HOSIA 1 - BALA LUK DO'

¹ Surat ini ngegala' bala luk biré Tuhan ni Hosia Biri kareb Raca'-raca' Usia, Yotam, Akas, idi Hesekia pesua ngimet bawang Yahuda, idi kareb Raca' Yerebom Yoas ngimet bawang Israil.

Awan Idi Anak-Anak Hosia

² Kareb Tuhan pun-pun pebala nelun Israil dengan tang Hosia, idi kebalaNeh neneh, “Pupu bang bawang ini na lutep Negku idi ideh sembayang inan allah baken. Ngaceku ineh do' iko ngaweh aceh decur luk na lutep namu muci; pad iko inan anak rat neneh.”

³ Ngaceku ineh Hosia nengaweh ni Gomer Diblaim. Idi ieh mali' idi nenganak aceh anak deléi.

⁴ Kebala Tuhan ni Hosia, “Do' nganau' ngadanneh, ‘Yesril' ngaceku na mio teh ui miak ngukum raca' Israil ngaceku tepunneh Yihu nengaté tuda'-tuda' lemulun déi' Yesril. Idi Ui miak ngagka' imet inul Yihu déi' Israil.

⁵ Idi kareb ineh, Ui miak ngusag baweh lun Israil, luun Raked Yesril.”

⁶ Sekua' teh Gomer mali' idi ieh nenganak aceh anak decur. Idi kebala Tuhan ni Hosia, “Do' nganau' ngadanneh, ‘Na Inan Méi',’ ngaceku Ui na miak méi' idi maré do' nelun Israil teh.

⁷ Iamo' Ui miak méi' nelun Yahuda. Ui ini Tuhan Allahdeh miak ngulun nedeh, iamo' baken ku bunu', pelapet, binor, kuda, idi lun luk maya' kuda pana'.”

⁸ Kareb Gomer nugka' niti' “Na Inan Méi',” idi ieh mali' teh idi nenganak aceh anak deléi teh.

⁹ Kebala Tuhan ni Hosia, “Do' nganau' ngadanneh, ‘Baken PupuKu,’ ngaceku muyuh ini, Israil, baken pupuKu, idi Ui ini baken Allah muyuh.”

Israil Miak Uen Ngedo'

¹⁰ Lun Israil miak mepad kudeng bada déi' tangeb abpa' rayeh, ieh ineh na mekiap. Pangeh bila nedeh, “Muyuh ini baken pupuKu,” iamo' muci bala ini miak belén nedeh, “Muyuh ini anak-anak Allah lun mulun!”

¹¹ Idi lun Yahuda idi lun Israil miak uen ngamung. Ideh sebuleng miak mili' seburur lun ngimet, idi teh ideh miak amé' mula' idi uen ngeperuan. Matu, aco Yesril ineh aco rayeh!