IAP 16 - BALA LUK DO'

Kora, Datan, Idi Abiram Ngedat Ni Musa

¹ Idi Kora ineh anak Isar, idi mupun Kohat, luk inul Liwi. Idi Kora nenguit Datan idi Abiram anak Eliab, idi On anak Pelet maya' neneh. Diteluh ineh inul Rubin.

² Idi ideh netuped pa atun Musa, dengan 250 lun rayeh lun Israil luk pangeh pinili' lun mula'. Amungdeh lun luk mebala.

³ Idi ideh sikal metueh rat ni Musa idi Arun, kebaladeh, “Pangeh petap kekamen medueh nekini peh! Ngaceku amung lun Israil pana' meligan teh. Idi Tuhan pana' idi arangdeh. Anun punneh medueh ngerayeh burur medueh pa luun amung pupu Tuhan?”

⁴ Kareb Musa neninger bala ini, idi ieh netekeradung sembayang.

⁵ Idi kebalaneh kuan Kora idi amung lun luk maya' neneh, “Pekak nebpa Tuhan miak maré kali' idé luk pupuNeh, idi idé luk meligan, idi idé luk pinili' Tuhan amé' Neneh iring bubpun.

⁶ O Kora, do' muyuh nganau' kudeng ini. Do' ngalap luk inan ngeseb umau luk do' buen,

⁷ idi nganau' apui bang ineh, idi nganau' umau luk do' buen luun apui ineh pa kiung Tuhan, pekak nebpa. Idi idé luk pilin Tuhan, ieh luk meligan. Muyuh pana' pangeh petap kekamen nekini peh! O muyuh lun Liwi!”

⁸ Idi kebala Musa ni Kora, “Do' muyuh ninger, O lun Liwi.

⁹ Naké petap kekamen kuan muyuh luk pangeh itad Allah Israil rat nelun mula', pad muyuh amé' muneng neneh idi ngakem bang Lepo su luk inan papu' Tuhan, idi ngakem kuan lun Israil teh?

¹⁰ Idi Tuhan pangeh nenguit namu amé' muneng Neneh dengan amung kinanak muyuh, lun Liwi. Miakké muyuh nakap kekamen imam teh?

¹¹ Ngaceku ineh iko idi amung luk maya' namu pangeh nengedat Tuhan. Kareb muyuh tekedamut ni Arun, setuneh muyuh sikal metueh ratnan Tuhan.”

¹² Idi Musa nengecuk seburur nawar ni Datan idi Abiram anak-anak Eliab ineh. Iamo' kebala didueh, “Na kai sikal amé'.

¹³ Naké petap uitmu nekai rat tana' luk mebaleng macing tungé su luk ali-ali idi ngaté nekai ieni. Idi teh iko pian mangun ku raca' kai?

¹⁴ Idi meluun teh iko na nenguit nekai iné' inan tana' luk mebaleng, idi na nemaré nekai babpat tana' idi kabun anggur. Miakké iko nakul ilung mateh lun ini? Na kai sikal amé'.”

¹⁵ Idi Musa pelaba useh. Idi kebalaneh inan Tuhan, “Aleg Iko ngalap luk baréndeh ineh, ngaceku sebuleng keladai pana' nateh luk ilapku rat nedeh. Idi sebururdeh pana' nateh luk piderehku.”

¹⁶ Idi kebala Musa ni Kora, “Do' iko idi 250 burur lun luk maya' namu, idi Arun amé' pa kiung Tuhan nebpa.

¹⁷ Idi do' anid-anid burur muyuh nguit luk inan muyuh ngeseb umau luk do' buen, idi nganau' umau luk do' buen luun idi pa kiung Tuhan.”

¹⁸ Idi ideh nenguit ineh idi nenganau' apui bang ineh idi umau luk do' buen pa luun apui ineh, idi ideh netuped munung tanga' Lepo su luk inan papu' Tuhan dengan Musa idi Arun.

¹⁹ Idi Kora nenguit amung lun luk maya' neneh amé' munung tanga' Lepo ineh ngaceku ideh pian amé' pa luun didueh. Idi rasat Tuhan nesilagan kuan amung lun Israil.

²⁰ Kebala Tuhan ni Musa idi Arun,

²¹ “Do' medueh mado rat iring lun mula' ineh, pad Ui miak ngaté nedeh dengan segageh mo'.”

²² Idi didueh netekeradung, kesembayang didueh, “O Allah, Allah lawa amung ulun! Kudeng seburur mesala', miakké Iko museh kuan lun mula' ini?”

²³ Kebala Tuhan ni Musa,

²⁴ “Do' ngecuk nelun mula' ineh mado rat su luk inan Kora, Datan, idi Abiram.”

²⁵ Idi Musa nudur idi iné' ni Datan idi Abiram, idi amung lun rayeh Israil pana' nemaya' neneh.

²⁶ Idi kebalaneh kuan lun mula' ineh, “Do' muyuh mado ratnan lepo lemulun luk dat ini. Aleg ngakem anun-anun binawehdeh pad muyuh na maté ngaceku sala'deh.”

