IAP 1 - BALA LUK DO'

Iap Luk Pun-Pun

¹ Kebala Tuhan ni Musa, déi' su luk ali-ali bang Lepo su luk inan papu' Tuhan, aceh aco bulan dueh bang lak luk kedueh, pangeh ideh neremuat rat bang bawang Masir,

² “Do' medueh Arun ngiap kinula' lun Israil dengan amung inul, idi tetek ruma'deh, perapu dengan ngadan anid-anid deléi,

³ luk ulun dueh ngepulu' lak idi mela, ieh ineh amung lun Israil luk miak pebunu'.

⁴ Idi do' medueh nguit lun rayeh ratnan anid-anid pupudeh.”

^5-15 Idi ngadan amung-amung lun luk pinili', ieh ineh: Pupu Lun Rayeh Inul Rubin Elisur Sedur Simion Selumil Surisadai Yahuda Nasun Aminadab Iskar Netanel Suar Sebulon Eliab Helon Epraim Elisama Amihud Manasé Gamalil Pedasur Beniamin Abidan Gidioni Dan Ahisar Amisadai Aser Pagiel Okran Gad Eliasap Ruel Naptali Ahira Enan

Pupu Lun Rayeh Inul

¹⁶ Idi amung ini pinili' rat arang amung lun Israil mangun ku lun rayeh inuldeh idi lun rayeh tuda'-tuda' pupu lun Israil.

¹⁷ Musa idi Arun nengalap lemulun luk titen ngadan ineh.

¹⁸ Idi didueh nenawar amung lun Israil nepamung, aceh aco bulan dueh, pad ideh nemada' ngadandeh, maya' inuldeh, idi tetek ruma'deh, dengan ngadan amung deléi luk ulun dueh ngepulu' lak idi mela teh,

¹⁹ mepad kudeng luk icuk Tuhan ni Musa. Kudeng ineh teh ieh nengiap nedeh déi' su luk ali-ali déi' Sinai.

^20-46 Idi ngadan amung deléi luk ulun dueh ngepulu' lak idi mela, luk miak amé' pebunu', inayud maya' inuldeh idi tetek ruma'deh, ngimun ratnan inul Rubin, anak Yakub luk atun. Ini kinula'deh: Pupu Kinula'deh Rubin 46,500 Simion 59,300 Gad 45,650 Yahuda 74,600 Iskar 54,400 Sebulon 57,400 Epraim 40,500 Manasé 32,200 Beniamin 35,400 Dan 62,700 Aser 41,500 Naptali 53,400 Kinula'deh: 603,550

Pupu Kinula'deh

⁴⁷ Iamo' lun Liwi na iniap dengan inul baken,

⁴⁸ ngaceku kebala Tuhan ni Musa,

⁴⁹ “Aleg iko ngiap nelun Liwi idi aleg ngamung kinula'deh dengan amung lun Israil.

⁵⁰ Iamo' ngeletep nelun Liwi ineh mangun ku lun ngimet Lepo su luk inan papu' Tuhan idi amung repapehneh. Idi do' ideh nguit Lepo ineh idi amung repapehneh. Idi do' ngasa' neneh, idi lupo libut Lepo ineh.

⁵¹ Idi kareb Lepo ineh uen mubuh, do' lun Liwi nata ineh. Kudeng Lepo ineh piduten, do' lun Liwi mudut neneh. Idi kudeng inan lun baken amé' muneng ku Lepo ineh, ieh miak pitayen.

⁵² Idi do' anid-anid pupu lun Israil lupo su luk inan babpatdeh sebuleng idi muneng ku bedéra'deh.

⁵³ Iamo' do' lun Liwi lupo libut Lepo su luk inan papu' Tuhan ineh, pad na useh mangun kuan amung lun Israil. Idi do' Lepo ineh uen lun Liwi nginita.”

⁵⁴ Idi lun Israil nenganau' ineh maya' kudeng luk icuk Tuhan ni Musa.