ESTER 3 - BALA LUK DO'

Haman Sikal Ngaté Nelun Yahudi

¹ Muci' ratnan ineh Raca' Ahasuiras nengikit ni Haman Hamedata mangun ku lun rayeh bawang. Haman ineh inul Agag.

² Idi raca' nengecuk amung lun rayeh ngedita' ni Haman idi tekeradung pa kiungneh. Idi amungdeh nenganau' kudeng ineh, iamo' Mordekai ara'.

³ Lun rayeh baken bang kekamen raca' nengitun anun punneh ieh na maya' bala raca'.

⁴ Anid-anid aco ideh ngitun neneh, iamo' na Mordekai ninger baladeh. Kebalaneh, “Ui ini lun Yahudi, idi ui na miak tekeradung pa kiung Haman.” Idi ideh nemada' ni Haman pian kali' kudeng ieh miak nima' Mordekai na ngedita' neneh.

⁵ Haman megateh niat kareb ieh kali' Mordekai na miak tekeradung pa kiungneh.

⁶ Idi kareb ieh kali' Mordekai ineh lun Yahudi, ieh na pian ngaté Mordekai sebuleng, iamo' ieh nenakap dalan pad ieh miak ngaté amung lun Yahudi aput imet Parsi.

⁷ Bang bulan luk pun-pun, ieh ineh bulan Nisan bang lak luk kepulu' dueh kareb imet Ahasuiras, Haman nengecuk nala' udi (luk titen “purim”) pad kali' aco idi bulan luk petulu ngacing luk pianneh. Idi pulu' teluh aco bulan pulu' dueh, ieh ineh bulan Adar, luk litepneh.

⁸ Idi kebala Haman ni raca', “Inan aceh pupu luk pitad aput imetmu, bang anid-anid babpat. Ideh maya' adat luk baken ratnan adat lun baken. Meluun teh ideh na maya' ukum imet ini. Ngaceku ineh na petulu iko nima' nedeh.

⁹ Kudeng ineh pianmu, nganau' aceh ukum pad ideh pitayen. Kudeng iko nganau' kudeng ineh ui pejani' maré 10,000 balad pirak bang kas raca' ku mayar raga imet ini.”

¹⁰ Raca' ineh nengelengu susing etuneh, idi nemaré ineh kuan bunu' lun Yahudi, ieh ineh Haman Hamedata luk inul Agag.

¹¹ Kebala raca' neneh, “Pupu ineh idi usindeh iko kuan; do' maya' luk pianmu.”

¹² Idi pulu' teluh aco bulan luk pun-pun, Haman nenawar nelun luk ngayud kuan raca' idi nemada' aceh ukum nedeh luk uen ngelibal kuan amung-amung buri' bang imet ineh idi barén kuan amung raca', pengulu, idi lun rayeh. Idi ukum ineh biré dengan ngadan Raca' Ahasuiras idi itu ku susingneh.

¹³ Idi lun duken nupun nated bala ineh amé' nan anid babpat imet ineh. Maya' ukum ineh amung lun Yahudi luk rayeh idi luk isuut, do' decur idi anak pana' miak pitayen bang seaco, ieh ineh pulu' teluh aco bulan Adar. Ideh pitayen dengan na méi', idi binawehdeh lapen.

¹⁴ Ilung ukum ineh badén bang anid-anid babpat imet, pelé amung-amungdeh temina' kareb aco ineh macing.

¹⁵ Maya' ukum raca' lun duken ineh nupun dengan mesaget, idi ukum ineh bida' déi' Susa luk bawang rayeh bang imet ineh. Pangeh ineh raca' idi Haman netudo idi ngirup laba' bawang Susa meria' ku bala ineh.