Iamo' Allah pelaba useh kareb ieh nalan. Idi Melaikat Tuhan tuped iring dalan pian ngesabeng neneh. Idi Bilam maya' keladaineh. Idi dueh burur demulunneh pebaya' neneh.

²³ Idi keladai ineh nenier Melaikat Tuhan luk ngimet pelapet luk metadem tuped uned dalan. Idi keladai ineh numai ratnan dalan idi maya' nan pulung. Idi Bilam nenecat keladai ineh nganau' neneh lemubed amé' nan dalan rayeh teh.

²⁴ Iamo' Melaikat Tuhan ineh netuped uned dalan su luk mesip arang kabun anggur, idi pekop dalan ineh inan libung luk meraben.

²⁵ Idi kareb keladai ineh nenier Melaikat Tuhan, idi ieh iné' muneng ku libung ineh. Idi kukud Bilam neperitek luun libung ineh. Idi ieh nenecat keladaineh sekua' teh.

²⁶ Idi Melaikat Tuhan iné' pa atun idi netuped su luk mesip, pad na luk inan umai amé' pa kabing idi amé' pa tinueh.

²⁷ Idi kareb keladai ineh nenier Melaikat Tuhan, idi ieh neluku. Idi Bilam pelaba gateh. Idi ieh nenecat keladai ineh ku kayuh.

²⁸ Idi kareb ineh Tuhan nengukab tang keladai ineh, idi ieh nepebala ni Bilam, “Anunké sala'ku namu, idi iko necat negku teluh kua'?”

²⁹ Idi kebala Bilam inan keladai ineh, “Ngaceku iko nguto negku, kudeng ui inan pelapet kali' rungen iko pitayenku.”

³⁰ Idi keladai nengor bala Bilam, “Bakenké ui ini keladaimu? Bakenké iko nemaya' negku rat mon macing nekini? Pangehké ui nenganau' luk kudeng ini kuanmu atun?” Idi kebala Bilam, “Na.”

³¹ Idi kareb ineh Tuhan nengukab mateh Bilam. Idi ieh nenier Melaikat Tuhan luk tuped uned dalan idi ngimet pelapet luk metadem. Idi ieh netemurun, idi netekeradung.

³² Idi kebala Melaikat Tuhan neneh, “Ngudehké iko nenecat keladaimu macing teluh kua'? Ui pangeh nacing pian ngesabeng namu, ngaceku dalan luk ulekmu ini dat.

³³ Kareb keladai ineh pangeh nenier Negku, ieh numai nelemaba Negku teluh kua'. Idi kudeng ieh na numai rat Negku, kali' rungen iko pinatéKu. Idi keladai ineh uenKu ngulun.”

³⁴ Idi kebala Bilam kuan Melaikat Tuhan, “Ui pangeh mesala', ngaceku ui na kali' Namu tuped uned dalan ini, pian ngesabeng negku. Idi kudeng ulek dalan ini dat kali'Mu, miak ui muli'.”

³⁵ Idi kebala Melaikat Tuhan ni Bilam, “Amé' iko maya' nedeh. Iamo' bala luk belénKu namu, ineh mo' luk miak belénmu.” Idi Bilam iné' maya' nelun rayeh Balak ineh.

Bilam Idi Balak

³⁶ Kareb Balak nekali' ni Bilam macing, idi ieh iné' papu' neneh déi' bawang Moab luk tangeh Abpa Arnon, ieh ineh lakan tana' luk pa tinueh busat aco.

³⁷ Idi kebala Balak ni Bilam, “Ngudehké iko na iné' maya' nedeh luk icukku nawar namu atun di? Naké mebayarku tabparmu?”

³⁸ Idi kebala Bilam ni Balak, “Nekini ui iné' namu. Iamo' ui na miak pebala anun-anun dengan laludku sebuleng. Iamo' bala luk badén Tuhan mo' luk miak belénku.”

³⁹ Idi Bilam iné' maya' ni Balak. Idi didueh nacing déi' bawang Husot.

⁴⁰ Idi Balak nengeret tuda'-tuda' sapi' idi dumba mangun ku aceh baréneh, idi nemaré sebuang ni Bilam idi amung lun rayeh luk maya' neneh.

⁴¹ Kenebpa idi Balak nenguit ni Bilam, idi iné' luun Pegkung Bamot Baal. Rat su ineh ieh nenier amung pupu ineh.