HOSIA 11 - BALA LUK DO'

Awa Allah Inan PupuNeh Luk Ara' Maya' Neneh

¹ “Kareb Israil anak, Ui mawa neneh; kareb ieh nenalan rat Masir, Ui neneten neneh anakKu,

² Iamo' sagan tu pana' Ui megéi' nawar neneh, ieh teketed tu-tu rat Negku. PupuKu ineh nemaré baré kuan Baal; idi nengeseb umau luk do' buen kuan akang.

³ Iamo' Ui ini nemada' ni Israil pad ieh miak nalan. Ui nengabin nedeh; iamo' na ideh nengamo Negku luk nengasa' nedeh.

⁴ Ui nengeruid nedeh dengan awa idi éi', Ui nengabin nedeh idi nemuen nedeh; Ui netekunal maman nedeh.

⁵ “Ideh ara' lumi Negku. Ngaceku ineh na miak na ideh lemubed amé' Masir, idi Asur miak ngimet nedeh.

⁶ Bunu' miak munu' bawangdeh idi ngusag palin tanga' bawang. PupuKu miak uen ngusag bang bunu', ngaceku ideh nemaya' bada' luk dat.

⁷ Ideh neteketed rat Negku, pad ideh na miak puatin ratnan bua' sala'deh. Ideh miak ngarod ngaceku paga' luk ruen luundeh, iamo' seburur pana' nateh luk miak muit nedeh.

⁸ “O Israil, kudeng apehké Ui miak nala' nemuyuh? Kudeng apehké' Ui miak necan nemuyuh? Miakké Ui ngusag nemuyuh mepad kudeng Ui nengusag Adam, idi ngedereh nemuyuh, mepad kudeng Ui nengedereh Seboim? Na Ui mawang niat nganau' luk kudeng ineh! Ui méi' nemuyuh.

⁹ Na Ui ngukum nemuyuh dengan usehKu; Ui na ngusag Israil teh. Ngaceku Ui ini Allah, baken lemulun. Ui ini Luk Meligan idi dengan muyuh. Ui na miak amé' nemuyuh dengan useh.

¹⁰ “Ui miak ngeku mepad kudeng balang pa kiung bunu'deh, idi pupuKu miak maya' Negku. Ideh miak mesaget amé' Negku rat pa acep aco.

¹¹ Ideh miak amé' rat Masir, mepad kudeng awer suit, idi rat Asur, mepad kudeng sukur. Ui miak nguit nedeh muli'. Ui ini Tuhan pangeh nepebala.”

Israil Idi Yahuda Inukum

¹² Kebala Tuhan, “Lun Israil pangeh mebalih idi naluk pa kiungKu. Idi macing nekini lun Yahuda sikal metueh rat Negku luk lutep idi meligan.