HOSIA 6 - BALA LUK DO'

Pupu Ineh Siayu Lumi Inan Tuhan

¹ Do' tau lumi inan Tuhan. Ieh nengeramit netau, iamo' kali' rungen Ieh miak ngedo' netau. Ieh pangeh nengurat netau, iamo' naké Ieh ngabet urat tau lek?

² Pangeh dueh aco Ieh miak ngulun netau, idi aco luk keteluh Ieh miak nui netau, pad tau mulun pa kiungNeh.

³ Do' tau nutun ngiti Tuhan. Kali' rungen Ieh amé' netau mepad kudeng aco masat. Ieh miak amé' netau mepad kudeng udan luk mubpur tibu-tibu kareb nibu.

⁴ Iamo' kebala Tuhan, “O Israil idi Yahuda, anunké luk ruenKu kuan muyuh? Awa muyuh Negku saget buro mepad kudeng laput pa pekak. Ieh ineh mepad kudeng ipup luk buro kareb mét idang.

⁵ Ngaceku ineh Ui nengecuk nabi-nabiKu mada' nemuyuh ratnan ukum idi usagKu. Luk pianKu kuan pupuKu megala'.

⁶ Ui pian ku awa muyuh luk lutep, baken ku baré pung. Ui pian ruen pupuKu ngiti. Na Ui pian ku baré luk sabpen.

⁷ “Iamo' kareb pupu ini nesemuet bang bawang luk pijani' ineh, ideh ngelaba jani' luk inau'Ku kuandeh.

⁸ Giliad ineh aceh bawang luk mepanu' ku lemulun luk dat idi luk ngaté.

⁹ Imam-imamdeh mepad kudeng aceh riudan lun luk mando luk ngabang lemulun. Maya' dalan amé' déi' su luk meligan déi' Sikem pana' ideh ngaté lemulun. Ideh nganau' kekamen luk dat dengan rungen!

¹⁰ Ui pangeh nenier aceh kekamen luk dat déi' Israil: pupuKu pangeh nengelutak bururdeh ku sembayang inan akang.

¹¹ “O lun Yahuda, Ui pangeh nengeletep aceh kareb ngukum nemuyuh ngaceku kekamen muyuh luk dat.