HABAKUK 3 - BALA LUK DO'

Sembayang Habakuk

¹ Idi ini sembayang Nabi Habakuk.

² O Tuhan, ui pangeh neninger ratnan luk inau'Mu, idi ui mepanu' ku tot. Do' nganau' bang kareb ini kekamen luk rayeh luk inau'Mu mon. Do' Iko méi', sagan pana' Iko museh.

³ Allah macing sekua' teh rat Edom, Tuhan luk meligan macing rat luun surud Paran. Langit mepanu' ku rayehNeh, idi tana' ini mepanu' ku uburNeh.

⁴ Ieh macing mepad kudeng rasat aco idi ticu'Neh merasat teh, idi laludNeh pungenNeh su ineh.

⁵ Allah ngecuk ét nalan pa atunNeh; idi até pana' duken maya' Neneh teh.

⁶ Kareb Ieh ucu' tana' meruyuh kareb Ieh nier, amung pupu megegker. Pegkung luk meruked mekurar, idi surud luk meruked pana' neturan, ieh ineh surud su luk inanNeh nenalan bang kareb luk mon.

⁷ Ui nekali' lun Kusan matot; idi lun Midian megegker.

⁸ O Tuhan, inanké amung abpa' luk nganau' Namu museh? Inanké abpa' rayeh luk nenganau' Namu megateh niat? Iko nenalan maya' laput; laput luk mitem mangun ku kerétaMu kareb Iko nenguit pupuMu pad ideh metueh.

⁹ Iko netemina' makai binorMu idi nenganau' ilebneh. KilepMu nemila' tana'.

¹⁰ Kareb amung pegkung nier Namu ideh meruyuh, idi udan nebpeh rat déi' langit. Abpa' luk pa liang tana' meberi, idi paru'deh pelaba rayeh.

¹¹ Kareb ilebMu mesilo, idi busuMu merasat, aco idi bulan nungeng.

¹² Dengan usehMu, Iko nenalan maya' uned tana', dengan gatehMu, Iko nengeradu' amung pupu.

¹³ Iko nenalan pian ngulun pupuMu, idi ngulun raca' luk pinili'Mu. Iko nengelaya' lun rayeh lemulun luk dat, idi nengusag rurum luk nemaya' neneh.

¹⁴ IlebMu nenebpek lun rayeh baweh, kareb baweh ineh iné' mepad kudeng barui, sikal matad nekai dengan medita' niat mepad kudeng lun luk ngedereh nelun luk masi' dengan lulem.

¹⁵ Dengan kudaMu, Iko nengeradu' abpa' rayeh pad ributneh melapa'.

¹⁶ Ui ini Habakuk ninger amung ini idi megegker; bibirku pana' megegker ku totku. Bururku melaya', idi kukudku metebaceng. Ui miak nginulat karebneh macing, kareb Allah miak ngukum lemulun luk munu' nekai.

¹⁷ Sagan tu pana' gita' na kebua', idi bua' anggur pana' nateh luk idi. Idi teh saitun na kebua', idi lati' pana' na inan uli'; Sagan pana' amung dumba maté, idi laman sapi' na uang,

¹⁸ idi Ui miak mawang niat, ngaceku Tuhan Allah ineh Lun Nengulun negku.

¹⁹ Tuhan maré tueh negku. Ieh nganau' negku mawer mepad kudeng awer payo, idi nima' negku nalan su luk medita' idi su luk do' pana'.