HABAKUK 1 - BALA LUK DO'

¹ Ini bala luk linio Tuhan ni Nabi Habakuk.

Adu' Habakuk Ratnan Luk Na Mesiri

² O Tuhan, tuda' ioké ui miak nawar Namu mutuh pedengan kareb nateh Iko ninger, idi ngulun nekai rat nelun luk ngedereh nekai?

³ Ngudehké Iko nganau' negku nier susa' idi dat luk kudeng ineh? Até idi luk ngedereh idi libut-libutku. Iapeh-iapeh pana' ideh pebunu' idi pekedaluh.

⁴ Ukum ineh melaya' idi na ulekneh, idi na lun luk mutut ukum luk mesiri. Ideh mutut luk tekilu', idi lun luk dat metueh rat nelun luk matu.

Or Tuhan

⁵ Kebala Tuhan kuan pupuNeh, “Do' nier amung-amung pupu luk libut-libut muyuh, idi muyuh miak mawa ratnan luk siren muyuh. Ui sikal nganau' aceh luk inan muyuh na manu kareb muyuh ninger bala ineh.

⁶ Ui ngikit nelun Babil luk mesangit idi mekuu' ineh. Ideh nalan amé' mado pian ngelaya' bawang baken.

⁷ Ideh ngacing tot, idi ideh na maya' ukum, iamo' merapet inan laluddeh sebuleng.

⁸ “Kudadeh meluun awer ratnan kuir, idi meluun sangit idi melau ratnan bungalé. Lun pebunu'deh luk maya' kuda macing rat mado. Idi kudadeh peritamid. Ideh ngeladai mepad kudeng kanui.

⁹ “Bawehdeh nalan petacu pian ngaro amung bawang, idi amung lemulun matot ku acingdeh. Lun luk tibandeh na mekiap, mepad kudeng bada.

¹⁰ Ideh situnga inan raca'-raca', idi meriruh inan lun rayeh-rayeh. Sebuleng libung luk meraben pana' nateh luk miak ngagka' nedeh. Ideh muun tana' ku dalandeh umak, pad ideh ngalap bawang ineh.

¹¹ Ideh lemaba mepad kudeng bui, idi ideh na idi peh. Ideh ineh lemulun luk sembayang inan laluddeh sebuleng.”

Adu' Habakuk Luk Kedueh Inan Tuhan

¹² O Tuhan, Iko luk Allah rat pun-pun. Iko ineh luk Allahku luk meligan idi meruked. Tuhan Allahku, Iko luk matar negku. Iko pangeh nemili' idi nengetueh nelun Babil, pad ideh miak ngukum nekai.

¹³ Iamo' kudeng apehké Iko tuman nier lemulun ineh luk naluk idi dat? MatehMu meluun meligan, pad Iko na miak nier luk dat, idi Iko na tuman nier lemulun luk nganau' sala'. Ngudehké Iko pirud kareb ideh ngaté lemulun luk meluun siri ratnan bururdeh sebuleng?

¹⁴ Kudeng apehké Iko miak nganau' lemulun mepad kudeng lawid idi mepad kudeng dara' luk nalan pekarur?

¹⁵ Lun Babil ngeluit lemulun mepad kudeng lawid. Ideh ngerabat nedeh. Idi ideh ngitang mawang niat, ngaceku luk ilapdeh!

¹⁶ Ideh sembayang inan rabatdeh, idi maré baré kuandeh, ngaceku rabatdeh maré amung-amung luk meluun do' nedeh.

¹⁷ Miakké ideh makai pelapetdeh macing ruked-ruked, pad ngaté amung pupu dengan na méi'?