ESTER 7 - BALA LUK DO'

¹ Raca' idi Haman iné' kuman déi' ruma' Ester

² luk kedueh kua'. Kareb ideh ngirup, raca' nengitun neneh, “O Raca' Decur Ester, anunké luk pianmu? Mada' negku, pad iko ngalap ineh, sagan tu pana' setangal imetku.”

³ Idi kebala Ester, “Kudeng iko pian ngua' putuhku ini, ui mutuh pian mulun idi pupuku pana'.

⁴ Ui ini idi pupuku pangeh pinasui pad miak pitayen macing mabud. Kudeng kai pisuen mangun ku demulun, kali' rungen ui ungeng idi na ngesusa' raca' ku dereh kai.”

⁵ Idi Raca' Ahasuiras nengitun ni Ester, kebalaneh, “Idéké mekuu' nganau' luk kudeng ineh? Iapehké lemulun ineh?”

⁶ Idi kebala Ester, “Bunu' kai idi lun luk ngedereh nekai, ieh ineh lemulun ini luk dat, Haman!” Idi Haman pelaba tot.

⁷ Dengan megateh niat raca' neburo rat bang takep idi iné' bang kabun luk iring ruma' raca'. Idi Haman kali' raca' sikal ngukum neneh, idi ieh neketecan pian mutuh Raca' Decur Ester ngulun neneh.

⁸ Kareb raca' nelemubed rat bang kabun iné' bang takep Ester, Haman siebpeh luun kerusi Ester pian mutuh éi'. Idi raca' nengitang, “Miakké lemulun ini pasét nan Raca' Decur pa kiungku bang ruma'ku ini?” Kareb raca' pangeh nepebala, lun luk pinani' nemapen uluh Haman.

⁹ Idi kebala sebururdeh, ieh ineh Harbona, “Haman pangeh nemudut aceh su luk inan ngekito ni Mordekai déi' ruma'neh, kidita'neh 12 depeh setangal! Idi Mordekai ineh luk nengulun raca'.” Idi kebala raca', “Ngekito Haman luun ineh!”

¹⁰ Idi Haman tikito luun ineh luk tinina'neh kuan Mordekai. Pangeh ineh useh raca' nugka'.