IAP 15 - BALA LUK DO'

Ukum Ratnan Luk Barén Kuan Tuhan

¹ Kebala Tuhan ni Musa,

² “Mada' kuan lun Israil: Kareb muyuh macing inan bawang luk biréKu nemuyuh,

³ idi muyuh miak maré baré luk sabpen kuan Tuhan, ieh ineh ratnan sapi' kian dumba lek, ieh ineh baré sabpen, baré kereten, baré ngaceku pejani', baré mawang niat, idi baré ngaceku ngerayeh aco, mangun ku luk do' buen kuan Tuhan.

⁴ Idi idé luk maré baréneh kuan Tuhan, do' ieh nguit tudu' lio banak luk rinabur ku seseréi' setangal umau luk do'.

⁵ Idi dengan anid baré luk sabpen do' iko nguit seseréi' setangal abpa' anggur kuan anid-anid anak dumba luk barén.

⁶ Idi kareb iko maré aceh dumba deléi, do' iko nguit segatang banak luk rinabur ku dueh seréi' umau saitun ku baré akan.

⁷ Idi kareb iko maré baré luk rupen, do' iko nguit dueh seréi' abpa' anggur. Amung baré ineh mangun ku luk do' buen kuan Tuhan.

⁸ Idi kareb iko nguit aceh sapi' deléi ku baré luk sabpen, kian kereten lek, pad maya' aceh jani', idi kareb iko maré baré luk nguit pedo' kuan Tuhan,

⁹ do' iko nguit segatang setangal banak luk rinabur ku dueh seréi' setangal umau saitun.

¹⁰ Idi kareb iko maré baré luk rupen, do' iko nguit dueh seréi' setangal abpa' anggur ku baré luk sabpen. Baré ineh mangun ku luk do' buen kuan Tuhan.

¹¹ “Kudeng ineh lawé muyuh maré sapi' deléi, dumba deléi, anak dumba deléi, idi anak amék deléi teh.

¹² Maya' kinula' luk barén muyuh,

¹³ do' amung lun Israil nganau' kudeng ineh, kareb maré baré akan, mangun ku luk do' buen kuan Tuhan.

¹⁴ “Idi kudeng aceh lun sakai tudo segageh arang muyuh kian meparud lek, idi kudeng ieh pian maré aceh baré luk sabpen mangun ku aceh buen luk do' kuan Tuhan, do' ieh nganau' maya' kudeng luk ruen muyuh.

¹⁵ Idi inan sebuleng dalan mo' kuan muyuh lun Israil idi kuan lun sakai luk tudo arang muyuh, ieh ineh aceh ukum luk meruked. Idi lun sakai pana' mepad kudeng muyuh pa kiung Tuhan.

¹⁶ Inan sebuleng ukum idi sebuleng dalan kuan muyuh amung, idi kuan lun sakai luk tudo arang muyuh.”

Ratnan Maré Pinaram

¹⁷ Kebala Tuhan ni Musa,

¹⁸ “Do' iko mada' kuan amung lun Israil: Kareb muyuh macing bang bawang luk inanKu nated nemuyuh,

¹⁹ idi kareb muyuh kuman nuba' bang bawang ineh, do' muyuh maré aceh baré kuan Tuhan.

²⁰ Ratnan banak muyuh luk pun-pun, do' maré sebalad pinaram mangun ku aceh baré ratnan su luk inan rumik.

²¹ Ratnan banak muyuh luk pun-pun, do' muyuh maré aceh baré kuan Tuhan macing ruked-ruked.

Baré Ngaceku Sala' Luk Na Inau' Rungen

²² “Iamo' kudeng muyuh meraruh idi na maya' amung ukum ini luk bila Tuhan ni Musa iamo' baken inau' rungen,

²³ idi muci lun mula' na maya' bala luk biré Tuhan ni Musa,

²⁴ idi kudeng inan sala' inau'deh, na ieh inau' rungen, do' amung lun Israil maré sebuleng anak sapi' deléi mangun ku aceh baré luk sabpen, idi ku luk do' buen kuan Tuhan, perapu dengan baré akan idi baré luk rupen maya' dalanneh, idi sebuleng amék deléi barén ngaceku sala'.

²⁵ Idi do' imam nganau' luk nguit pedo' kuan lun mula', idi ideh miak ngalap do', ngaceku sala'deh baken inau' rungen. Idi ideh pangeh nenguit barédeh pa kiung Tuhan, ieh ineh aceh baré luk sabpen kuan Tuhan, idi aceh baré ngaceku sala', ngaceku raruhdeh ineh.

²⁶ Idi amung lun Israil idi lun sakai luk tudo arangdeh miak ngalap do', ngaceku amung pupu ineh pangeh neraruh.

²⁷ “Idi kudeng selemulun nganau' sala' dengan na inau' rungen, idi do' ieh maré aceh amék tineh luk ulun selak ku baré ngaceku sala'.

²⁸ Idi do' imam nganau' luk nguit pedo' pa kiung Tuhan ngaceku lemulun luk neraruh ineh, pad ieh ngalap do'.

²⁹ Inan sebuleng dalan mo' kuan lemulun luk nganau' sala' dengan na inau' rungen, do' kuan muyuh lun Israil idi kuan lun sakai luk tudo arang muyuh pana'.

³⁰ “Iamo' lemulun luk nganau' sala' dengan rungen, do' lun Israil idi lun sakai pana', lemulun ineh ngedat Tuhan, idi do' ieh duken buro rat arang pupuneh.

³¹ Ngaceku ieh pangeh nengedat bala Tuhan idi nengelaba ukumNeh. Na miak na lun ineh duken buro, idi ieh sebuleng mabeh sala'neh.”

Ukum Lemulun Luk Ngakem Kareb Aco Luk Inan Mudeng

³² Idi kareb lun Israil déi' su luk ali-ali idi ideh nekeribpeh aceh lemulun ngalap kayuh kareb Aco luk inan Mudeng.

³³ Idi ideh nenguit neneh iné' ni Musa idi Arun idi amung lun Israil teh.

³⁴ Idi ideh nenaan neneh ngaceku nateh kali' luk miak ruen kuanneh.

³⁵ Idi kebala Tuhan ni Musa, “Do' lemulun ineh pitayen. Idi do' amung lun Israil mitung neneh ku batu petatang rat su luk inan muyuh nelupo.”

³⁶ Idi amung lun Israil nenguit neneh remuat rat su luk inandeh nelupo, idi nemitung neneh ku batu macing maté, maya' kudeng luk bila Tuhan ni Musa.

Kuyu' Luk Meramoi Mangun Ku Terawé Kuan Lun Israil

³⁷ Kebala Tuhan ni Musa,

³⁸ “Do' iko ngecuk nelun Israil nganau' lidung kuyu'deh meramoi macing ruked-ruked. Idi do' ngabet ramoineh ku nuper luk bata' melaco.

³⁹ Idi ramoineh mangun ku aceh terawé kuan muyuh. Kareb muyuh nier ineh, do' muyuh ngerawé amung bala Tuhan, pad muyuh nganau' ineh. Idi aleg muyuh maya' pinian burur luk dat, pad muyuh na meraruh ngaceku mateh idi niat muyuh.

⁴⁰ Ramoi ineh ku etu muyuh ngerawé idi maya' amung balaKu, pad muyuh meligan kuan Allah muyuh.

⁴¹ Ngaceku Ui ini Tuhan Allah muyuh luk pangeh nenated nemuyuh remuat rat bang bawang Masir, pad Ui mangun ku Allah muyuh. Ui ini Tuhan Allah muyuh.”