HOSIA 8 - BALA LUK DO'

Tuhan Ngukum Israil Ngaceku Sembayang Inan Akang

¹ Kebala Tuhan, “Nateg tawak! Bunu'-bunu' ngerieng bawangKu mepad kudeng kanui! PupuKu pangeh nengelaba jani' luk inau'Ku nedeh, idi ideh ara' maya' bada'Ku.

² Sagan tu pana' ideh neten Negku Allahdeh, idi ngamo nedeh pupuKu,

³ ideh neteketed ratnan luk do'. Ngaceku ineh amung bunu'deh miak ngerada' nedeh.

⁴ “PupuKu nemili' tuda'-tuda' raca' iamo' baken maya' pianKu. Ideh nemili' tuda'-tuda' lun luk ngimet, iamo' baken maya' pianKu. Ideh nenganau' akang ratnan pirak idi amas, pad uen ngusag.

⁵ Ui megateh ku sapi' deléi' luk inau' ratnan amas luk inan lun Samaria sembayang. Ui pelaba gateh nelun Samaria. Tuda' ioké ideh nganau' kekamen luk dat teh?

⁶ Seburur lun Israil luk nenganau' akang ineh, idi na ieh Allah! Akang luk inan lun Samaria sembayang miak uen ngareg!

⁷ Kareb ideh nibu bui, ideh ngeranih barui! Kudeng padé melipang, na luk idi banak idi pinaram. Iamo' kudeng inan pinaram, pupu baken miak kuman ineh!

⁸ Amung lun Israil miak telenen, idi uen ngusag. Nekini pana' pupu baken ngerawé nedeh na ulek.

⁹ Ideh metueh niat mepad kudeng keladai luk meliput, idi ideh maya'piandeh sebuleng. Ideh pangeh iné' mutuh pedengan rat ni Asur. Lun Israil pangeh nemasui bururdeh kuan pupu baken pad ideh pitarindeh.

¹⁰ Iamo' Ui sikal ngamung nedeh idi ngukum nedeh. Na mio teh ideh medereh ku ét kareb raca' Asur ngedereh nedeh.

¹¹ “Lun Israil nenganau' mula' bubpun. Idi kudeng ineh teh ideh ngula' sala'deh!

¹² Ui ngayud mula' bada' kuan pupuKu, iamo' ideh ara' ku bada' ineh, idi ngerawé bala ineh baken kuandeh.

¹³ Ideh pelaba pian maré baré, idi ideh pian kuman uang pung. Iamo' Ui ini Tuhan na mawang niat nedeh, idi nekini Ui ngerawé sala'deh, idi sikal ngukum nedeh. Ui miak ngecuk nedeh muli' amé' déi' Masir.

¹⁴ “Lun Israil pangeh nemudut ruma' luk pelaba do', iamo' ideh mekelupan Allah luk nemudut nedeh. Lun Yahuda pangeh nemudut bawang rayeh luk linibung. Ui miak maré apui ngeseb bawangdeh idi ngusag ruma'deh luk do'.”