IAP 20 - BALA LUK DO'

Luk Mangun Déi' Kadis

¹ Idi amung lun Israil nacing su luk ali-ali déi' Sin bang bulan aceh. Idi ideh tudo déi' Kadis. Idi su ineh Miriam naté. Idi su ineh teh ieh tinanem.

² Idi su ineh na abpa' kuandeh, idi ideh nengedureng idi nepamung sikal ngedat ni Musa idi Arun.

³ Kebaladeh ni Musa, “Do' kudeng kai pangeh naté arang kinanak kai kareb ideh naté pa kiung Tuhan.

⁴ Ngudehké iko nguit pupu Tuhan amé' su luk ali-ali ini, pad kai maté su ini, dengan aya' kai pana'?

⁵ Ngudehké iko ngecuk nekai nalan rat bawang Masir, idi nguit nekai amé' inan tana' luk dat ini? Idi baken su ini luk inan padé mulun idi gita' idi anggur idi bua' delima pana'. Macing ku abpa' rupen pana' nateh luk idi.

⁶ Idi Musa didueh Arun nenalan rat pa kiung lun mula' iné' i tanga' Lepo su luk inan papu' Tuhan. Idi didueh netekeradung, idi rasat Allah sinier didueh.”

⁷ Kebala Tuhan ni Musa,

⁸ “Ngalap rukud ineh idi ngamung lun mula', idi do' iko idi Arun pebala kuan batu luk pa kiungdeh ineh. Idi batu ineh miak ngeruat abpa'. Idi iko miak maré apba' kuandeh ratnan batu ineh. Idi iko miak maré lun mula' ineh ngirup, idi amung aya'deh teh.”

⁹ Idi Musa nengalap rukud ineh rat pa kiung Tuhan, maya' kudeng luk icuk Tuhan.

¹⁰ Idi Musa didueh Arun nengamung nelun mula' ineh iring batu ineh. Idi didueh nepebala nedeh, “O muyuh luk sikal metueh, do' ninger. Miakké kai dueh ngeruat abpa' kuan muyuh ratnan batu ini?”

¹¹ Idi Musa nenecat batu ineh ku rukudneh dueh kua'. Idi abpa' neremuat pelaba ula', pad lun mula' ineh nengirup idi amung aya'deh teh.

Musa Idi Arun Na Miak Semuet Bang Bawang Kanaan

¹² Kebala Tuhan ni Musa idi Arun, “Medueh na miak nguit lun mula' ini semuet bang bawang luk pangeh biréKu nedeh, ngaceku medueh na manu Negku idi na nengerayeh liganKu pa kiung lun Israil.”

¹³ Idi ini Abpa' Meriba su luk inan lun Israil ngedureng-ngedureng inan Tuhan, idi Tuhan pana' nengegala' liganNeh kuandeh.

Lun Edom Na Nima' Nelun Israil Lemaba Bawangdeh

¹⁴ Idi Musa nengecuk tuda'-tuda' lun duken amé' matun raca' Edom rat Kadis, idi kebaladeh neneh, ‘Kebala kinanakmu lun Israil kudeng ini, “Iko kali' amung susa' luk pangeh nangun nekai,

¹⁵ kudeng apeh tepun kai iné' rat bawang Masir idi kai tudo déi' Masir tuda'-tuda' lak kinioneh, idi lun Masir nengedereh nekai idi tepun kai.

¹⁶ Idi kareb kai nengitang nawar Tuhan idi Tuhan pana' neninger tawar kai. Idi Ieh nengecuk aceh melaikat luk nenguit nekai remuat rat bang bawang Masir. Idi nekini kai tungé' Kadis, aceh bawang luk iring lakan tana'mu.

¹⁷ Nima' nekai lemaba bawangmu. Idi na kai umai luun lati' muyuh, idi bang kabun anggur muyuh. Idi abpa' subuk muyuh na kai ngirup. Iamo' dalan rayeh luk bén kai. Idi na kai umai amé' pa kabing idi pa tinueh pad kai lemaba lakan tana'mu.”

¹⁸ Iamo' kebala lun Edom nedeh, “Muyuh na miak lemaba bawang kai, pad kai na ngaté nemuyuh.”

¹⁹ Idi kebala lun Israil, “Kai miak nalan maya' dalan rayeh. Kudeng kai idi aya' kai ngirup abpa' muyuh kali' rungen kai maré raganeh. Nima' nekai nalan kukud lemaba bawang muyuh. Kudeng ini luk pian kai.”

²⁰ Iamo' lun Edom nengor baladeh, “Muyuh na miak lemaba bawang ini.” Idi raca' Edom neremuat iné' matun nedeh dengan bawehneh luk mula'.

²¹ Kudeng ini dalan raca' Edom nemebpeng nelun Israil na lemaba bawangneh. Ngaceku ineh lun Israil numai maya' dalan baken.

Até Arun

²² Idi lun Israil nenalan rat Kadis idi nacing déi' Pegkung Hor, ieh ineh lakan bawang Edom.

²³ Idi kebala Tuhan ni Musa idi Arun,

²⁴ “Idi Arun miak maté', ngaceku na ieh miak semuet bang bawang luk pangeh biréKu kuan lun Israil. Ngaceku medueh pangeh nengelaba balaKu déi' Abpa' Meriba.

²⁵ Do' iko nguit ni Arun idi Eliasar anakneh amé' luun Pegkung Hor.

²⁶ Idi ngelengu ayung Arun idi maré neneh ni Eliasar. Ngaceku Arun miak maté su ineh.”

²⁷ Idi Musa nenganau' luk icuk Tuhan. Idi diteluh iné' luun Pegkung Hor pa kiung amung lun Israil ineh.

²⁸ Idi Musa nengelengu ayung Arun, idi biréneh ni Eliasar. Idi Arun naté luun pegkung ineh. Idi Musa idi Eliasar nelemubed ratnan pegkung ineh.

²⁹ Kareb amung lun Israil nekali' ni Arun pangeh naté, idi amung lun Israil netemido neneh teluh ngepulu' aco kinioneh.