ESTER 8 - BALA LUK DO'

Lun Yahudi Icuk Ngua'

¹ Bang aco sineh teh Raca' Ahasuiras nemaré kuan Raca' Decur Ester amung binaweh idi tana' Haman, bunu' lun Yahudi ineh. Ester nemada' raca' ratnan ieh pupu Mordekai, idi Mordekai tinawar amé' matun raca'.

² Raca' nengelengu susing etuneh (luk ilapneh lemubed rat ni Haman) idi nemaré ineh kuan Mordekai. Idi Ester nenganau' Mordekai ku lun rayeh binaweh idi tana' Haman.

³ Idi Ester netekeradung pa kiung raca' idi nengitang, mutuh neneh ngagka' dat luk icing Haman luk inul Agag kuan lun Yahudi ineh.

⁴ Idi raca' nengegenang rukud amas pa kiungneh, idi Ester netuped idi nepebala,

⁵ “Kudeng iko pian, kudeng iko méi' negku, idi kudeng ieh matu kali'mu, do' iko mutut aceh ukum pad bala Haman Hamedata luk inul Agag na uen ngacing. Ngaceku ieh nengecuk ngaté amung lun Yahudi bang imetmu.

⁶ Kudeng apehké ui tuman kudeng susa' ini macing kuan pupuku, pad pupuku sebuleng pitayen?”

⁷ Idi kebala Raca' Ahasuiras inan Raca' Decur Ester idi Mordekai lun Yahudi ineh, “Ui pangeh nengekito Haman ngaceku datneh nelun Yahudi. Ui pangeh nemaré binaweh idi tana'neh kuan Ester.

⁸ Iamo' aceh ukum luk pangeh biré bang ngadan raca' idi luk itu ku etu raca' na miak uen ngena. Iamo' iko miak ngayud anun-anun luk pianmu kuan lun Yahudi. Ieh miak uen ngayud dengan ngadanku, idi ieh miak uen ngetu ku etu raca'.”

⁹ Ini mangun dueh ngepulu' teluh aco, bulan teluh, ieh ineh bulan Siban. Mordekai nenawar nelun luk ngayud kuan raca', idi teh ieh nengecuk nedeh ngayud surat kuan lun Yahudi, pengulu, lun luk ngimet, idi lun rayeh bang 127 babpat rat India macing Sudan. Surat-surat ini inayud bang buri' anid babpat ineh, idi kuan lun Yahudi bang buri'deh sebuleng.

¹⁰ Mordekai nengecuk ngayud surat ini dengan ngadan Ahasuiras, idi ngetu surat ineh ku etu raca'. Surat ineh tinated lun luk maya kuda rat ruma' raca'.

¹¹ Surat ineh nengegala' ratnan raca' nima' nelun Yahudi bang anid bawang temina' matar burudeh. Kudeng lun pebunu' rat bang babpat sapeh pana' ngerieng nedeh, ideh miak ngua' idi ngaté nedeh perapu dengan awan idi anakdeh. Ideh miak ngaté nedeh macing mabud idi ngalap binawehdeh.

¹² Ukum ini miak bén aput imet Parsi kareb aco luk litep ngaté nelun Yahudi, ieh ineh pulu' teluh aco bulan pulu' dueh, ieh ineh bulan Adar.

¹³ Ineh ginala' mangun ku ukum bang anid-anid babpat, pelé lun Yahudi temina' matar bururdeh ratnan bunu'deh bang aco sineh.

¹⁴ Maya' ecuk raca' lun luk maya' kuda raca' nenalan dengan mesaget. Ukum ineh ginala' déi' Susa pana', ieh ineh bawang rayeh.

¹⁵ Mordekai nenalan rat ruma' raca', inayung ku kuyu' luk mebata' idi mebuda', idi kuyu' luk meboyor ratnan kibung pu luk sia' merirem, idi pata amas luk pelaba do'. Idi déi' luun dalan Susa ideh ngitang ku awang niatdeh.

¹⁶ Idi lun Yahudi mawang niat idi meran niat ngaceku ideh kali' ideh uen ngetueh.

¹⁷ Bang anid-anid babpat idi bawang, su apeh ukum raca' pangeh bica', lun Yahudi nenganau' aco rayeh, idi nenganau' irau dengan mawang niat. Idi teh mula' lun baken nengisu' adatdeh mangun ku lun Yahudi, ngaceku ideh matot nedeh nekini.