ESTER 5 - BALA LUK DO'

Ester Nawar Ni Raca' Idi Haman Amé' Ku Irau

¹ Aco luk keteluh kareb ieh mawa', Ester nengayung ku ayung raca' decur, idi ieh iné' tuped luun natad luk bal alad ruma' raca' petutup tekep kerusi raca'. Raca' idi luun kerusineh.

² Kareb raca' nekali' Ester tuped bal takep, ieh mawang niat neneh, idi ieh nenatang rukudneh luk ratnan amas. Idi Ester iné' ngakem papedneh.

³ “Anun pianmu, Raca' Decur Ester?” kebala raca' neneh. “Ui maré luk pianmu sagan tu pana' setangal imetku.”

⁴ Idi kebala Ester, “Kudeng iko pian, ui nawar namu idi Haman amé' ku irau luk ruenku temina' kuan medueh bang malem ini.”

⁵ Idi raca' nenawar Haman miket amé', pad didueh amé' ku irau Ester. Idi didueh iné'.

⁶ Kareb didueh ngirup, raca' nengitun ni Ester, kebalaneh, “Mada' negku luk pianmu, pad iko ngalap ineh sagan tu pana' setangal imetku.”

⁷ Idi kebala Ester,

⁸ “Kudeng iko pian ngua' putuhku, ui mutuh nemedueh amé' ku irauku nebpa teh. Kareb ineh ui mada' namu ratnan luk pianku.”

Haman Nakap Dalan Ngaté Mordekai

⁹ Kareb Haman muli' ratnan irau ineh, ieh mawang niat. Iamo' kareb ieh nekali' Mordekai munung tanga' ruma' raca' ineh, idi Mordekai na nudur idi na nengedita' neneh kareb ieh lemaba, idi Haman pelaba useh neneh.

¹⁰ Iamo' ieh nengimet bururneh sebuleng idi ieh nuli'. Ieh nenawar lun rurumneh iné' ruma'neh, idi nemutuh awanneh Serés maya' nedeh.

¹¹ Ieh nepebala dengan medita' niat ratnan binawehneh luk mula', ratnan kinula' anak deléineh, idi teh ratnan kudeng apeh raca' nengikit neneh, idi ratnan ieh mebala meluun ratnan lun rayeh raca' luk baken.

¹² “Meluun teh,” kebala Haman, “Raca' Decur Ester nenganau' aceh irau kuan kai dueh i raca' sebuleng mo', idi kai tinawar amé' nebpa teh.

¹³ Iamo' amung ineh na ulek kuanku kareb ui nier Mordekai lun Yahudi ineh tudo munung tanga' ruma' raca'.”

¹⁴ Idi kebala awanneh idi amung lun rurumneh, “Do' iko ngecuk nelun nganau' aceh luk inan ngekito lemulun, kidita'neh 12 depeh setangal. Pekak nebpa iko miak mutuh raca' ngekito Mordekai luun ineh, pelé iko amé' ku irau ineh dengan mawang niat.” Idi Haman mawang niat ku bala ineh; idi ieh nemudut luk inan ngekito lemulun ineh.