HOSIA 2 - BALA LUK DO'

¹ Ngaceku ineh do' neten kinanakmu lun Israil “Pupu Allah” idi “Luk Inan Tuhan Méi'.”

Gomer Na Lutep — Israil Na Lutep

² O anak-anakKu, do' ngubuk tinan muyuh — sagan tu pana' ieh na lutep Negku, idi Ui baken kudeng awanneh. Ngubuk neneh pad ieh na mesawa' idi na pasét.

³ Kudeng ieh na ugka', Ui miak ngelebpa neneh, pad ayuneh mepad kudeng kareb ieh tinganak. Ui miak nganau' neneh mepad kudeng tana' luk metugeh, pad ieh maté ku paring.

⁴ Na Ui méi' nan anak-anakneh; ngaceku ideh tinganak bang sét

⁵ kuan decur luk mesawa' luk na migu'. Kebala decur ineh, “Ui amé' nakap deléi-deléi luk mawa negku. Ideh maré akan idi luk rupenku, buluh dumba, idi kibung pu, umau saitun, idi abpa' anggur.”

⁶ Ngaceku ineh Ui sikal ngelibung neneh ku kayuh luk metabpa' idi ku aceh ar teh.

⁷ Ieh pian ngerada' deléi-deléi luk inanneh mawa, iamo' na ieh miak remuat. Ieh nakap nedeh iamo na kali' nedeh. Idi ieh miak pabala, “Ui pian lemubed amé' inan awanku luk atun ngaceku atun ui meluun do' ratnan ulunku nekini.”

⁸ Na ieh nengamo' Ui ini luk nemaré padé, abpa' anggur, idi umau saitun neneh. Idi teh Ui nemaré mula' pirak idi amas neneh, iamo' ieh nemaré ineh kuan akang Baal.

⁹ Ngaceku ineh kareb ngeranih, Ui miak ngalap padé idi abpa' anggur luk biréKu neneh, idi teh Ui ngalap buluh dumba idi kibung pu luk biréKu ku ayungneh.

¹⁰ Ui miak ngelebpa neneh pa kiung amung deléi luk inanneh mawa, pad seburur pana' nateh luk miak muit neneh ratnan laludKu.

¹¹ Ui miak ngagka' awang niatneh, irauneh luk anid lak, aco rayehneh luk anid bulan, idi tebubpunneh luk anid-anid minggu — ieh ineh amung-amung aco luk inanneh sembayang.

¹² Ui miak ngusag kabun anggur idi kabun gita'neh luk bilaneh pangeh biré deléi-deléi luk inanneh mawa ku tabparneh. Ui miak ngisu' kabun anggur idi gita'neh mangun ku pulung, pad pung luk meliput ngusag ineh.

¹³ Ui ngukum neneh ngaceku ieh mekelupan Negku — kareb ieh ngeseb umau luk do' buen kuan Baal idi akreb ieh nengayung ku baréneh idi nengerada' deléi-deléi luk inanneh mawa. Tuhan pangeh nepebala.

Awa Tuhan Inan PupuNeh

¹⁴ Ngaceku ineh Ui pian nguit neneh amé' déi' su luk ali-ali teh, pad Ui ngubuk neneh dengan awaKu.

¹⁵ Idi teh Ui maré kabun anggurneh lemubed kuanneh, pad Raked Susa' mangun ku tanga' rapet. Ieh mawa Negku mepad kudeng kareb ieh anak adi', kareb ieh neburo rat bawang Masir.

¹⁶ Sekua' teh ieh neten Negku awanneh, idi na ieh neten Negku akang Baalneh.

¹⁷ Idi na Ui nima' neneh neten ngadan Baal baruh teh.

¹⁸ Kareb ineh Ui nganau' aceh jani' dengan pung idi suit luk meliput, pad ideh na ngedereh pupuKu. Ui nala' amung repapeh pebunu' rat bang bawang — amung pelapet idi binor — pad pupuKu do' udeng idi na inan susa'.

¹⁹ O Israil, Ui ngalap namu mangun ku awanKu, macing ruked-ruked; Ui nganau' luk matu idi luk mesiri; Ui ngegala' éi idi awaKu luk lutep.

²⁰ Ui maya' jani'Ku idi ngalap namu, pad iko kali' Ui ini Tuhan.

²¹ Kareb ineh Ui ngua' sembayang pupuKu Yesril. Ui maré udan luun tana',

²² pad tana' ngeruat padé, bua' anggur, idi bua' saitun.

²³ Ui ngeletep pupuKu bang bawang, idi ngeperuan nedeh. Ui miak méi' inan lemulun luk titen “Na Inan Méi',” idi pebala nan lemulun luk titen, “Baken PupuKu.” “Muyuh ineh pupuKu.” Idi ideh ngor balaKu, “Iko ineh Allah kai.”