²⁷ Idi ideh neburo rat iring su luk inan Kora, Datan, idi Abiram. Idi Datan idi Abiram neremuat idi netuped munung tanga' lepo didueh dengan awan didueh idi amung-amung anak didueh teh.

²⁸ Idi kebala Musa, “Ratnan ineh muyuh miak kali' ui icuk Tuhan, pad ui nganau' amung kekamen ini, idi na ini maya' pianku sebuleng.

²⁹ Kudeng lun ini maté mét mepad kudeng lun baken, idi na ui icuk Tuhan.

³⁰ Iamo' kudeng Tuhan nganau' aceh kekamen luk mebaruh, idi tana' mukab, pad amung-amungdeh maté mebpeh bang lubang ineh, dengan amung binawehdeh, idi ideh semuet bang su luk inan até dengan mulun, idi muyuh miak kali' lemulun ini pangeh nengedat Tuhan.”

³¹ Idi pangeh ieh nepebala kudeng ineh, idi tana' su luk inandeh nekukab denak-denak.

³² Idi ideh nebpeh bang ineh dengan amung uang tetek ruma'deh idi amung lun luk maya' ni Kora dengan amung binawehdeh.

³³ Ideh nesemuet bang su luk inan até dengan mulun, dengan amung binawehdeh. Idi tana' pana' nengakeb nedeh idi ideh netutu'.

³⁴ Idi amung lun Israil luk libutdeh neburo ku aroddeh, kebaladeh, “Miket, pad tau pana' na mebpeh bang lubang ineh!”

³⁵ Idi apui ratnan Tuhan neremuat idi nengeseb amungdeh luk 250 burur luk nenguit umau luk do' buen ineh.

Luk Inan Ngeseb Umau Luk Do' Buen

³⁶ Kebala Tuhan ni Musa,

³⁷ “Do' ngecuk ni Eliasar anak Arun luk imam ngalap amung luk inan ngeseb umau luk do' buen ineh rat arang butungdeh luk iseb ineh, idi ngisak bareh apui luk bang ineh, ngaceku amung ineh meligan.

³⁸ Idi luk inan ngeseb umau luk do' buen luk inuit lemulun luk pinaté ngaceku sala'deh, do' nuno ineh ku kakeb bubpun. Ngaceku ideh pangeh nemaré ineh pa kiung Tuhan. Idi ngaceku repapeh ineh meligan, idi ineh mangun ku tanu' kuan lun Israil.”

³⁹ Idi Eliasar luk imam ineh nengalap amung ineh. Ngaceku ideh tekaling. Idi ideh nenuno ineh mangun ku kakeb bubpun.

⁴⁰ Idi ineh mangun ku terawé kuan lun Israil, pad lemulun luk na titen ku imam, idi lun luk na inul Arun na amé' muneng idi ngeseb umau luk do' buen pa kiung Tuhan, pad ieh na kudeng Kora idi amung lun luk nemaya' neneh, maya' kudeng luk bila Tuhan ni Eliasar dengan tang Musa.

Arun Nganau' Luk Nguit Pedo' Kuan Lun Israil

⁴¹ Idi kenebpa amung lun Israil nuseh ni Musa idi Arun, kebaladeh, “Medueh pangeh nengaté sebuang pupu Tuhan.”

⁴² Idi kareb lun mula' ineh nepamung ni Musa idi Arun, idi ideh nelumi nenier Lepo su luk inan papu' Tuhan, idi ideh nekali' laput ineh nengakeb neneh idi rasat Tuhan pana' melagan.

⁴³ Idi Musa idi Arun iné' pa atun Lepo ineh.

⁴⁴ Idi kebala Tuhan ni Musa idi Arun,

⁴⁵ “Buro medueh rat arang lun Israil ini, ngaceku dengan segageh Ui miak ngaté nedeh.” Idi didueh netekeradung.

⁴⁶ Idi kebala Musa ni Arun, “Ngalap luk inanmu ngeseb umau luk do' buen ineh. Idi nganau' apui luk ratnan bubpun bang ineh idi nganau' umau luk do' buen luun apui ineh, idi nguit ineh miket amé' nelun Israil, idi nganau' luk nguit pedo' kuandeh. Ngaceku useh pangeh remuat ratnan Tuhan. Idi ét luk mebura' pana' pangeh nengimun.”

⁴⁷ Idi Arun nengalap ineh, maya' kudeng luk icuk Musa, idi ieh nupun iné' arangdeh. Ngaceku ét ineh pangeh nengimun. Idi ieh nenganau' umau luk do' buen bang ineh, idi nenganau' luk nguit pedo' kuandeh.

⁴⁸ Idi ieh netuped arangdeh luk naté idi luk mulun. Idi ét ineh pana' nugka'.

⁴⁹ Idi kinula' amung lun luk naté ku ét ineh 14,700 burur. Idi teh inan luk naté ngaceku sala' Kora ineh.

⁵⁰ Kareb ét ineh pangeh nugka' idi Arun nelemubed iné' ni Musa munung tanga' Lepo su luk inan papu' Tuhan.