HOSIA 10 - BALA LUK DO'

¹ Pupu Israil mepad kudeng anggur luk mula' bua'. Luk mula' binaweh, iuk mula' bubpun. Kareb mula' uli' tana'deh, idi ulung su luk inandeh sembayang iuk-iuk pelaba do' taga.

² Niatdeh panu' ku saluk, idi nekini ideh mekaneh dereh ngaceku sala'deh. Allah miak ngusag bubpundeh idi mutul ulungdeh ineh.

³ Na mio pupu ini miak pebala, “Tau na raca', ngaceku na tau matot inan Tuhan. Iamo' anunké luk miak ruen raca' kuan tau.

⁴ Ideh pegayam idi pejani' mo'-mo', idi perurum dengan bawang baken, iamo' na ulekneh. Ukum luk mesiri misu' ku ukum luk tekilu', idi mulun mepad kudeng uduh luk dat aput-aput bawang.”

⁵ Lemulun luk tudo bang bawang Samaria miak matot idi temido ngaceku sapo' deléi luk inau' ratnan amas déi' Baitel pangeh tiban. Ideh dengan imam-imam luk ngakem kuan akang ineh miak temido neneh. Ideh miak temido kareb ideh ngusag amasneh.

⁶ Akang ineh tebanen amé' déi' Asur mangun ku baré kuan raca' rayeh ineh. Israil miak uen ngigu' ngaceku bada' luk binaya'deh.

⁷ Denak-denak raca'deh na idi, mepad kudeng lapa' abpa'.

⁸ Bubpun luk dat su luk inan lun Israil sembayang inan akang miak uen ngusag. Tabpa' idi uduh miak mulun luun bubpundeh. Lun Israil miak pebala inan pegkung, “Ngapung nekai!” idi inan surud, “Mebpeh luun kai!”

Tuhan Mada' Ratnan Ukum Lun Israil

⁹ Kebala Tuhan, “Lun Israil na ugka' nganau' sala' pa kiungKu rat kareb ideh nenganau' sala' déi' Gibia. Idi ideh miak pebunu' déi' Gibia teh.

¹⁰ Ui munu' pupu ini luk mesala' idi ngukum nedeh. Tuda'-tuda' pupu miak perurum munu' nedeh, pad ideh kumin ngaceku sala'deh luk mula'.

¹¹ “Israil mepad kudeng anak sapi' luk pangeh nesibada' idi luk pian rumik padé. Iamo' Ui nenganau' paga' luun dierneh luk do' taga, dengan abetneh. Ui nengecuk Yahuda ngeradu, idi Israil icukKu ngeruid luk ku ngurar tana'.

¹² KebalaKu, ‘Nibu luk matu kuan burur muyuh sebuleng idi ngeranih amung peruan luk macing ratnan awa muyuh Negku. Ngukat tana' luk nateh inukat kuan burur muyuh sebuleng, ngaceku ini kareb luk petulu kuan muyuh, pad muyuh lumi Negku luk Tuhan muyuh, idi Ui miak amé' ngutang aceh peruan luun muyuh.’

¹³ Iamo' muyuh nenibu luk dat idi nengeranih uli'neh. Muyuh nekuman bua' balih muyuh. “Ngaceku muyuh merapet ku kekamen muyuh sebuleng idi ku baweh muyuh luk mula',

¹⁴ bunu' miak macing kuan anak itin muyuh, pad amung libung muyuh luk meraben miak uen ngusag. Aco sineh mepad kudeng aco luk inan Raca' Salman nengusag bawang Baitarbel bang bunu', idi tinan-tinan dengan anakdeh neritep pad ideh naté.

¹⁵ Idi ini luk miak mangun kuan muyuh, O muyuh lun Baitel, ngaceku kekamen muyuh luk pelaba dat. Kareb ideh ngimun pebunu', raca' Israil miak maté.”