IAP 11 - BALA LUK DO'

Su Luk Titen Neseb

¹ Idi lun mula' ineh ngedureng pa kiung Tuhan, ngaceku susa'deh. Idi kareb Tuhan neninger durengdeh, idi Ieh museh. Idi apui ratnan Tuhan nulun arangdeh idi nengeseb sebuang lepodeh.

² Idi ideh nengitang nawar ni Musa. Idi Musa nesembayang inan Tuhan. Idi apui ineh pana' milep.

³ Idi ideh neneten su ineh Neseb, ngaceku apui ratnan Tuhan nulun arangdeh.

Musa Mili' Tudu' Ngepulu' Burur Lun Rayeh

⁴ Idi lun baken luk nemaya' nedeh melili ku akan luk do'. Idi lun Israil nenangi' teh, kebaladeh, “Kai pelaba pian ku luk kikid!

⁵ Kai ngerawé lawid luk kinan kai déi' bawang Masir dengan na belih, idi amung timun, bua' tecak, bua' bawang luk rayeh, bua' bawang sia', idi bua' bawang buda'.

⁶ Iamo' nekini kai pelaba laya'. Idi na luk idi anun-anun luk baken, iamo' manna ini mo' sebuleng.” (

⁷ Idi manna ineh mepad kudeng ilung binamud, idi kudeng ilu' luk mesilo.

⁸ Idi lun Israil iné' ngalap ineh. Idi ideh nenganau' ineh ku banak idi nenanek ineh ku tinapé. Idi énneh mepad kudeng én ruti luk didang dengan umau saitun.

⁹ Idi manna ineh nebpeh perapu dengan ipup, su luk inandeh nelupo, kareb medacem.)

¹⁰ Musa neninger amung-amung lun Israil nengedureng, idi ideh tuped munung tanga' lepodeh. Idi Tuhan pelaba useh idi Musa pelaba dat niat.

¹¹ Idi kebala Musa inan Tuhan, “Ngudehké Iko nganau' luk dat kuanku. Ngudehké Iko na méi' negku, idi na ngalap babeh amung pupu ini rat negku?

¹² Uiké tinan pupu ini? Uiké luk nenganak nedeh, pad Iko ngecuk negku ngabin nedeh mepad kudeng decur luk niti' anak, idi nguit nedeh amé' bawang luk pangeh pijani'Mu kuan tamandeh?

¹³ Idi rat iapeh ui miak ngalap kikid barén kuan amung pupu ini? Ngaceku ideh nangi' negku idi pebala, ‘Maré kikid nekai, pad kai miak kuman.’

¹⁴ Na ui miak mabeh amung pupu ini, ngaceku ineh pelaba berat kuanku.

¹⁵ Kudeng Iko nganau' kudeng ineh kuanku, meluun do' Iko ngaté negku. Kudeng Iko méi' negku, aleg ngedereh negku.”

¹⁶ Kebala Tuhan ni Musa, “Ngamung tudu' ngepulu' burur rat arang lun rayeh lun Israil kuanKu, ieh ineh lun rayeh luk inanmu merapet, idi nguit nedeh amé' inan Lepo su luk inan papu' Tuhan, pad ideh tuped denganmu su ineh.

¹⁷ Idi Ui miak temurun idi pebala namu ieneh. Idi Ui miak ngalap ratnan Roh luk namu ineh idi ngerareng ineh nedeh, pad ideh ineh mabeh dereh pupu ineh, perapu denganmu, pad iko na mabeh ineh sebuleng.

¹⁸ Idi do' iko mada' kuan pupu ini, ‘Ngeligan burur muyuh kuan pekak nepba. Idi muyuh miak kuman uang. Ngaceku tangi' muyuh pindenger Tuhan, kebala muyuh, “Idéké luk miak maré kikid kenen kai? Idi pelaba do' kai déi' bawang Masir.” Ngaceku ineh Tuhan miak maré kikid kenen muyuh. Idi muyuh miak kuman ineh.

