ESTER 2 - BALA LUK DO'

Ester Manung Ku Raca' Decur

¹ Muci ratnan ineh, kareb useh raca' ugka', ieh nengerawé ratnan luk inau' Basti idi ratnan ukumneh neneh.

² Idi lun mileh luk inan raca' merapet nepebala neneh, “Do' iko ngecuk nelun nakap tuda'-tuda' burur anak adi' decur luk do' taga kuanmu.

³ Do' iko ngeletep nelun rayeh bang anid babpat imetmu, pad ideh nguit anak adi' decur luk do' taga ini amé' ruma' awanmu tungé' Susa. Maré nedeh bang imet Hegai lun luk pinani' ineh luk ngasa' decurmu, ieh ideh miak ngalap umau luk do' buen ku ngumau bururdeh.

⁴ Idi rat arangdeh do' iko ngalap decur luk pianmu ku libal Raca' Decur Basti.” Idi raca' pian ku bala ineh, idi ieh nemaya' luk biladeh ineh.

⁵ Idi déi' bawang Susa inan seburur lun Yahudi, ngadanneh Mordekai Yair ratnan pupu Beniamin, luk inul Kis idi Simi.

⁶ Kareb Nebukadnesar, raca' Babil nenaban ni Yoyakin raca' Yahuda rat Yerusalim dengan lun baken lun tiban, Mordekai idi arangdeh.

⁷ Ieh inan kinanak kanid, ngadanneh Ester luk titen Hadasa bang buri' Iberani. Kareb taman-tinanneh naté, Ester inasuh Mordekai mepad kudeng anakneh sebuleng. Ester do' taga idi metagap.

⁸ Idi kareb raca' nemada' bala ineh, pad mula' anak adi' decur inuit iné' Susa, Ester pana' inuitdeh. Idi ieh nesemuet bang ruma' raca' bang imet Hegai luk ngasa' awan raca'.

⁹ Hegai méi' ni Ester idi ieh do' neneh. Idi petacu ieh nemaré neneh uen ngumau ku umau luk do' buen, idi ieh nemaré akan luk pelaba do'. Idi teh Ester luk meluun uen ngedita' arang decur baken, pad inan tudu' burur anak decur rat ruma' raca' luk pinili' mangun ku demulunneh.

¹⁰ Idi Ester nengalum ratnan ieh decur Yahudi, maya' bala Mordekai.

¹¹ Idi anid-anid aco Mordekai lawé-lawé lemaba natad ruma' decur ineh pian kali' ratnan ulun Ester, idi anun luk miak mangun kuanneh.

¹² Idi amung decur inumau ku umau luk do' buen selak kinioneh, ieh ineh ku umau mur anem bulan kinioneh, idi teh ku umau luk baken luk do' buen anem bulan kinioneh. Pangeh ineh anid burur decur miak iten amé' nan Raca' Ahasuiras.

¹³ Kareb ieh nalan rat ruma' decur amé' ruma' raca', ieh miak ngayung ku anun-anun luk pianneh.

¹⁴ Ieh amé' pa malem idi kenebpa ieh iten amé' bang ruma' decur lun baken, bang imet Sasgas, ieh ineh lun luk pinani' luk ngasa' apid raca'. Ieh na amé' matun raca' sekua' teh kudeng raca' na pian ku ieh, idi kudeng ieh na nawar ngadanneh.

¹⁵ Idi macing karebneh Ester amé' papu' raca', ieh ineh Ester Abikail luk kinanak kanid Mordekai luk nengasuh neneh mepad kudeng anakneh sebuleng. Idi Ester buren amung lemulun luk nier neneh. Idi ieh nengayung ku anun-anun luk bila Hegai lun luk pinani' luk ngasa' ruma' decur ineh.

¹⁶ Idi bang bulan pulu', ieh ineh bulan Tebet, bang lak luk ketudu' bang imet Raca' Ahasuiras, idi Ester inuit iné' matun Raca' Ahasuiras bang ruma' raca'.

¹⁷ Idi raca' mawa neneh meluun ratnan amung decur baken. Idi ieh meluun méi' neneh ratnan decur baken, pad ieh nenganau' pata raca' luun uluhneh idi nenganau' neneh mangun ku raca' decur ku libal Basti.

¹⁸ Idi raca' nenganau' aceh irau rayeh kuan Ester, idi ieh nenawar amung lun rayeh idi lun luk ngimet. Idi ieh nengeletep aco rayeh kuan amung imetneh, idi nemaré mula' baré luk petulu barén raca'.

Mordekai Ngulun Raca'

¹⁹ Idi Mordekai pangeh pinili' ngakem kuan raca'.

²⁰ Idi Ester nengalum ratnan ieh decur Yahudi, ngaceku ieh bibpeng Mordekai na mada'. Idi ieh nemaya' balaneh mepad kudeng ieh nemaya' balaneh kareb ieh anak isuut.

²¹ Kareb Mordekai ngakem bang ruma' raca', Bigtana idi Teris, dueh burur lun luk pinani' luk matar munung tanga' takep-takep raca', sikal metueh ratnan Raca' Ahasuiras, idi pian ngaté neneh.

²² Mordekai nekali' bala ineh idi ieh nemada' Raca' Decur Ester. Idi Ester nemada' luk nekali' Mordekai kuan raca'.

²³ Idi ideh nengelio ineh idi bala ineh matu. Idi didueh inukum tekito pad didueh naté. Idi raca' nengecuk ngayud ini bang surat inul raca'.