HAGAI 1 - BALA LUK DO'

Ratnan Ngubuk Nelun Yahuda Mudut Ruma' Allah Baruh

¹ Aceh aco bulan anem, bang lak luk kedueh kareb Raca' Darius ngimet Parsi, idi Tuhan nepebala dengan tang Nabi Hagai. Idi bala ini kuan Serubabel Saltiel, lun rayeh Yahuda, idi kuan Yosua Yosadak luk Imam Rayeh.

² Idi kebala Tuhan luk Melalud, “Lemulun ini pebala, ini baken kareb luk petulu mudut Ruma' Allah baruh.”

³ Idi Tuhan luk Melalud nemaré bala ini dengan tang Hagai:

⁴ “O pupuKu, ngudehké muyuh tudo bang ruma' luk do', iamo' Ruma'Ku sebuleng nusag?

⁵ Siruh luk mangun kuan muyuh!

⁶ Muyuh pangeh nenibu mula' padé, iamo' sesuut mo' luk piranih. Muyuh inan akan sen, iamo' na ieh miak kenen muyuh macing mebor. Muyuh inan abpa' anggur. Iamo' na muyuh miak mabuk ku ineh. Muyuh inan ayung, iamo' ineh na petap ku ayung muyuh. Idi tabpar lun luk ngakem na petap.

⁷ Siruh luk mangun kuan muyuh!

⁸ Do' muyuh amé' luun surud déi' idi ngalap kayuh. Mudut Ruma' Allah baruh, pad Ui mawang niat idi miak uen ngerayeh maya' dalan luk petulu.

⁹ “Muyuh ngerawé muyuh miak ngalap mula' padé, iamo' sesuut mo' luk ilap muyuh. Idi kareb muyuh nenguit ineh muli', idi Ui nemalid neneh. Anun punneh Ui nenganau' ineh. Ngaceku Ruma'Ku nusag, idi anid-anid burur muyuh mekél ngakem kuan ruma' muyuh sebuleng.

¹⁰ Ini punneh na mudan, idi na luk mulun.

¹¹ Ui pangeh nengacing iru' kuan tana', ieh ineh luun surud, lati', kabun anggur, kabun saitun, idi anid-anid tibu luk mulun, kuan lemulun idi pung, idi amung-amung luk tibuen pana'.”

Lun Mula' Maya' Bala Tuhan

¹² Idi Serubabel idi Yosua dengan amung lemulun luk nuli' ratnan bawang su luk inandeh tiban nemaya' luk bila Tuhan Allahdeh. Ideh matot, pad ideh nemaya' bala Nabi Hagai, lun duken Tuhan.

¹³ Idi Hagai nemada' bala Tuhan nelun mula'. KebalaNeh, “Ui idi dengan muyuh –– ini jani'Ku.”

¹⁴ Tuhan nengegio niat amung lemulun, pad ideh mudut Ruma' Allah: Serubabel luk lun rayeh Yahuda, Yosua luk Imam Rayeh, idi amung lemulun luk nuli' rat bawang su luk inandeh tiban. Ideh nengimun mudut Ruma' Allahdeh, Tuhan luk Melalud,

¹⁵ dueh ngepulu' apat aco bulan anem bang lak luk kedueh kareb imet Raca' Darius.