IAP 17 - BALA LUK DO'

Rukud Arun

¹ Kebala Tuhan ni Musa,

² “Do' ngecuk nelun Israil maré sebuleng rukud rat anid-anid pupudeh, ieh ineh ratnan anid-anid lun rayehdeh luk pulu' dueh burur ineh. Idi ngayud ngadandeh nan rukuddeh.

³ Idi do' ngayud ngadan Arun nan rukud Liwi. Ngaceku anid-anid lun rayeh pupudeh inan sebuleng rukud.

⁴ Idi do' iko ngerareng ineh bang Lepo su luk inan papu' Tuhan, pa atun Pati' Pejani' su luk inanKu papu' nemuyuh.

⁵ Idi rukud lun luk pinili'Ku ineh miak nginulih. Ratnan luk kudeng ineh Ui miak ngagka' dureng amung lun Israil ngaceku medueh.”

⁶ Idi Musa nepebala kuan amung lun Israil. Idi amung lun rayehdeh nemaré rukuddeh neneh, ieh ineh ratnan anid-anid lun rayehdeh luk pulu' dueh pupu ineh. Idi rukud Arun pana' idi teh arang amung rukud ineh.

⁷ Idi Musa nengerareng amung rukud ineh pa kiung Tuhan, bang Lepo su luk inan papu' Tuhan.

⁸ Idi kenebpa Musa iné' bang Lepo ineh, idi rukud Arun luk ku babpat inul Liwi ineh nenginulih idi nekebusak nengeruat bua' berangan.

⁹ Idi Musa nenguit amung rukud ineh remuat rat pa kiung Tuhan kuan amung lun Israil. Idi ideh nenier rukud ineh idi anid burur lun rayehdeh nengalap rukudneh ineh.

¹⁰ Kebala Tuhan ni Musa, “Do' ngelubed rukud Arun ineh amé' pa atun Pati' Pejani', pad mangun ku aceh tanu' kuan amung-amung lun luk sikal metueh, pad iko ngagka' durengdeh Negku, idi ideh na pitayen.”

¹¹ Idi Musa nenganau' maya' kudeng luk icuk Tuhan neneh.

¹² Idi kebala lun Israil ni Musa, “Kali' rungen amung-amung kai mabud maté.

¹³ Ngaceku idé-idé luk amé' muneng ku Lepo su luk inan papu' Tuhan miak maté. Miakké amung kai mabud maté?”