IAP 13 - BALA LUK DO'

Pulu' Dueh Burur Lemulun Luk Amé' Nier Bawang Kanaan

¹ Kebala Tuhan ni Musa,

² “Do' iko ngecuk nelun amé' nier bawang Kanaan luk barénKu kuan lun Israil; ratnan anid-anid inul tamandeh, do' iko ngecuk seburur deléi, idi do' amungdeh lun luk mileh nguyut.”

^3-15 Idi Musa nemaya' bala Tuhan ineh, idi rat su luk ali-ali déi' Paran, ieh nengecuk lun rayeh ini nalan: Pupu Lun Rayeh Inul Rubin Samua Sakur Simion Sapat Hori Yahuda Kaleb Yepuneh Iskar Igal Yusup Epraim Hosia Nun Beniamin Palti Rapu Sebulon Gadiel Sodi Manasé Gadi Susi Dan Amiel Gemali Aser Setur Mikail Naptali Nahbi Wapsi Gad Guel Maki

Pupu Lun Rayeh Inul

¹⁶ Idi ini ngadan amung lun luk icuk Musa iné' nier bawang. Idi Hosia Nun titen Musa, Yusak.

¹⁷ Kareb Musa nengecuk nedeh nalan, idi kebalaneh nedeh, “Do' muyuh nalan rat ieni amé' Negeb idi uké pegkung,

¹⁸ idi nier kudeng apeh ayu bawang ineh, idi kudeng apeh lun luk tudo bang ineh, metueh ku melaya', mula' ku pawa',

¹⁹ idi kudeng apeh tana' ineh su luk inandeh, do' ku dat. Idi kudeng apeh bawang ineh su luk inandeh tudo, inan ar ku na,

²⁰ idi teh kudeng apeh ayu tana ineh, mebaleng ku metugeh, inan kayuh ku na. Idi do' muyuh mekuu' idi nguit bua' rat bang bawang ineh.” (Ngaceku ini kareb bua' anggur pun melak.)

²¹ Idi ideh nenalan idi iné' nier tana' ineh rat su luk ali-ali déi' Sin macing déi' Rihab muneng ku bawang Hamat.

²² Ideh nenalan rat Negeb macing Hebron; idi Ahiman, Sesai, idi Talmai luk inul Enak idi déi' Hebron. (Idi bawang Hebron ineh pinudut tudu' lak atun ratnan bawang Soan déi' Masir.)

²³ Idi kareb ideh nacing déi' Ruan Eskol, ideh nenutu' sengerunguh bua' anggur. Idi dueh burur nemirir ineh. Idi teh ideh nenguit bua' delima idi bua' gita'. (

²⁴ Idi ideh neneten ngadan su ineh Ruan Runguh Bua' Anggur. Ngaceku su ineh inan lun Israil nenutu' sengerunguh bua' anggur.)

²⁵ Idi ideh nenier bawang ineh apat ngepulu' aco kinioneh, idi pangeh ineh ideh nelemubed.

²⁶ Idi ideh iné' papu' ni Musa idi Arun, idi amung lun Israil déi' su luk ali-ali déi' Paran bang bawang Kadis. Idi ideh nengacing bala kuandeh, idi kuan amung lun Israil, idi nemada' bua' rat bawang ineh sirendeh.

²⁷ Idi keburi'deh ni Musa, “Kai pangeh nacing inan bawang luk icukmu iné' sira' kai, idi tana' su ineh mebaleng. Idi ini bua' ratnan tana' ineh.

²⁸ Idi teh lemulun luk tudo bang bawang ineh mesangit, idi bawangdeh pelaba rayeh idi inar teh. Idi teh kai pangeh nenier inul Enak luk rayeh burur idi medita' déi'.

²⁹ Idi lun Amalek tudo déi' tana' Negeb. Idi lun Hiti, lun Yebusi, idi lun Amori tudo luun pegkung. Idi lun Kanaani tudo tangeb Abpa' Rayeh idi tangeb Abpa' Yarden teh.”

³⁰ Idi Kaleb nengecuk nelun Israil ineh pirud pa kiung Musa, kebalaneh, “Do' tau nalan nekini idi ngaro tana' ineh. Ngaceku kali' rungen tau miak ngelaya' nedeh.”

³¹ Iamo' kebaladeh luk iné' maya' ni Kaleb, “Na mepelengit tau pupu ineh. Ngaceku ideh ineh meluun tueh rat netau.”

³² Idi ideh nengacing bala luk dat kuan lun Israil ratnan bawang luk pangeh sinierdeh ineh. Kebaladeh, “Bawang luk iné' sira' kai, ieh ineh aceh bawang luk kuman lemulun. Idi amung lemulun luk sinier kai bang bawang ineh pelaba rayeh burur idi medita'.

³³ Idi kai nenier lemulun luk pelaba rayeh burur, ieh ineh inul Enak, idi kai nenier burur kai mepad kudeng kato, idi kudeng ineh teh ayu kai sirendeh.”