IAP 21 - BALA LUK DO'

Lun Israil Metueh Rat Nelun Kanaani

¹ Kareb Arad raca' lun Kanaani luk tudo déi' Negeb, neninger bala lun Israil macing maya' dalan Atarim, idi ieh nepebunu' nedeh, idi nenaban tuda'-tuda' rat arangdeh.

² Idi lun Israil nepejani' inan Tuhan, kebaladeh, “Kudeng Tuhan maré pupu ini bang palad kai, idi kai miak ngusag amung bawangdeh.”

³ Idi Tuhan nengamo putuh lun Israil, idi Ieh nemaré lun Kanaani ineh kuandeh. Idi ideh nengaté nedeh idi nengusag bawangdeh. Idi ideh neneten su ineh Tabpa.

Seruang Luk Inau' Ratnan Tekaling

⁴ Idi lun Israil nenalan rat Pegkung Hor maya' dalan amé' Abpa' Pisui idi nengelibut bawang Edom. Iamo' ideh mét niat maya' dalan ineh.

⁵ Idi kebaladeh inan Allah idi ni Musa, “Ngudehké medueh nguit nekai remuat rat bang bawang Masir, pad kai maté tungé' su luk ali-ali ini. Ngaceku su ini ruti pana' na, abpa' pana' na. Idi kai mesukol ku akan luk dat ini.”

⁶ Idi kareb ineh Tuhan nengecuk tuda'-tuda' seruang nenicuk nedeh, pad mula' lun Israil naté.

⁷ Idi ideh iné' matun ni Musa, kebaladeh, “Kai pangeh nenganau' sala' ngaceku ngedureng-ngedureng inan Tuhan idi namu teh. Do' sembayang mutuh Tuhan pad seruang ini buro rat nekai.” Idi Musa nesembayang kuandeh.

⁸ Kebala Tuhan ni Musa, “Do' iko mudut aceh seruang ratnan tekaling. Nganau' neneh paped aceh kayuh luk mekadang. Idé-idé luk tinicuk, idi nier ineh, ieh miak mulun.”

⁹ Idi Musa nemudut aceh seruang ratnan tekaling idi ieh nenganau' ineh luun paped kayuh luk mekadang. Idi idé luk tinicuk seruang, idi nenier seruang tekaling ineh, idi ieh mulun.

Lun Israil Nalan Amé' Raked Moab

¹⁰ Lun Israil nenalan rat ieneh, idi ideh nelupo déi' Obot.

¹¹ Idi ideh nenalan rat Obot. Idi ideh nelupo déi' Yabarim déi' su luk ali-ali petutup bawang Moab pa busat aco.

¹² Idi ideh nenalan rat ieneh idi ideh nelupo muneng ku Arur Sered.

¹³ Idi ideh nenalan rat ieneh, idi ideh nelupo par selipa Abpa' Arnon su luk mali muneng ku lakan bawang lun Amori, ngaceku Arnon ineh lakan bawang Moab idi Amori.

¹⁴ Ini punneh pangeh bida' bang Surat Bunu' Tuhan, ratnan “Waheb déi' Supa idi Abpa' Arnon

¹⁵ dengan tana' luk mirang, luk amé' matun raked bawang Ar, muneng ku lakan bawang Moab.”

¹⁶ Idi rat ieneh ideh nenalan iné' Bir, ieh ineh subuk luk inan Tuhan nepebala ni Musa, “Ngamung lun mula' ineh, idi Ui miak maré abpa' rupendeh.”

¹⁷ Idi kareb ineh lun Israil menani kudeng ini: “Kemubul muyuh, O bued abpa'. Do' menani ngubur abpa' ineh!

¹⁸ Ieh ineh subuk luk inukat lun rayeh-rayeh, idi lun luk mebala rat arang lun mula', ku rukud lun luk nguyut idi rukud raca'.” Idi rat su luk ali-ali ini ideh nenalan iné' Matana,

¹⁹ idi rat Matana iné' Naliel, idi rat Naliel iné' Bamot,

²⁰ idi rat Bamot iné' Ruan Moab muneng ku buduk Pegkung Pisga luk muneng ku su luk ali-ali.

Israil Metueh Ratnan Raca' Sihon

²¹ Idi lun Israil nengecuk tuda'-tuda' burur lun duken amé' matun Sihon, raca' lun Amori, idi kebaladeh neneh,

²² “Nima' nekai lemaba bawangmu. Idi na kai umai luun lati' muyuh idi bang kabun anggur muyuh. Idi abpa' subuk muyuh na kai ngirup. Iamo' dalan rayeh luk bén kai, pad kai lemaba lakan tana'mu.”

²³ Iamo' Sihon na nenima' nelun Israil lemaba bawangneh. Iamo' ieh nengamung amung anak itinneh, idi ideh iné' matun nelun Israil déi' Yahas su luk ali-ali, idi nepebunu' nedeh.

²⁴ Iamo' lun Israil nengelaya' nedeh pad mula' lun naté. Idi ideh nengalap bawangdeh rat Arnon macing déi' Yabuk, idi bawang lun Amon. Ngaceku lakan Yahas ineh lakan bawang lun Amon.

²⁵ Idi lun Israil nengalap amung bawang ineh idi netudo bang amung bawang lun Amori, ieh ineh Hesbon idi amung babpatneh.

²⁶ Idi Hesbon, ieh ineh bawang Sihon, raca' lun Amori luk nengelaya' raca' lun Moab idi nengalap amung bawangneh macing Arnon.

²⁷ Idi ngaceku ineh buri' lun luk nganau' buek, “Do' tau amé' Hesbon, idi nier bawang Sihon luk pinudut baruh.

²⁸ Idi apui mebudung rat Hesbon, ieh ineh bawang Sihon. Ieh ngeseb Ar, ieh ineh bawang lun Moab, luk kuan surud-surud Arnon.

²⁹ Mesusa' kuan muyuh, O Moab! Muyuh pangeh linaya', O pupu luk sembayang nan Kamus! Kamus nenganau' anak deléineh mangun ku lun neburo, idi anakneh luk decur lun tiban kuan Sihon, raca' lun Amori.

³⁰ Rat Hesbon macing Dibon ideh nabud pinaté kai, ieh ineh rat Nasim macing Nopa, muneng ku Medéba.”

³¹ Idi lun Israil netudo bang bawang lun Amori.

³² Idi Musa nengecuk nelun amé' nier bawang Yahas. Idi ideh nengalap amung bawang luk isuut, idi nengusu lun Amori luk tudo ieneh.

³³ Idi ideh nelemubed maya' dalan amé' Busan. Idi Og, raca' Basan dengan amung anak itinneh iné' pebunu' nedeh déi' Edri.

³⁴ Kebala Tuhan ni Musa, “Aleg iko matot neneh, ngaceku Ui maré neneh dengan anak itinneh idi bawangneh bang paladmu, idi iko miak nganau' kuanneh mepad kudeng luk inau'mu kuan Sihon, raca' lun Amori, luk tudo déi' Hesbon.”

³⁵ Idi lun Israil nengaté ni Og idi anakneh idi amung anak itinneh, pad sebuleng pana' nateh luk ketecan. Idi ideh nengalap bawangneh.