ESTER 9 - BALA LUK DO'

Lun Yahudi Nengaté Bunu'deh

¹ Idi pulu' teluh aco bulan Adar, ieh ineh aco luk inan ukum raca' mangun. Idi bang aco sineh bunu' lun Yahudi merapet ngelaya' nedeh. Iamo' setuneh lun Yahudi nengelaya' nedeh.

² Bang anid ruma' lun Yahudi bang anid bawang aput imet Ahasuiras, lun Yahudi netemina' munu' lemulun luk ngerieng nedeh.

³ Setuneh amung lun rayeh bawang, ieh ineh pengulu, lun luk ngimet, idi lun luk duken raca' nengedengan nelun Yahudi, ngaceku ideh matot ni Mordekai.

⁴ Aput imet ineh Mordekai mebala, ngaceku ieh luk meluun rayeh bang ruma' raca', idi tuehneh iuk-iuk amé' rayeh.

⁵ Idi lun Yahudi munu' bunu'deh maya' piandeh. Ideh munu' nedeh ku pelapet idi ngaté nedeh.

⁶ Déi' Susa, ieh ineh bawang rayeh, lun Yahudi nengaté limeh ngeratu lemulun.

⁷ Idi teh ideh nengaté Parsandata, Dalpon, Aspata,

⁸ Porata, Adalia, Aridata,

⁹ Paramasta, Arisai, Aridai, idi Baisata,

¹⁰ ieh ineh pulu' anak Haman Hamedata, luk bunu' lun Yahudi ineh. Iamo' na ideh nengaro binaweh bunu'deh.

¹¹ Bang aco sineh kinula' lemulun luk pinaté déi' Susa, pangeh bida' nan raca'.

¹² Idi kebala raca' inan Raca' Decur Ester, “Lun Yahudi pangeh nengaté 500 lemulun déi' Susa mo', dengan pulu' anak Haman. Kudeng apehké luk inau'deh bang amung bawang luk isuut? Anunké luk pianmu nekini? Iko miak ngalap ineh. Do' mada' luk pianmu negku, pad iko ngalap ineh.”

¹³ Kebala Ester, “Kudeng pianmu, nima' nelun Yahudi déi' Susa nganau' luk inau'deh aco sini nebpa teh. Idi ngecuk nelun ngekito butung pulu' anak Haman luun su luk inan ngekito lemulun.”

¹⁴ Idi raca' nengecuk nganau' luk kudeng ineh, idi ukumneh bida' déi' Susa. Idi pulu' butung anak Haman tikito siren amung lemulun.

¹⁵ Idi pulu' apat aco bulan Adar, lun Yahudi luk tudo déi' Susa nepamung idi nengaté 300 burur lemulun bang bawang ineh. Iamo' na ideh nengaro binawehdeh.

¹⁶ Lun Yahudi bang amung bawang luk isuut pana' netemina' matar bururdeh. Ideh nengaté 75,000 lemulun luk megateh nedeh, pad ideh mepuit ratnan bunu'deh. Iamo' na ideh nengaro binawehdeh.

¹⁷ Ieh ineh pulu' teluh aco bulan Adar. Kenebpa ieh ineh pulu' apat aco bulan ineh na ideh nengaté lemulun teh, iamo' ideh nenganau' irau dengan mawang niat.

¹⁸ Iamo' lun Yahudi déi' Susa nenganau' aco rayeh kareb pulu' limeh aco bulan ineh, ngaceku ideh nengaté bunu'deh kareb pulu' teluh aco bulan idi pulu' apat aco bulan, idi ideh nugka' pulu' limeh aco bulan ineh.

¹⁹ Ineh punneh lun Yahudi luk tudo bang bawang luk isuut luk na libung batu, ngerayeh pulu' apat aco bulan Adar pelé ideh nganau' irau, idi ideh pebaré luk kenen arangdeh sebuleng bang aco sineh.

Irau Nala' Udi

²⁰ Idi Mordekai nengecuk nelun ngayud ratnan amung-amung luk nangun. Ieh nemaré surat kuan amung lun Yahudi luk muneng idi luk mado, aput imet Parsi,

²¹ ngecuk nedeh nganau' aco rayeh kareb pulu' apat idi pulu' limeh aco bulan Adar bang anid lak.

²² Ieh ineh aco luk inan lun Yahudi nepuit ratnan bunu'deh; ieh ineh aceh bulan susa' idi dat niat luk inisu' mangun ku aceh kareb awang idi do' ria'. Ideh icuk ngerayeh aco ini dengan nganau' irau, idi pebaré luk kenen kuan bururdeh sebuleng idi kuan lun masi' pana'.

²³ Idi lun Yahudi nemaya' bala Mordekai, idi aco rayeh ineh uen maya' anid-anid lak.

²⁴ Haman Hamedata luk inul Agag, ieh ineh bunu' lun Yahudi, pangeh nenala' udi luk titen “purim”, pelé ieh kali' aco luk inan ngaté nelun Yahudi. Ieh merapet ngaté nedeh macing mabud.

²⁵ Iamo' Ester iné' matun raca', idi raca' nemaré ukum luk inayud, pad Haman sebuleng nekaneh ukum luk tinina'neh kuan lun Yahudi. Ieh idi anakneh tikito luun su luk inan ngekito lemulun.

²⁶ Ineh punneh aco rayeh ineh titen Irau Nala' Udi, ngaceku ilung “Purim” ieh ineh udi. Ngaceku surat Mordekai idi ngaceku luk pangeh nangun kuandeh,

²⁷ lun Yahudi nengeletep aceh ukum kuan bururdeh sebuleng, inuldeh, idi idé-idé luk mangun ku lun Yahudi, pelé ideh ngerayeh dueh aco ineh anid lak bang kareb luk petulu, maya' bada' Mordekai.

²⁸ Pangeh litep pad anid tetek ruma' lun Yahudi bang anid bawang luk isuut idi luk rayeh, idi inuldeh luk muci pana', ngerawé idi ngerayeh Aco Nala' Udi macing ruked-ruked.

²⁹ Idi Raca' Decur Ester Abikail dengan Mordekai nengayud aceh surat dengan lalud ngadanneh pad ngeletep surat ratnan Purim luk inayud Mordekai atun ineh.

³⁰ Surat ineh barén kuan amung lun Yahudi, idi sebalad barén kuan 127 babpat bawang bang imet Parsi, pad mutuh awang idi do' udeng kuan amung lun Yahudi,

³¹ idi teh pad ngecuk nedeh maya' Aco Nala' Udi bang kareb luk petulu, mepad kudeng ideh nemaya' ukum ratnan aco mawa' idi kareb temido. Ukum ini biré Mordekai, idi Raca' Decur Ester.

³² Idi ukum Ester luk ngamo adat Purim ineh inayud bang surat.