ESTER 1 - BALA LUK DO'

Raca' Decur Basti Sikal Metueh Ratnan Raca' Ahasuiras

^1-2 Idi Ahasuiras ineh raca'. Idi kerusi raca' Parsi ineh déi Susa. Ieh ngimet 127 bawang rat India macing Sudan.

³ Bang lak luk keteluh bang imetneh ieh nenganau' irau kuan amung pengulu idi lun rayehneh. Amung baweh Parsi idi Midi idi, dengan pengulu idi lun rayeh anid bawang ineh.

⁴ Anem bulan kinioneh ieh nengegala' binaweh luk bang ruma'neh luk pelaba do'!

⁵ Pangeh ineh, raca' ineh nenganau' aceh irau kuan anak itinneh déi' Susa, ieh ineh kuan lun do' idi lun masi' pana'. Bang aceh minggu ideh irau bang kabun luk iring ruma' raca'.

⁶ Déi' natad inan tuda'-tuda' dicing kibung luk mebuda' idi mebata', luk inabet ku kibung pu luk sia' merirem nan susing pirak luun diri batu luk mebuda'. Inan kerusi ratnan amas idi pirak déi' luun natad luk inau' ratnan batu luk meraga, ieh ineh luk mesia', mebata', mebuda', idi mitem.

⁷ Luk rupendeh ruen bang sangkir amas, anid-anid sangkir ineh baken ayuneh. Idi raca' nemaré abpa' anggurneh dengan mela.

⁸ Na bebpeng raca' ineh na ngirup. Ieh nengecuk demulunneh maré maya' pian anid-anid burur lemulun.

⁹ Idi Raca' Decur Basti nenganau' irau kuan amung-amung decur bang ruma' raca'.

¹⁰ Kareb aco luk ketudu' bang irau ineh, raca' ineh ngirup dengan mawang niat. Idi ieh nenawar tudu' burur demulunneh luk pinani', ieh ineh Mehuman, Bista, Harbona, Bigta, Abagta, Setar, idi Karkas.

¹¹ Ieh nengecuk nedeh nguit Raca' Decur Basti luk inayung ku pata raca'. Raca' decur ineh do' taga idi raca' pian mada' taganeh siren lun rayeh idi amung lun luk tinawar iné' ku irau ineh.

¹² Iamo' kareb demulun ineh nemada' Raca' Decur Basti ratnan ecuk raca', ieh ara' amé'. Idi raca' pelaba useh.

¹³ Idi raca' pekalai ngitun nelun mileh ratnan ukum idi adat bang bawang. Idi ieh nenawar nelun luk mada' neneh ratnan luk miak ruen.

¹⁴ Idi luk inanneh merapet ieh ineh Karsina, Setar, Admata, Tarsis, Meres, Marsina, idi Memukan—tudu' lun rayeh Parsi idi Midi luk meluun rayeh bang imet ineh, idi luk inan raca' merapet.

¹⁵ Kebalaneh kuan lemulun ineh, “Ui ini, Ahasuiras nengecuk demulunku nguit balaku kuan Raca' Decur Basti, iamo' ieh ara' maya' bala ineh! Anunké ukum tau luk petulu kuanneh?”

¹⁶ Idi kebala Memukan kuan raca' idi lun rayehneh, “Raca' Decur Basti pangeh nengedat baken raca' sebuleng mo', iamo' amung lun rayehneh idi amung deléi bang imetneh!

¹⁷ Aput imet ini amung decur sikal ngebeneh awandeh, kareb ideh kali' luk inau' raca' decur. Kebaladeh, ‘Raca' Ahasuiras nengecuk Raca' Decur Basti iné' neneh, iamo' na ieh iné'.’

¹⁸ Amung decur lun rayeh Parsi idi Midi sikal ngatum bala ini inan lun rayeh raca' aco sini, pad inan susa' idi ria'!

¹⁹ Kudeng ini pian raca', do' raca' mebpeng ni Basti na amé' matun raca' teh. Do' bala ineh uen ngayud mangun ku ukum Parsi idi Midi, pelé ieh na uen ngisu'. Idi do' seburur decur luk meluun do' ngelibal neneh mangun ku raca' decur.

²⁰ Kareb ukummu ineh badén aput imet ini amung-amung decur miak ngedita' awandeh, lun do' idi lun dat pana'.”

²¹ Raca' idi lun rayehneh ineh pian ku bala ini, idi raca' nemaya' bala Memukan ineh.

²² Ieh nemaré bala kuan amung babpat bang imetneh, bang buri' lun bang bawang ineh, idi ieh nengecuk amung deléideh mangun ku lun rayeh bang tetek ruma'deh, pad amung uang tetek ruma'deh maya' baladeh.