IAP 14 - BALA LUK DO'

Lun Mula' Ngedureng Inan Tuhan

¹ Idi amung lun Israil nengitang idi nenangi' kedangan-kedangan.

² Idi amungdeh tekedamut ni Musa idi Arun. Kebaladeh nedidueh, “Meluun do' kai maté déi' bawang Masir, idi su luk ali-ali ini.

³ Ngudehké Tuhan nguit netau amé' bang bawang ini pad tau pitayen mo'-mo', idi awan tau idi anak tau tebanen lun. Meluun do' tau lemubed amé' bawang Masir.”

⁴ Idi kebaladeh arangdeh sebuleng, “Do' tau mili' seburur mangun ku lun rayeh tau idi lemubed amé' bawang Masir.”

⁵ Idi kareb ineh Musa idi Arun netekeradung pa kiung amung lun Israil.

⁶ Iamo' Yusak Nun idi Kaleb Yepuneh luk rat arangdeh luk iné' nier bawang ineh teh nengedarak kuyu' didueh sebuleng,

⁷ idi kebala didueh kuan lun Israil, “Bawang luk iné' sira' ineh aceh bawang luk pelaba do'.

⁸ Idi kudeng Tuhan mawang niat ku tau, kali' rungen Ieh nguit netau amé' bawang ineh, idi maré ineh netau. Ieh ineh aceh tana' luk mebaleng.

⁹ Iamo' aleg muyuh ngedat Tuhan. Idi aleg muyuh matot ku lemulun luk kuan bawang ineh. Tau miak ngelaya' nedeh, ngaceku Tuhan idi dengan tau idi akangdeh pangeh inusagNeh. Aleg muyuh matot nedeh.”

¹⁰ Iamo' amung lun Israil ineh perurum pian mitung nedidueh ku batu. Iamo' lun Israil nenier rasat Tuhan bang Lepo su luk inan papu' Tuhan.

Musa Sembayang Kuan Lun Mula'

¹¹ Idi kebala Tuhan ni Musa, “Tuda' ioké pupu ini ngedat Negku? Tuda' io teh ideh na maya' Negku, sagan tu pana' inan mula' tanu' luk inau'Ku arangdeh?

¹² Idi Ui pian ngacing ét luk mebura' kuandeh, idi nala' nedeh. Iamo' Ui nganau' namu mangun ku aceh pupu luk meluun rayeh idi meluun tueh ratnan pupu ini.”

¹³ Idi kebala Musa inan Tuhan, “Kudeng pieh kudeng ineh kali' rungen lun Masir kali' ineh muci, ngaceku Iko nenguit pupu ini remuat rat arangdeh dengan laludMu.

¹⁴ Idi ideh miak mada' ineh kuan lun bang bawang ini. Ngaceku Iko, Tuhan, idi arang pupu ini. Idi Iko sinier matehdeh sebuleng. Idi laputMu ungeng pa luundeh. Idi Iko amé' pa atundeh, kudeng laput kareb macang, idi kudeng apui kareb medacem.

¹⁵ Idi kudeng Tuhan ngaté amung pupu ini, kali' rungen amung pupu baken luk pangeh neninger bala ratnan Iko miak pebala,

¹⁶ ‘Ngaceku Tuhan na miak nguit pupu ini amé' bang bawang luk pangeh pijani'Neh nedeh, idi Ieh nengaté nedeh déi' su luk ali-ali.’

¹⁷ Idi nekini, nima' lalud Tuhan uen ngerayeh maya' kudeng luk bilaMu, ieh ineh,

¹⁸ ‘Ui ini Tuhan mekadang niat idi rayeh awa idi maré do' ku dat idi sala'. Iamo' lemulun luk na mepuit ratnan sala' na miak puatin ratnan ukum. Iamo' dat taman-taman uénKu nan anak-anakneh macing ku inul luk keteluh idi luk keapat.’

¹⁹ Maré do' ku amung dat pupu ini maya' éi'Mu luk rayeh. Ngaceku Tuhan pangeh nemaré do' kuan pupu ini rat bawang Masir macing bang bawang ini.”

²⁰ Idi kebala Tuhan, “Ui pangeh nemaré do' kuandeh maya' kudeng putuhmu ineh.

²¹ Iamo' ngaceku Ui ini mulun, idi aput tana' miak mepanu' ku ubur Tuhan.

²² Ngaceku seburur pana' rat arang amung lemulun luk pangeh kali' rasatKu, idi amung tanu' luk pangeh inau'Ku déi' Masir, idi déi' su luk ali-ali, idi luk pangeh nutun Negku macing pulu' kua', idi luk na sikal ninger balaKu,

²³ na tu-tu ideh miak nier bawang ineh luk pangeh pijani' kuan tepundeh. Amung lemulun luk pangeh nengedat Negku na miak nier bawang ineh.

