HOSIA 7 - BALA LUK DO'

¹ “Kareb Ui sikal ngedo' pupuKu Israil idi ngeperuan nedeh, sala'deh, idi kekamendeh luk dat mo' luk sirenKu. Ideh naluk idi ngaro ruma' idi mano. Ideh mano ratnan lemulun luk maya' dalan pana'.

² Idi na tu ideh ngerawé Ui kali' amung kekamendeh luk dat, iamo' amung sala'deh ngelibut nedeh pa kiungKu.”

Gayam Ratnan Nganau' Luk Dat Bang Ruma' Raca

³ Kebala Tuhan, “Lemulun naluk raca' idi lun rayeh-rayehneh dengan gayamdeh luk dat.

⁴ Amung-amungdeh naluk idi na lutep maya' jani'. Ideh mepad kudeng aceh tetel luk melau' ku apui luk inau' lemulun luk mileh nganau' ruti, iamo' ieh na nganau' petap kayuh laba' ruti ineh rutung.

⁵ Kareb aco rayeh raca', ideh nengabuk raca' idi lun rayeh-rayehneh ku abpa' anggur pad ideh mebacé.

⁶ Matu, ideh melau' mepad kudeng tetel ku gayamdeh luk dat. Kedangan-kedangan usehdeh mulun kidi-kidi, idi pa pekak ieh petacu mebudung.

⁷ “Ngaceku usehdeh ideh nengaté amung-amung lemulun luk ngimet nedeh. Amung raca'deh pinaté tesebuleng-tesebuleng, iamo' seburur pana' nateh luk sembayang mutuh pedengan rat Negku.”

Israil Idi Pupu Baken

⁸ Kebala Tuhan, “Lun Israil mepad kudeng setangal ruti. Ideh merapet ku pupu baken luk libut-libutdeh.

⁹ Ideh melaya' ngaceku ideh merapet ku pupu baken, iamo' na ideh kali' laya'deh, idi teh na ideh kali' abpukdeh amé' mebuda'.

¹⁰ Dita' niat lun Israil luk ngadu' bururdeh sebuleng. Iamo' na ideh lumi Negku luk Tuhan Allahdeh.

¹¹ Israil mepad kudeng suit limun luk mebacé; pun-pun ieh mutuh pedengan rat ni Masir. Pangeh ineh ieh temulud amé' Asur!

¹² Ui miak malad rabat idi miak ngakem neneh kareb ieh temulud mepad kudeng suit. Ui miak ngukum Israil ngaceku amung-amung kekamenneh luk dat.

¹³ “Lun Israil miak kumin! ideh pangeh nenecan Negku idi sikal metueh rat Negku. Ideh miak uen ngusag. Setuneh Ui pian ngulun nedeh. Iamo' ideh mebalih ku Ui!

¹⁴ Ideh na sembayang dengan matu-matu pa kiungKu. Ideh siluka' idi temido mepad kudeng lun luk na manu. Ideh sikal metueh rat Negku!

¹⁵ Sagan tu pana' Ui ngasuh nedeh pad ideh metueh, iamo' ideh pegayam sikal metueh rat Negku.

¹⁶ Ideh megéi' teketed rat Negku pad amé' matun tuda'-tuda' allah luk na inan lalud. Ideh mepad kudeng binor luk tekilu' luk na inan merapet. Ngaceku lun luk ngimet nedeh pebala dengan medita' niat, ideh miak pitayen pad lun Masir pana' meriruh.”