ESTER 4 - BALA LUK DO'

Mordekai Mutuh Pedengan Rat Ni Ester

¹ Kareb Mordekai nekali' bala ineh, ieh nengerarak ayungneh ku susa' niatneh. Idi ieh nenacung idi lawé-lawé bang bawang dengan pelaba tangi',

² pad ieh nacing munung tanga' ruma' raca'. Na ieh nesemuet ngaceku ayungneh na petulu.

³ Idi inan tido arang lun Yahudi aput babpat-babpat imet ineh, su luk inan ukum raca' pangeh bida'. Ideh mawa' na kuman, ideh nangi', idi temido, idi lélé amung-amungdeh nenacung.

⁴ Kareb demulun Ester idi lun luk pinani' nemada' neneh ratnan luk ruen Mordekai, ieh pelaba susa' niat. Ieh nemaré ayung ni Mordekai ku libal tacung ineh, iamo' na ieh pian.

⁵ Idi Ester nenawar ni Hatak, seburur lun luk pinani' luk litep raca' mangun ku demulunneh, idi nengecuk neneh amé' papu' ni Mordekai idi ngitun anun luk mangun.

⁶ Idi Hatak iné' papu' ni Moredekai luun natad bawang rayeh luk iring munung tanga' ruma' raca'.

⁷ Mordekai nemada' neneh ratnan luk pangeh nangun neneh, idi ratnan kinula' usin luk pijani' Haman miak barén bang kas raca' kudeng amung lun Yahudi pitayen.

⁸ Ieh nemaré ni Hatak sebalad surat ukum luk pinutut déi' Susa ineh luk ngecuk ngaté nedeh. Mordekai nemutuh neneh maré surat ineh ni Ester, idi ngegala' susa' ineh kuanneh, pelé ieh amé' mutuh éi' ratnan raca' kuan pupuneh.

⁹ Hatak nenganau' kudeng ineh,

¹⁰ idi Ester nemaré bala ini iten Hatak kuan Mordekai:

¹¹ kebalaneh, “Kudeng idé-idé deléi idi decur amé' luun natad luk bal alad pian papu' raca' dengan na tinawar, lemulun ineh kali' rungen pitayen. Ieh ineh ukum raca'; amung-amung lemulun, ratnan lun rayeh-rayeh raca' macing nan anak itin luk tudo bang babpat-babpat imet, kali' ineh. Seburur pana' nateh miak mepuit ratnan ukum ineh, kudeng raca' na natang rukudneh luk ratnan amas, pad lemulun ineh na pitayen. Iamo' sebulan kinioneh raca' na nenawar negku.”

¹² Kareb Mordekai nekali' bala Ester ineh,

¹³ ieh nemaré kali' neneh, kebalaneh, “Aleg iko ngerawé iko meluun samal ratnan lun Yahudi luk baken ngaceku iko bang ruma' raca!

¹⁴ Kudeng iko ungeng bang kareb luk kudeng ini, surga miak ngedengan nelun Yahudi, pad ideh mulun, iamo' iko pitayen, idi tetek ruma' i tamam miak mabud pitayen. Kian iko mangun ku raca' decur lek ngaceku susa' luk kudeng ini.”

¹⁵ Ester nengor bala Mordekai, kebalaneh:

¹⁶ “Amé' ngamung lun Yahudi luk déi' Susa, pad ideh mawa' na kuman idi ngerawé negku. Aleg kuman idi ngirup teluh aco idi teluh dacem kinioneh. Demulunku idi ui pana' miak nganau' kudeng ineh teh. Pangeh ineh ui miak amé' papu' raca', sagan tu pana' ngelaba ukum. Kudeng ui maté, ui maté.”

¹⁷ Idi Mordekai nenalan idi nenganau' luk icuk Ester neneh.