²⁴ Iamo' ngaceku demulunKu Kaleb inan terawé luk baken, idi ieh pangeh lutep maya' Negku, idi Ui miak nguit neneh amé' bawang luk ulekneh, idi inulneh pana' miak ngimet bawang ineh.

²⁵ Idi nekini lun Amalek idi lun Kanaani tudo bang ruan. Do' muyuh lemubed nebpa idi nalan amé' su luk ali-ali matun Abpa' Pisui.*”

Tuhan Ngukum Nelun Mula' Luk Ngedureng

²⁶ Kebala Tuhan ni Musa idi Arun,

²⁷ “Tuda' ioké pupu luk dat ini tekedamut Negku? Idi amung dureng lun Israil Negku Ui pangeh kali'.

²⁸ Mada' kuandeh: Bala Tuhan kudeng ini, ‘Ngaceku Ui ini mulun, idi Ui miak nganau' kuan muyuh maya' kudeng bala luk pangeh pindengerKu rat nemuyuh.

²⁹ Butung muyuh miak telubid bang su luk ali-ali ini, idi amung muyuh luk pangeh iniap luk rat ulun dueh ngepulu' lak idi mela idi luk netekedamut Negku,

³⁰ na tu-tu muyuh miak semuet bang bawang luk pangeh pijani'Ku nemuyuh, iamo' Kaleb Yepuneh idi Yusak Nun luk miak semuet mo'.

³¹ Iamo' Ui miak nguit anak-anak muyuh luk bila muyuh miak tebanen, pad ideh kali' bawang luk dinat muyuh ineh.

³² Iamo' muyuh miak maté bang su luk ali-ali ini.

³³ Idi anak-anak muyuh miak mangun ku lun matar dumba, apat ngepulu' lak kinioneh tungé' su luk ali-ali ini, idi medereh ku sala' muyuh pad muyuh mabud naté bang su luk ali-ali ini.

³⁴ Maya' kinula' aco muyuh luk iné' nier bawang ineh, ieh ineh apat ngepulu' aco, seaco mepad kudeng selak. Ngaceku ineh muyuh miak mabeh sala' muyuh apat ngepulu' lak kinioneh, pad muyuh kali' usehKu.’

³⁵ Ngaceku Ui ini Tuhan luk nepebala. Kali' rungen Ui nganau' ini kuan amung pupu luk dat ini luk pangeh perurum ngedat Negku. Ideh miak mabud maté déi' su luk ali-ali ineh.”

³⁶ Idi amung lun luk icuk Musa iné' nier bawang ineh nenganau' pupu ineh netekedamut inan Tuhan, ngaceku bala luk dat luk inuitdeh.

³⁷ Idi Tuhan nemaré aceh ét luk mebura' kuandeh, pad ideh naté.

³⁸ Iamo' Yusak Nun idi Kaleb Yepuneh mo' mulun rat arang pulu' dueh burur luk pangeh iné' nier bawang ineh.

Lun Pupu Israil Nutun Semuet Bang Bawang Kanaan

³⁹ Idi kareb Musa nengacing amung bala ini kuan lun Israil, idi ideh pelaba tangi'.

⁴⁰ Idi ideh nekulat uka-uka idi iné' luun pegkung, idi kebaladeh, “Nekini tau sikal amé' inan bawang luk pijani' Tuhan kuan tau. Kali' rungen tau pangeh mesala'.”

⁴¹ Iamo' kebala Musa, “Ngudehké muyuh pian ngelaba bala Tuhan? Kali' rungen na ulekneh.

⁴² Aleg muyuh amé' ngaceku Tuhan na idi arang muyuh, pad muyuh na uen bunu' muyuh ngelaya'.

⁴³ Ngaceku lun Amalek idi lun Kanaani idi pa atun muyuh. Idi muyuh miak pitayendeh, ngaceku Tuhan na idi dengan muyuh. Ngaceku muyuh pangeh neteketed ratnan Tuhan.”

⁴⁴ Iamo' ideh nesumaad iné' luun pegkung ineh sagan pana' Pati' Pejani' Tuhan idi Musa na nenalan rat su luk inandeh nelupo.

⁴⁵ Idi lun Amalek idi lun Kanaani luk tudo luun buduk pegkung netemurun. Idi ideh nepebunu' nedeh idi nengelaya' nedeh idi ideh nengerada' nedeh macing déi' Horma.