HOSIA 5 - BALA LUK DO'

¹ “O muyuh lun imam, ninger bala ini! O muyuh lun Israil, ninger do'-do'! O muyuh luk tetek ruma' raca', ninger! Petulu muyuh ngukum nelun baken, iamo' muyuh sebuleng miak kumin.

² Muyuh pangeh mangun ku aceh abpung déi' Mispa, idi aceh rabat luun Surud Tabor. Muyuh sikal metueh, pad muyuh ucet nganau' sala', idi Ui ngukum amung-amung muyuh.

³ Ui kali' kekamen lun Israil — na ideh miak sigapung rat Negku. Israil na lutep maya Negku idi pupu ineh pangeh nengelutak bururdeh.”

Hosia Mebpeng Na Sembayang Inan Akang

⁴ Kekamen lun Israil luk dat ngetueh niatdeh pad ideh na lumi inan Allah. Ideh mangun ku demulun akang, pad ideh na manu inan Tuhan.

⁵ Dita' niat lun Israil luk ngadu' bururdeh sebuleng. Sala'deh nganau' nedeh metebaceng idi mebpeh, idi lun Yahuda pana' mebpeh metebaya' dengandeh.

⁶ Sagan tu pana' ideh nguit dumba idi sapi'deh mangun ku baré kuan Tuhan, na ulekneh. Ideh na miak kali' Neneh, ngaceku Ieh pangeh nenecan nedeh.

⁷ Ideh nemasui Tuhan, idi na lutep maya' Neneh; idi anakdeh pana' baken anak Tuhan. Ngaceku ineh tana'deh miak uen ngusag.

Bunu' Arang Lun Yahuda Dengan Lun Israil

⁸ Nateg tawak déi' Gibia idi déi' Rama pana'! Ngitang déi' Baitel! Amé' pebunu', O lun Beniamin!

⁹ Israil uen ngusag kareb aco ukumneh. Ui mada' arang pupu-pupu Israil ratnan luk na miak na mangun!

¹⁰ Kebala Tuhan, “Ui museh ngaceku lun luk ngimet Yahuda pangeh nemano tana' kinanak-kinanakdeh, idi Ui miak ngacing ukum kuandeh mepad kudeng tubu' belen.

¹¹ Israil inan susa'. Tana'neh sebuleng pangeh inaro ngaceku ieh nemutuh pedengan ratnan akang luk na miak ngedengan neneh.

¹² Ngaceku ineh Ui miak ngusag Israil idi lun Yahuda pana'.

¹³ “Kareb Israil nekali' étneh, idi Yahuda nenier uratneh, idi Israil iné' déi' Asur mutuh raca' rayeh ngedengan nedeh, iamo' na ieh miak ngedo' étdeh idi uratdeh ineh.

¹⁴ Ui miak ngeramit nelun Israil idi Yahuda mepad kudeng balang luk mesangit. Ui sebuleng miak ngeramit nedeh idi necan nedeh. Ui miak naban nedeh pad seburur pana' nateh luk miak ngulun nedeh.

¹⁵ “Ui miak necan pupuKu pad ideh medereh ku sala'deh, idi ideh amé' nakap Negku. Kian bang derehdeh ideh nutun nakap Negku lek.”