HOSIA 14 - BALA LUK DO'

Ubuk Hosia Nelun Israil

¹ O lun Israil, lumi inan Tuhan Allah muyuh! Muyuh metebaceng ngaceku sala' muyuh.

² Do' lumi inan Tuhan, idi nima' sembayang ini mangun ku aceh baré kuanNeh: “Maré do' ratnan amung-amung sala' kai, idi ninger sembayang kai, pelé kai ngubur Namu mepad kudeng luk pijani' kai.

³ Asur na miak ngulun nekai, idi keréta bunu' na miak matar nekai. Idi na kai sikal pebala inan akang kai teh, ‘Muyuh ini allah kai.’ O Tuhan, kai ngamo, Iko mo' luk méi' inan anak maté.”

Tuhan Pejani' Maré Ulun Luk Mebaruh Kuan Israil

⁴ Kebala Tuhan, Ui miak nguli' pupuKu. Ui miak mawa nedeh dengan amung niatKu, ngaceku na Ui museh nedeh nekini.

⁵ Ui miak mangun ku ipup kuan Israil, pad ieh kebusak mepad kudeng bunga' okit. Ideh miak inan uat mepad kudeng kayuh luun Pegkung Lebanon.

⁶ Ideh miak nginulih pad ideh do' ayu, mepad kudeng saitun. Idi ideh do' buen, mepad kudeng tumuh luun Pegkung Lebanon.

⁷ Sekua' teh Ui mangun ku libungdeh. Ideh miak do' ulun mepad kudeng luk tinibu, idi kebua' mepad kudeng anggur. Ideh miak mebala mepad kudeng abpa' anggur rat Lebanon.

⁸ Lun Israil na sikal sembayang inan akang teh, Ui ngua' sembayangdeh idi ngasa' nedeh. Ui ngelungung nedeh mepad kudeng aceh kayuh. Ui ini lawa amung-amung peruandeh.

Bala Luk Muci

⁹ Do' lemulun luk mileh nakap ilung bala luk inayud bang surat ini, idi nganug ineh bang niatdeh. Amung dalan Tuhan ineh matu, idi lemulun luk matu mulun maya' dalan ineh, iamo' lemulun luk mesala' metebaceng.