¹⁹ Muyuh na miak kuman ineh seaco, dueh aco, limeh aco, pulu' aco, dueh ngepulu' aco kinioneh,

²⁰ iamo' sebulan, pad macing ieh remuat rat bang icung muyuh idi muyuh mesukol ku ineh, ngaceku muyuh pangeh nengedat Tuhan luk arang muyuh, idi muyuh pangeh nengedureng pa kiungNeh, kebala muyuh, “Anun pun kai remuat rat bang bawang Masir?” ’ ”

²¹ Kebala Musa inan Tuhan, “Kinula' lemulun luk maya' negku 600,000 burur, idi kebala Tuhan, ‘Ui miak maré luk kikid kuandeh, tap kenen sebulan!’

²² Miakké dumba idi sapi' petap kereten kuandeh? Miakké amung lawid luk bang abpa' petap kuandeh?”

²³ Iamo' kebala Tuhan ni Musa, “Naké lalud Tuhan petap? Nekini iko miak nier kudeng balaKu matu ku na.”

²⁴ Idi Musa neremuat idi ieh nengacing amung bala Tuhan ineh kuan lun Israil. Idi ieh nengamung tudu' ngepulu' burur rat arang amung lun rayeh pupu ineh. Idi ieh nengecuk nedeh tuped libut Lepo su luk inan papu' Tuhan.

²⁵ Idi Tuhan netemurun bang laput ineh idi nepebala neneh. Idi Tuhan nengalap ratnan Roh luk ni Musa, idi ieh nemaré ineh kuan tudu' ngepulu' lun rayeh ineh. Kareb Roh ineh pana' iné' nedeh, idi ideh nengimun mada' luk biré Roh. Iamo' ideh nenganau' kudeng ineh sekua' mo'.

²⁶ Iamo' inan dueh burur rat arang tudu' ngepulu' lun rayeh ineh neketecan su luk inandeh nelupo, ieh ineh Eldad idi Midad. Idi Roh iné' nedidueh, sagan tu pana' didueh na iné' bang Lepo su luk inan papu' Tuhan. Idi didueh ineh nemada' luk biré Roh déi' su luk inandeh nelupo.

²⁷ Idi seburur anak adi' nupun mada' ni Musa ratnan luk ruen Eldad idi Midad.

²⁸ Idi Yusak Nun luk ngakem dengan Musa rat isuut, nepebala, “O Musa, do' mebpeng nedidueh.”

²⁹ Iamo' kebala Musa neneh, “Ngudehké iko megagau ngaceku ui? Meluun do' amung pupu Tuhan mangun ku nabi, pad Tuhan maré RohNeh nedeh!”

³⁰ Pangeh ineh idi Musa dengan tudu' ngepulu' lun rayeh lun Israil nelemubed iné' su luk inandeh nelupo.

Tuhan Maré Suit Tetibung

³¹ Idi inan aceh bui ratnan Tuhan luk nenguit tuda'-tuda' suit tetibung rat pa acep aco, idi ideh temulud su luk inan lun Israil nelupo, idi kiado inandeh temulud miak delanin bang seaco, idi kidita' tuluddeh rat luun tana' teluh kaki.

³² Idi ideh iné' ngalap suit tetibung ineh tebaco kedangan, idi tebaco kenebpa teh. Ideh luk mulai alap ngalap limeh ngeratu gatang mo'. Idi ideh nemidang ineh libut su luk inandeh nelupo.

³³ Idi kareb nateh ideh nekuman suit ineh, idi Tuhan pelaba useh nedeh. Idi Tuhan nengacing aceh ét luk pelaba bura' kuandeh.

³⁴ Ngaceku ineh ideh neneten su ineh “Lengutan Lili,” ngaceku su ineh ideh nenanem amung lemulun luk melili.

³⁵ Idi rat “Lengutun Lili” ineh ideh nenalan iné' déi' Hasirot, idi nelupo su ineh.