HABAKUK 2 - BALA LUK DO'

Or Tuhan Ni Habakuk

¹ Ui miak umak pudutku luk medita' amé' nginita, pad ui kali' luk duken Tuhan belénku, idi ui nguit orNeh ratnan luk inadu'ku ineh.

² Tuhan nemaré or ini negku, “Do' ngayud luun balad tana' salit, luk ruenKu ngelio namu, pad ineh malé uen maca'!

³ Do' ngayud ineh, ngaceku karebneh nateh nacing kareb amung ineh miak mangun. Iamo' karebneh malé macing, idi luk bida'Ku namu miak mangun. Ayuneh mio macing, iamo' do' nginulat neneh. Ieh miak mangun bang kareb luk litepKu, idi na miak mio ratnan ineh.

⁴ Idi ini balaKu, ‘Lemulun luk dat na miak mulun. Iamo' lemulun luk matu miak mulun ngaceku ideh lutep manu inan Allah.’ ”

Ukum Kuan Lemulun Luk Na Matu

⁵ Lemulun luk mangun ku lun do' uen naluk ku binawehdeh. Lemulun luk manga medita' niat idi megagau idi na miak mebor mepad kudeng até. Ineh pundeh ngalap anid-anid bawang kuandeh.

⁶ Pupu luk linaya' ineh miak situnga nelun luk ngelaya' nedeh. Kebaladeh, “Muyuh ngalap luk na muyuh kuan, iamo' muyuh miak kumin! Tuda' ioké muyuh amé' ku lun do' ngaceku muyuh megéi' naluk nelun luk inan baleh nemuyuh?”

⁷ Bang segageh mo', muyuh pana' inan baleh nelun, idi uen ngesaad mayar bunga'neh. Bunu'-bunu' miak macing ngegegker nemuyuh. Ideh miak ngaro binaweh muyuh!

⁸ Muyuh pangeh nengaro tuda'-tuda' pupu. Idi pupu luk neketecan miak ngaro nemuyuh, ngaceku muyuh pangeh nengaté lemulun idi nenganau' luk dat kuan amung-amung pupu bang tana' ini idi bawangdeh pana'.

⁹ Muyuh miak kumin! Tetek ruma' muyuh inau' muyuh ku lun do' ku binaweh luk pino muyuh. Idi muyuh pian nganau' arar muyuh su luk medita', pad muyuh na mekaneh susa'.

¹⁰ Muyuh pangeh nengigu' tetek ruma' muyuh ngaceku terawé muyuh luk medita' niat. Muyuh pangeh nengusag ulun muyuh sebuleng, ngaceku muyuh nengusag tuda'-tuda' pupu.

¹¹ Batu ratnan libung luk meraben miak ngitang ngadu' nemuyuh, idi iang apo pana' melinguh.

¹² Muyuh miak kumin! Muyuh nemudut aceh bawang luun alen sala' idi até pana'.

¹³ Amung-amung pupu luk linaya' muyuh merur ngakem nganau' luk na ulek, idi amung luk pinudutdeh meseb. Tuhan luk Melalud pangeh nenganau' ineh.

¹⁴ Tana' ini miak mepanu' ku ileh ratnan ubur Allah, mepad kudeng abpa' rayeh luk nepanu' ku abpa'.

¹⁵ Muyuh miak kumin! Mesusa' kuan lemulun luk nguit nelun denganneh ngirup, luk ngutang luk megalih pad ideh mabuk, pad ideh nganau' kekamen luk na tabpen.

¹⁶ Nekini iko uen ngigu', idi na iko buren. Iko sebuleng luk mabuk idi nganau' luk na tabpen. Iko miak ngirup ratnan sangkir ukum Tuhan. Idi rayehmu misu' ku igu.

¹⁷ Muyuh nebpeng amung pulung Lebanon, idi nekini muyuh miak uen nebpeng. Muyuh nengaté pung luk bang pulung ineh, idi nekini pung ineh ngatot nemuyuh. Ini mangun ngaceku muyuh nengaté mula' lemulun idi muyuh nengedereh lemulun bang tana' idi nengusag bawangdeh.

¹⁸ Anunké ulek akang ineh? Ieh luk inau' lemulun mo', idi na ineh mada' luk matu kuan muyuh. Anunké do' luk ruenneh kuan lun luk mudut ineh, pad ieh merapet ku ineh. Ieh ineh aceh allah luk na miak pebala!

¹⁹ Muyuh miak kumin. Muyuh pebala inan kayuh, “Kulat iko!” idi inan batu luk ungeng, “Tumui, iko!” Miakké akang ineh mada' luk anun-anun? Sagan tu pana' ieh kikep ku pirak idi amas, na luk idi ulun bang neneh.

²⁰ Tuhan idi bang Ruma'Neh luk meligan. Do' amung lemulun bang tana' ini pirud pa kiungNeh.