ESTER 6 - BALA LUK DO'

Raca' Ngikit Mordekai

¹ Dacem ineh raca' na medacep mateh, idi ieh nengecuk nelun duken nguit surat imet pad uen maca' kuanneh.

² Babpat luk bica'deh, ieh ineh ratnan Mordekai luk pangeh nekali' aceh gayam Bigtana idi Teris, dueh burur lun luk pinani' luk matar takep raca'. Idi didueh sikal ngaté raca'.

³ Idi raca' nengitun, kebalaneh, “Pangehké tau ngedita' idi ngua' do' Mordekai ineh?” Idi kebala lun dukenneh, “Na luk inau' kuanneh.”

⁴ Kebala raca' “Inanké lun rayehku tungé' ruma'ku?” Idi Haman, luk pian mutuh raca' ngekito Mordekai su luk inan ngekito luk pangeh tinana'neh, iné' luun natad.

⁵ Idi kebala lun duken raca', “Haman idi tungé' pian papu' namu.” Idi kebala raca', “Mutuh neneh semuet.”

⁶ Haman nesemuet, idi kebala raca' neneh, “Inan seburur lemulun luk ui pian uen ngedita'. Anunké luk petulu ruenku kuan lemulun ineh?” Idi Haman nengerawé, “Idéké luk belén raca' uen ngedita' lek? Kali' rungen ui lek.”

^7-8 Idi ieh nengor bala raca', “Do' nguit kuyu raca' luk pangeh pikaimu kuan lemulun ini. Idi ngayung bang tang kudamu ku belawan luk do'.

⁹ Idi ngecuk lunmu luk meluun rayeh ngayung lemulun ineh ku kuyu'mu ineh, idi nguit neneh maya' luun kuda nalan lemaba bawang. Idi ngecuk lun rayehmu ngitang kareb didueh nalan: ‘Do' nier ua' raca' kuan lemulun luk ruenneh ngedita'!’ ”

¹⁰ Idi kebala raca' ni Haman, “Miket iko ngalap kuyu' idi kuda ineh pad ngedita' ni Mordekai lun Yahudi ineh. Do' nganau' kuanneh amung-amung luk pangeh bilamu. Ieh tudo munung tanga' ruma'ku.”

¹¹ Idi Haman nengalap kuyuh' idi kuda raca'. Ieh nengayung Mordekai ku kuyu' ineh. Idi Mordekai nemaya' luun kuda, idi Haman nenguit neneh nalan lemaba bawang idi nengitang kuan lun mula' maya' dalan, “Do' nier ua' raca' kuan lemulun luk ruenneh ngedita'!”

¹² Pangeh ineh Mordekai iné' munung tanga' ruma' raca'. Idi Haman ngebpu kiungneh idi nuli' dengan igu'.

¹³ Idi ieh nemada' awanneh idi lun rurumneh ratnan luk nangun kuanneh. Idi kebala awanneh idi lun rurumneh luk mileh ineh neneh, “Iko ngimun uen ngebeneh pa kiung Mordekai. Ieh ineh lun Yahudi, idi iko na miak tumam pa kiungneh. Kali' rungen iko mebpeh sirenneh.”

Haman Pinaté

¹⁴ Laba' ideh pegayam, lun luk pinani' rat ruma' raca' nacing pian nated ni Haman amé' ku irau Ester.