HOSIA 12 - BALA LUK DO'

¹ Amung-amung luk ruen lun Israil rat pekak macing medacem na ulekneh. Ideh mebalih idi ngurat lemulun. Ideh perurum ni Asur, idi pepua' dengan Masir.”

² Tuhan inan adu' nelun Yahuda. Ieh pian ngukum bawang Israil ngaceku kekamen pupuneh. Ieh sikal ngua' kekamendeh luk dat.

³ Tepundeh Yakub nenaluk kinanakneh kareb didueh lakat bang nakan tinan didueh, idi kareb Yakub rayeh, ieh pekakem dengan Allah.

⁴ Ieh pekakem dengan seburur melaikat, pad ieh metueh. Yakub nenangi' idi nemutuh uen ngeperuan. Tuhan iné' ngikak tepun tau Yakub déi' Baitel, idi déi' Ieh nepebala neneh.

⁵ Idi Ieh ineh Tuhan Allah luk Melalud — Tuhan ieh ineh ngadan luk buren.

⁶ O muyuh lun inul Yakub, do' merapet inan Allah muyuh idi lumi Neneh. Do' muyuh lutep idi mesiri idi nginulat pedengan ratnan Allah muyuh dengan mulai niat.

Bala Ratnan Ukum Teh

⁷ Kebala Tuhan, “Lun Israil mepad kilu' kudeng lun Kanaani; ku timang luk na matu bang paladdeh ideh pian naluk lemulun luk melih.

⁸ Iamo' kebaladeh, ‘Kai lun do'. Kai pangeh nengalap mula' binaweh. Seburur pana' nateh luk miak ngadu' nekai ratnan ngalap binaweh dengan naluk.’

⁹ Ui ini Tuhan Allah muyuh luk nguit nemuyuh remuat rat bang bawang Masir. Idi Ui miak nganau' nemuyuh tudo bang lepo kibung sekua' teh, mepad kudeng kareb Ui iné' ngikak nemuyuh déi' su luk ali-ali.

¹⁰ “Ui nepebala inan nabi-nabi idi nemaré tuda'-tuda' luk sinierdeh. Idi dengan bala nabi Ui miak ngacing ukum.

¹¹ Déi' Giliad ideh sembayang inan akang. Lemulun luk sembayang inan akang ineh miak maté. Déi' Gilgal sapi' deléi' barén sabpen, ngaceku ineh amung bubpundeh miak uen ngusag pad mangun ku tuda'-tuda' bubpun batu luun natad.”

¹² Tepun tau Yakub neburo iné' bawang Mesapotamia, su luk inanneh nengasa' dumba lun baken, pad ieh ngalap awan.

¹³ Tuhan nengecuk seburur nabi nguit nelun Israil remuat rat bang bawang Masir. Ieh nengecuk seburur nabi ngasa' nedeh!

¹⁴ Lun Israil pangeh nengegio useh Tuhan; petulu ideh ngalap ukum maté, idi na Allah pian maré do' nedeh. Ieh pian ngukun nedeh ngaceku igu' luk icingdeh Neneh.