IAP 12 - BALA LUK DO'

Miriam Inukum

¹ Idi Miriam idi Arun nengedat ni Musa, ngaceku ieh nengaweh aceh decur lun Kusi.

² Idi kebala didueh “Baken Musa mo' inan Tuhan nepebala. Kiteh pana' inan Tuhan nepebala teh!” Idi Tuhan neninger bala ini. (

³ Idi Musa ineh aceh lemulun luk pelaba beneh niat rat nelun baken.)

⁴ Idi denak-denak Tuhan nepebala ni Musa, Arun, idi Miriam, “Remuat meteluh amé' bang Lepo su luk inan papu' Tuhan.” Idi diteluh pana' neremuat.

⁵ Idi Tuhan netemurun bang laput idi netuped munung tanga' Lepo, idi Ieh nenawar ni Arun idi Miriam. Idi didueh iné' pa atunNeh.

⁶ Idi kebala Tuhan, “Ninger medueh balaKu ini! Kudeng inan nabi Tuhan arang muyuh, Ui ini Tuhan ngelagan bururKu neneh bang luk sirenneh, idi pebala neneh bang nupineh.

⁷ Iamo' demulunKu Musa baken nabi luk kudeng ineh. Iamo' ieh luk inanKu merapet bang ruma'Ku.

⁸ Idi Ui pebala petutup neneh, dengan bala luk megala', baken dengan luk pinginud. Idi ieh pangeh nenier ayuKu. Kudeng apeh medueh na matot ngedat ni Musa demulunKu ini?”

⁹ Idi Tuhan pelaba useh nedidueh. Idi pangeh ineh Ieh neburo peh.

¹⁰ Idi kareb laput ineh nekemikit rat pa luun lepo ineh, idi Miriam neketukan ét susud, idi bururneh mebuda' mepad kudeng salju ku ét ineh. Kareb Arun nelumi nenier ni Miriam, idi ieh nekali' neneh nekaneh ét susud.

¹¹ Idi kebala Arun ni Musa, “O Tuan, aleg ngukum nekai ngaceku kai nenganau' luk mebacé idi sala' teh.

¹² Aleg nima' neneh kudeng anak naté, rat bang batek tinanneh, pad supa bururneh melu.”

¹³ Idi Musa nesembayang nan Tuhan, kebalaneh, “O Allah, ui mutuh Namu ngedo' neneh.”

¹⁴ Iamo' kebala Tuhan ni Musa, “Kudeng tamanneh pangeh nengelica' kiungneh, naké ieh migu' tudu' aco kinioneh? Ngaceku ineh do' ngata neneh tudu' aco kinioneh petatang rat su luk inan nelupo. Pangeh ineh miak ngalap neneh.”

¹⁵ Idi Miriam pana' ita tudu' aco kinioneh petatang rat su luk inan nelupo. Idi ideh na nalan rat ieneh kareb nateh Miriam pangeh ilap.

¹⁶ Muci ratnan ineh idi ideh nenalan rat Haserot. Idi ideh nelupo déi' Paran déi' su luk ali-ali.