IAP 19 - BALA LUK DO'

Abuh Sapi' Luk Mesia'

¹ Kebala Tuhan ni Musa idi Arun teh,

² “Ngecuk nelun Israil nguit sebuleng sapi' tineh luk mesia' idi luk do', amé' namu, idi luk nateh nengeruid kayuh.

³ Idi do' iko maré neneh ni Eliasar luk imam, idi ieh miak nguit neneh remuat rat su luk inan nelupo, pad ieh kereten pa kiungneh.

⁴ Idi do' Eliasar luk imam ngalap sebuang dara'neh ku bua' ticu'neh. Idi ieh ngisak sebuang dara' ineh pa atun Lepo su luk inan papu' Tuhan tudu' kua'.

⁵ Idi do' sapi' ineh sabpen siren Eliasar, ieh ineh kubilneh, uangneh, dara'neh, idi tinéi'neh.

⁶ Idi do' imam ngalap kayuh tumuh, likudung, idi nuper mesia', idi petenneh luun uned apui luk inan ngeseb sapi' ineh.

⁷ Idi do' ieh diu' idi mupu' ayungneh, idi pangeh ineh ieh miak muli' amé' su luk inan nelupo. Idi imam ineh mangun ku gani' macing aco macep.

⁸ Idi do' lun luk ngeseb sapi' ineh pana' diu' idi mupu' ayungneh, idi ieh pana' mangun ku gani' macing aco macep.

⁹ Idi do' lemulun luk meligan ngamung abuh sapi' ineh, idi ngerareng neneh petatang rat su luk inan nelupo bang su luk malét. Idi abuh ineh nugen kuan lun Israil, idi ruendeh bang abpa' luk ku maru' nedeh ratnan sala'. Ngaceku sapi' ineh aceh baré ngaceku sala'.

¹⁰ Idi lemulun luk nengamung abuh sapi' ineh, do' ieh mupu' ayungneh, idi ieh pana' mangun ku gani' macing aco macep. Idi ini aceh dalan luk meruked kuan amung lun Israil idi kuan amung lun sakai luk tudo arang muyuh.

Ratnan Lun Luk Ngakem Butung Lemulun

¹¹ “Idé-idé luk ngakem butung lemulun, idi ieh mangun ku gani' tudu' aco kinioneh.

¹² Idi do' ieh baruin ku abpa' ineh kareb aco luk keteluh idi aco luk ketudu', pad ieh meligan. Iamo' kudeng ieh na uen ngiu' ku abpa' ineh kareb aco luk keteluh idi aco luk ketudu', na ieh meligan.

¹³ Idé-idé luk ngakem butung lemulun idi ieh na diniu', idi ieh luk ngelutak Lepo su luk inan papu' Tuhan. Idi ieh miak duken buro rat arang lun Israil, ngaceku abpa' luk ku maru' neneh ratnan sala' na inisak luunneh. Idi ieh mangun ku gani'. Idi lutakneh na buro rat neneh.

¹⁴ “Idi ini dalanneh kudeng aceh lun maté bang aceh lepo, idé-idé luk semuet bang lepo ineh, idi idé-idé luk bang ineh, ieh ineh mangun ku gani' tudu' aco kinioneh.

¹⁵ Idi amung repapeh luk mukab luk na kakeb, idi ieh ineh ku gani'.

¹⁶ Idi idé-idé luk ngakem lun luk pinaté, idi luk pangeh naté ku ét déi' liang, idi teh tulang butung lemulun, idi tanem, ieh ineh pana' mangun ku gani' tudu' aco kinioneh.

¹⁷ “Idi ideh luk ku gani' ineh, do' ideh ngalap abuh ratnan sapi' luk biré ngaceku sala' luk pangeh iseb ineh, idi ngutang abpa' metaro luun abuh ineh bang sebuleng kuden.

¹⁸ Idi do' aceh lun luk meligan ngalap likudung idi ngarereb neneh bang abpa' ineh, idi ngisak ineh luun lepo, idi luun amung repapeh luk bang lepo ineh, idi luun amung lun luk bang ineh, idi luun lemulun luk pangeh nengakem tulang butung lun luk pinaté, lun luk naté ku ét, idi tanem pana'.

¹⁹ Idi do' lun luk meligan ineh ngisak abpa' ineh luun lemulun luk ku gani' ineh kareb aco luk keteluh idi aco luk ketudu'. Idi kareb aco luk ketudu' idi ieh miak ngeligan neneh ratnan sala'neh. Iamo' ieh diu' idi mupu' ayungneh atun. Idi kareb aco macep ieh meligan peh.

²⁰ “Iamo' lun luk ku gani' luk na diniu' ratnan sala' miak duken buro rat uned tebubpun ineh. Ngaceku ieh nengelutak Lepo su luk inan papu' Tuhan. Ngaceku abpa' luk ku maru' neneh ratnan sala' na inisak luunneh. Idi ieh ku gani'.

²¹ Idi ini mangun ku aceh dalan luk meruked kuandeh. Idi do' lun luk pangeh nengisit abpa' luk ku maru' sala' ineh mupu' ayungneh, idi idé-idé luk neketukan abpa' ineh, ieh pana' mangun ku gani' macing aco macep.

²² Idi anun-anun pana' luk kamen lun luk ku gani' ineh, ieh ineh mangun ku gani'. Idi idé-idé luk nengakem ineh teh, ieh pana' mangun ku gani' macing aco macep.”