IAP 18 - BALA LUK DO'

Kekamen Imam Idi Lun Liwi

¹ Kebala Tuhan ni Arun, “Iko idi anak-anakmu idi amung lun bang tetek ruma'mu pana' mabeh sala' luk mangun bang Lepo su luk inan papu' Tuhan. Iko idi anak-anakmu pana' mabeh sala' luk mangun kareb muyuh nganau' kekamen imam.

² Idi do' iko ngecuk amung kinanakmu, ieh ineh inul Liwi, amé' denganmu idi ngedengan namu idi anak-anakmu pa atun Lepo su luk inan papu' Tuhan.

³ Idi do' ideh ngedengan namu idi nganau' amung luk ruen bang Lepo ineh. Iamo' aleg ideh amé' muneng ku repapeh Su luk Meligan idi bubpun, pad ideh na maté idi iko pana'.

⁴ Iamo' ideh miak ngedengan namu idi nganau' amung luk ruen bang Lepo ineh. Idi lun baken na miak amé' muneng namu.

⁵ Idi muyuh miak nganau' amung luk ruen bang Su luk Meligan idi ngasa' bubpun, pad usehKu na macing kuan lun Israil.

⁶ Idi Ui pangeh nengalap kinanakmu lun Liwi rat arang lun Israil, mangun ku aceh baré kuanmu, idi kuanKu, pad ideh nganau' amung luk ruen bang Lepo su luk inan papu' Tuhan.

⁷ Iamo' do' iko idi anak-anakmu pana' ngakem kekamen imam, ieh ineh ngasa' bubpun idi amung luk bang Su luk Meluun Ligan. Idi do' muyuh nganau' kekamen imam luk biréKu nemuyuh. Idi kudeng inan luk baken amé' muneng, ieh miak pitayen.”

Babpat Imam-Imam

⁸ Kebala Tuhan ni Arun, “Ui pangeh nemaré namu ngimet amung baréKu, ieh ineh amung baré lun Israil luk meligan, mangun ku aceh babpat kuanmu idi kuan anak-anakmu macing ruked-ruked.

⁹ Idi ratnan amung barédeh luk meligan luk sabpen, ineh luk mangun ku babpatmu idi babpat anak-anakmu: ieh ineh amung baré akan, barédeh ngaceku sala', idi barédeh luk pingetap, luk miak baréndeh kuanKu.

¹⁰ Do' amung deléi luk arang muyuh kuman babpat luk meligan ineh maya' dalan luk petulu.

¹¹ “Idi ini pana' mangun ku babpatmu, ieh ineh amung baré luk tidulen lun Israil pangeh biréKu namu idi kuan anak-anakmu luk deléi idi decur teh, mangun ku babpat macing ruked-ruked. Idé luk meligan bang ruma' muyuh miak ideh kuman ineh.

¹² “Amung umau, bua' anggur, idi padé luk meluun do', ieh ineh amung babpat luk meluun do' luk baréndeh kuanKu, barénKu nemuyuh.

¹³ Idi amung bua' luk melak atun luk bang bawangdeh, luk baréndeh kuanKu, miak kuan muyuh. Idé luk meligan bang ruma' muyuh miak ideh kuman ineh.

¹⁴ “Amung-amung luk barén lun Israil kuan Allah, ieh ineh miak kuan muyuh.

¹⁵ “Amung anak luk atun, ratnan lemulun idi aya'deh luk baréndeh Negku, miak kuan muyuh. Iamo' do' muyuh nguli' ineh.

¹⁶ Idi uli'deh luk ulun sebulan, ieh ineh limeh balad pirak maya' balad pirak Su luk Meligan.

¹⁷ Iamo' aleg muyuh nguli' anak sapi' luk atun, dumba, idi amék pana', ngaceku ideh meligan. Idi do' ngisak dara'deh luun bubpun. Idi do' iko ngeseb lemakdeh mangun ku aceh buen luk do' kuan Tuhan.

¹⁸ Idi uangdeh kuan muyuh, dengan ruuk, idi tipan pa tinueh, ku baré luk tidulen.

¹⁹ “Idi amung baré luk iten lun Israil kuan Tuhan, barénKu kuanmu idi kuan anak-anakmu luk deléi idi decur ku aceh dalan luk meruked. Ieh ineh aceh pejani' tucu' luk meruked kuanmu idi kuan anakmu pa kiung Tuhan.”

²⁰ Kebala Tuhan ni Arun, “Na iko miak ngalap babpat tana' arangdeh idi sebuleng babpat anun-anun pana' nateh apenmu, ngaceku Ui ini luk babpatmu arang lun Israil.

Babpat Lun Liwi

²¹ “Idi kuan lun Liwi Ui pangeh nemaré amung babpat pulu' lun Israil ku babpatdeh, ku libal kekamendeh bang Lepo su luk inan papu' Tuhan.

²² Idi ngaceku ineh aleg lun Israil amé' muneng ku Lepo ineh, pad ideh na mabeh sala' idi maté.

²³ Iamo' lun Liwi, luk miak ngakem bang Lepo ineh, idi nganau' amung kekamenneh. Idi ini aceh ukum luk meruked macing ku inul muyuh. Iamo' lun Liwi na miak ngalap babpat tana' arang lun Israil.

²⁴ Idi amung babpat pulu' lun Israil luk miak baréndeh kuan Tuhan, ieh ineh pangeh biréKu nelun Liwi ku babpatdeh. Idi ngaceku ineh Ui pangeh nemala nedeh, ideh na miak ngalap babpat arang lun Israil.”

Babpat Pulu'

²⁵ Kebala Tuhan ni Musa,

²⁶ “Do' iko mada' ini kuan amung lun Liwi, ‘Kareb muyuh ngalap babpat pulu' ineh rat nelun Israil mangun ku babpat muyuh, do' muyuh pana' maré babpat pulu' ratnan babpat pulu' luk ilap muyuh ineh kuan Tuhan.

²⁷ Idi baré muyuh ineh miak iapin mepad kudeng padé luk rinik, idi mepad kudeng abpa' anggur luk lubpi rat bang su luk inan merek.

²⁸ Idi kudeng ineh teh do' muyuh nguit aceh baré kuan Tuhan ratnan amung babpat pulu' muyuh luk ilap muyuh rat nelun Israil. Idi ratnan baré ineh, do' muyuh maré kuan Arun luk imam.

²⁹ Idi ratnan amung baré luk ilap muyuh do' muyuh maré luk petulu kuan Tuhan, ieh ineh luk meluun do' ratnan anid-anid baré luk ilap muyuh.

³⁰ Kareb muyuh pangeh nemaré luk meluun do' ratnan baré ineh, idi luk ketecan miak kuan muyuh lun Liwi mepad kudeng ula' padé luk rinik idi bua' anggur luk pirek.

³¹ Idi muyuh dengan uang tetek ruma' muyuh miak kuman ineh iapeh-iapeh pana', ngaceku ini babpat muyuh luk ngakem bang Lepo ineh.

³² Idi na ini mangun ku sala' kuan muyuh kudeng muyuh maré luk meluun do' kuan Tuhan. Idi aleg muyuh sala' pakai baré lun Israil luk meligan, pad muyuh na maté.’ ”